Том ныв шудсö аддзис уджалiгас. Татьяна Семёновна Напалкова шöр бурдöдчанiнлöн «тэрыб отсöг сетан» юкöнын старшöй фельдшер, а Артём Александрович верöсыс пытш-кöсса делöяс кузя районса юкöнын старшöй участкöвöй уполномоченнöй. Уджалöны лун и вой, найöс кыпöдöны и шойччан лунъясö.
2008-öд воын Татьяна Семёновна помалiс Сыктывкарса медколледж. Локтiс Донса бурдöдчанiнö, öтпырйö велöдчис водительö. Кöть сиктын вöлi оланiн, тшöкыда ветлiс чужанiнас, Носимö, Зоя Анатольевна мамыс дорö. Кык во мысти вöзйисны уджавны содтöд «тэрыб отсöг сетан» юкöнын да эз бöрыньт. 2010-öд во помын вуджис бöръяас дзикöдз. Томъяс овмöдчисны юрсиктö, гижсисны 2012-öд воын.
-Овлö, мый верöскöд ог аддзысьлöй кык лунöдз, вочаасьлам уджалiгöн, кор полицияын дежуритан юкöнö воö лёк лоöмтор йылысь юöр да сэтчö пыр жö мунам ми, бурдöдысьяс, и локтö участокса уполномоченнöй. Буретш тадзи и тöдмасим Артёмкöд, — сёрнитiс ань.
Чужис Денис. Кор сылы тырис квайт тöлысь, ань петiс уджавны, кöть верöсыс вöлi паныд. Кагасö видзис Татьяналöн мамыс.

• Мамлöн вит челядь. Видзис ныв-писö матö ставныслысь. Сöмын медся ыджыд чой Еленалы отсалiс ыджыд мамöй. Ог вунöд, кыдзи пыри медводдза классö. Медводдза велöдысьöн лоис сöмын на уджö босьтчысь Елена чойöй. Став челядьыс ыдждöдлiсны ним-вичнас. Кутшöм нö, мися, тiянлы Елена Семёновна, тайö жö Лена. Мамöй пинялiс сэтшöма, мый чойöс Елена Семёновнаöн кутi шуны эг сöмын школаын, но и гортын да шуа öнi на, — казьтылiс ань.
  Напалковъяслöн пиныс ветлöдлö Носимса садйö. Асывнас синмыс на оз воссьы, а юасьö нин, кöнi узяс. Кылас кö, мый вуджас Носимö, сiдзкö, батьыс и мамыс уджалöны, садйö нуас да сэтысь босьтас ыджыд мамыс, сы дорö и кольччас.
  Уджалiгöн овлö быдсяматорйыс. Öтчыд сiйö да мöд фельдшер мунiсны висьысь кага дорö. Öти бурдöдысь видлалiс, а Татьяна Семёновна гижасис. Виччысьтöг кагалöн батьыс, кодi вöлöм висьö вежöр торксьöмöн, кутiс вачкавны сiйöс бöрсяньыс. Мöд бурдöдысь кутiс дор-йысьны да айлов уськöдчис и сы вылö, чегис нырсö. Арын öти айловлысь турипув вотiгöн топöдiс сьöлöмсö. Бур, мый олöма морт сотöвöй телефонöн звöнитiс гортсаясыслы, внукыс петкöдлiс вотчанiнсö. Отсалiсны, виччысисны, кор кокньöдас, сэсся километраысь унджык петкöдiсны туй вылö нöсилка вылын. Öтчыд туй вылын зурасисны йöз тыра да вöр кыскан машинаяс, йöз доймалiсны и кулiсны. Татьяна Семёновна буретш шойччис. Сылы звöнитiсны удж вывсянь, мед корас и мукöд уджалысьясöс. Отсавны кыпалiсны ставöн.
  -Кодлы сьöкыдджык, сы дорö и уськöдчан. Öтиясöс нуöны, мукöдлы сетам отсöг. Миян «тэрыб отсöг сетан» юкöн витысь нин ветлiс ордйысьны республикаö, ме куимысь. Бура петкöдлiм ассьыным быдлунъя удж, — висьталiс бурдöдысь.
  Татьяна Семёновна нöшта уджалö фельдшерöн пытшкöсса делöяс кузя министерстволöн районса юкöнын мыжаясöс кад кежлö йöршитанiнын. Быд лун видлалö сэнi «шойччысьясöс». Нöшта юрнуöдö юкöн бердын общественнöй сöветöн.
  Гозъя ёртасьöны спорткöд. Ань пырö волейболысь ворсысь бурдöдчанiнса, верöсыс полицияса котыръясö. Öтчыд ордйысигöн тайö кык котырыс ворсiсны воча. Бурдöдысьяс ворссисны. Мöдысь сэсся Артём Александрович эз нин пет ворсны гöтырлы паныд.
  Том ань радейтö сьывны да йöктыны. Ветлöдлö Носимса культура керкаö томъяслöн котырö. Пуктöны öнiя олöм серти киноясысь юкöнъяс, ворсöмъяс, лöсьöдöны и асьныс. Ставöн тöдам быд выль воö мунысь «Ирония судьбы или с лёгким паром» кино, кöнi медшöр герой веськалiс мöд карö сылöн кодь жö нима уличавывса керкаö. Миян матö быд сиктын эм Шöр улича. Со и носимсаяслöн медшöр герой «веськалiс» Ручысь Носимö. Пуктöны сiдзжö мойдъяс.
  Аньлöн лов кыпöданторйыс — дзоридзьяс. Кöдзö мартсянь, шондöдöм