Шудаöсь öтлаын

[ A+ ] /[ A- ]


Руч сиктын чоййылын Порошкинъяслöн семьяын быдмис öтка ныв — Танюша. Бать-мамыс, Галина Николаевна да Николай Дмитриевич, ёна лелькуйтiсны сiйöс, гашкö, сы вöсна и быдмис шаньöн, вежавидзысьöн, мичлунсö тöдысьöн, авъяöн. А Ручлöн катыдын быдмис Денис нима зонка. Мамыс, Александра Андреевна, водз колис öтнас да ачыс быдтiс кык пиöс. Школа помалöм бöрын Денис пырис велöдчыны Кебанъёльö трактористö. Татьяна велöдчис пединститутын медводдза во. Кöть быдмисны öти сиктын, а öта-мöдсö «казялiсны» öти рытö. Воисны сьöлöм вылас да кутiсны аддзысьлыны каникулъяс дырйи. Тадзи коли нöшта куим во. Денисöс босьтiсны армияö, а Таня виччысис сiйöс, öд регыд нин колiс вайны кага. Витöд курсын лоис мамöн — чужис енсыкöдкодь Данил пи. Велöдчöм эз эновт, помалiс институт. Денис тшöкыда звöнитлiс, сiйöс виччысисны кык меддона морт. Öти рытö телефонöн сёрнитiгöн висьталiс, мый пукалö нин Москваса вокзалын. Локта пö гортö, регыд аддзысям. Таня топöдлiс ичöт пиуксö. Быттьö мыйкö гöгöрвас дзоля мортыс, висьталiс, мый регыд локтас батьыс. А сэсся кылiс керкаö тотшкöдчöм. Восьтны öдзöс петiс батьыс (олiс бать-мам дорас). Виччысьтöг ныв кылiс дона мортлысь гöлöссö. Денис вöлöма Ручын нин, бöра-водза пыралöма видлыны мамсö да воксö и котöрöн воöма Таня дорö. Сьöрсьыс вайöма Данил пиыслы ыджыд ворсан машина. 
Öнi Татьяна Николаевна да Денис Иванович Попов гозъялöн куим челядь. Даниллы 11, Ириналы 6, а Сашалы 4 арöс. Татьяна Николаевна медводз уджыштiс старшöй вожатöйöн Ручса школаын, 2015-öд восянь завучалö. Денис Иванович дыр уджалiс пилорама вылын, öнi школаын дежурнöй, сiдзжö новлöдлö машинаöн Аныбö, Ручö да Дереваннöйö пекарнясянь нянь. Лэптiсны ыджыд керка, кöнi век кылö серам, гажа сёрни. Гозъя öтырышъя асланыс челядькöд. Сиктад уджыд оз и бырлы, но Поповъяс вевъялöны петавлыны вöр-ваö, кыйны чери, зэв унаысь нин лэччывлiсны юркарö, вöлiсны Казаньын. Войколöн кö мунöны походö, узьöны палаткаын. Мед челядь вöлiны зiльöсь, быдтор вöчны кужысьöсь (кыдзи бать-мамыс) велöдöны унаторйö. Босьтiсны чипанъясöс, идралöны-вердöны челядьныс. Данил ёна радейтö спорт, зэв бура сдайтiс ГТО, эм уна медаль, ворсö волейболысь, футболысь, пионерболысь. Зэв лабутнöй, тöлка-сяма. Радейтö ыджыд батьыскöд кыйны чери. Ириналы да Сашалы öнi окота сöмын ворсны чачаясöн, но ыджыд вокыс налы пример. А кöзяиныс то тракторсö дзоньталö, то сиктса уджъяс вöчö: гöрö, пес поткöдлö (колö и мамыслы отсавны). Гортас воö ва — Денис Ивановичöн жö вöчöмтор. Стенмын уна öтувъя снимок, быдын тöдчö шуд, öта-мöд дорö муслун. Татьяна Николаевна ыджыда аттьöалö бать-мамсö, инькасö. Быдногыс да быдторйöн пö отсасьöны. И челядьтö видзны воласны, и чöскыдтортö ньöбасны да медводз на дорö пыраласны. И челядьыс радейтöны ыджыд бать-мамсö, пöчсö. Татьяна да Денис кыкнанныс лöсьыдик, мичаник тушааöсь. Сиктса йöзысь оз öтдортчыны. Олöны зэв ёртасьöмöн, шудаöсь асланыс челядьöн, бать-мамöн, уджöн, öта-мöд дорас ыджыд муслунöн, кодi абу и чинöма, кöть гозъя олöны нин öтув 11 во, а быттьö тöдмасисны сöмын на. А менам син водзö кыкнанныс сувтöны ичöт челядьöн. Танякöд быдмис менам нылöй. Став льöм пу вылас вöлi кайласны сёйны льöм, сёысь гожöм чöж купайтчасны. А Денислöн мамыскöд öтув уджалiм сельпоын. Кык вок тшöкыда волывлiсны мамыс дорö. Шудлун тiянлы, бур йöз. 
Екатерина УЛЬНЫРОВА. 
Руч. 
Снимок вылын: 
Поповъяслöн шуда семья.

Комментарии:

Добавить комментарий

Свежий выпуск: за 7 ноября