Кыдзи овсьö уна челядя семьялы сиктын öнiя кадö? Кутшöм тöжд-могъясöн паныдасьлöны? Мед вочавидзны тайö юалöмъяс вылö, тöдмасям Помöсдiнысь том гозъякöд.
Татьяна Владимировна да Роман Олегович Димитриевъяс мусмисны öта-мöдлы школасянь. Нывлы вöлi 19, а зонлы 18 арöс, кор найö гижсисны. Таво öтлаасьöмсянь пасъясны 10 во — озысь кöлысь.
Гозъялöн быдмöны Артём, Аркадий да Андрей пиян. Чужисны, кор ныв велöдчис Коми государственнöй пединститутын. Медводз нёль восö вермис и велöдчыны, и быдтыны челядьöс. Заочнöй вылö вуджис сöмын бöръя воас. Дзолюкъяскöд тшöкыда веськавлiс бурдöдчанiнö, öти кинас кутлiс кагасö, мöдöн печатайтiс реферат. Ёна отсасис и верöсыс. Медся ыджыд отсöг вичмис Марина Игнатьевна мамсяньыс, кодi пукавлiс нывлöн велöдчигöн ыджыдджык внукыскöд, да Галина Игнатьевна тьöткасяньыс, кодi öнöдз на отсалö видзны челядьсö. Татьяна оз тöд, кыдзи эськö артмис велöдчöмыс, эз кö вöвны найö. Ёна жö и сьöкыд вöлi, унаысь усьлiс лолöн, торйöн нин, кор висисны челядь. Кöсйис шыбитны велöдчöмсö, но кыдзкö тай кутчысис. Öнi Артёмлы 8, Аркадийлы 6, Андрейлы 4 арöс. Медся ыджыдыс вуджис коймöд классö, ичöтджыкъяс котралöны садйö. Дерт, овлö быдторйыс, и зыкö волöны, но ёнджыкасö ворсöны öтлаын, öд арлыднас ыджыд костыс абу. Отсасьöны нин бергöдны овмöс. Артёмлы индалöм оз нин ков, вöчö тшöктытöг. Пöчыслы ваялö ва, вердö кроликъясöс. Мамыслы окотапырысь отсалö мыськыны тасьтi-пань. Аркадийöс лоö корны на, дышöдчыштö. А медся ичöтыс быдмö кагукöн. Сылы нинöм на оз тшöктыны вöчны. Зонпосни ёна бергалöны бать дорас, кодi найöс велöдö вöр дорö. Романлы зэв муса кыйсьöм, татöг оз вермы овны. Öнöдз казьтылöны, кыдзи кольöм воын куим лун кежлö узьöмöн ветлiсны вöрö, сöмын Андрейöс эз босьтлыны, ичöт на вöлi, да кольлiсны тьöткаыскöд. Аркадий сэки ветлiс медводдзаысь да ёна шензис став вылас, öд олiсны вöр керкаын, кöнi абу би, интернет. Ёна вотчисны, бать-мамысь эз кольччыны и челядь.
Вöр керкаö вотöдз батьыс велöдiс пиянсö, кыдзи кутчысьны уна нэмъяс сайын коми кыйсьысьясöн лöсьöдöм урчитöмторъясö. Керкаö пыртöдз камöдышталiс черöн быд пельöсö, тадзи чолöмасис керкаыскöд да сiйöс видзыськöд, корис лэдзлыны туйвыв йöзöс олыштны да шойччыны. Вöр керкаысь мунтöдз быть колö пыртлыны пес запас, кольны сов, сукар, пелькöдчыны, мед вöлi сöстöм. Ыджыд пиыс сюся кывзiс, сюркнялiс пель саяс, батьыс моз жö кыйсьысьöн, гашкö, лоас.
Артемий — аслыссяма кага. Татьянаöс ёна чуймöдiс, кор пиыс медводдза классын велöдчигöн босьтчис велöдчыны кысьыны бисерысь. Öнöдз на эз шыбит. Мöдöд классын кутiс ветлöдлыны «Домоводство» кружокö, кöнi велöдöны пусьыны. Батьыслы ёна окота вöлi, мед пиыс пырöдчас спортö, öд ачыс вöлi спортсменöн, ворсiс ичöт футболысь, волейболысь. Петкöдчылiс да вермылiс республикаса ордйысьöмъясын, сылöн нимыс гижöма налöн школаса «Почёт книгаын». Чайтö, мый зонлы быть колö пырöдчыны спортö. Но Артём ньöти оз кöсйы. Босьтчылiс ворсны футболысь, сэсся дугöдчис, шуö, спорт абу сылöн.
Аркадий мунас школаö локтан воын. Таво мамыс оз на кöсйы сетны, öд ачыс велöдö посни классъяс да аддзö, кутшöм сьöкыд квайт арöсаяслы, найö ёна мудзöны. Зонка терпенньöа, сылöн бура артмö вöчны юр жуглан задачаяс. Мамыс чайтö, мый пиыслы сьöлöм вылас кутас воны математика.
Андрей ичöт на да, ёна и лелькуйтöны. Тшöкыда босьтлöны ки вылас. Радейтöны да тшöтш ворсöдöны ыджыдджык вокъясыс: тшöтш серпасасьöны, мыйкö вöчöны. Андрей унаторйö велöдчö на вылö видзöдöмöн. Коркö неважöн мамыскöд вöчисны гипсысь мыгöр, отсасис окотапырысь.
Кор Татьяна велöдчис карын да вöлiны нин челядь, тшöкыда волiсны мöвпъяс овмöдчыны сэнi, но верöсыс сувтiс паныд. Шуис, мый вöр-ватöг сiйö овны оз вермы. Воисны öти кывйö: карса патераын олöм налы оз лöсяв. Налы колö асланыс керка да градъяс. Помöсдiнса школаысь директор бура тöдiс нылöс да босьтiс вожатöйöн, кöть эськö дипломöдз вöлi кык во на. Институт помалöм бöрын сылы дзик пыр сетiсны класс. Уджалö 2013-öд восянь квайт во нин. Ни öтчыдысь эз жалит, мый кольччис чужанiнас. Шуö, мый Помöсдiн — тайö водзö сöвмысь сикт, налы кыпöдöны велöдчанiн, нывбабалы зэв нимкодь, мый кутас велöдны выль школаын. Öтиторйысь сöмын аньлöн дзугыльтчö сьöлöмыс — айловъяслы абу удж. Верöсыс уна во нин ветлöдлö уджавны бокиö. Дерт, сылы абу нимкодь таысь, но челядьтö колö кок вылö сувтöдны, ас оланiн на лöсьöдöны и.
Уна во сайын босьтчисны лэптыны керка. Таво налы, кыдзи том семьялы, государствосянь вичмис сьöма отсöг. Отсöгыс, дерт, зэв тöдчана. Таöдз асьныс мам капитал да коймöд кага чужтöмысь республикасянь вичмöдöм сьöм вылö вöчлiсны керкалы подув да мыйтакö кыпöдiсны нин. Öнi уджыс тöдчымöн öддзас: вайöдасны вевтöдз, пуктасны öшинь-öдзöсъяс. Эскöны, мый во мысти вуджасны овны выль керкаö.
Татьяна пыр уджалö, кадыс унатор вылö оз тырмы. Гежöдика вичмылысь шойччан лунъясö окотапырысь петавлöны вöр-ваö. Медся ичöтыс ёна радейтö тшынöдöм яй. Öнi со виччысьöны, кор мамныс петас отпускö да бара петаласны вöр-ваö. Неважöн батьыс Артёмкöд лэччылiсны вуграсьны. Ветлiсны эз нин медводдзаысь, но водзын нинöм эз кыйлыны, а öнi со пиыслы сэтшöм нимкодь, мый и сылы шедiс.

• Том йöзлы, дерт, кок вылö сувтны абу кокни, нöшта кор некытысь и некодсянь абу отсöг. Куим челядьтö быдтыны сьöкыд. Но меным мойвиис: ёна отсасьöны верöсöй, сылöн мам. Пиян ёна радейтöны пöчсö, отсасьöны сылы, узьлöны сы дорын. Семья — тайö радейтчöм, гöгöрвоöм, дзоньвидза челядь. Колö пыдди пуктыны öта-мöдöс, колö ыджыд терпенньö, — висьталiс Татьяна.
  Дзолядырйиыс Татьяна пыр петкöдчис сцена вылын йöз водзын. Шуö, мый тайö сылöн лов шойччöдантор. Кöть и уджыс тыр, ныв удитö нуöдны гажъяс. Медводдзаысь нуöдiс Сыктывкарын, а сэсся Кулöмдiнын, Керчомъяын. Йöзлы воис сьöлöм вылас, ёна гажöдчисны. Таво Татьяна нуöдiс школакöд янсöдчан рыт. Сэсся корисны кöлысь вылö. Нывлы нимкодь, мый сылöн артмö гажöдны йöзöс.
  Верöсыслы, вöр кындзи, зэв муса техника.
  Том гозъялы öнi ёна отсалö Татьяналöн тьöткаыс, кодi олö накöд. Тадзи и бергöдчö лун бöрся лун Димитриевъяслöн ыджыд семья.
  Галина КЛЮЖЕВА.
  Снимок интернетысь.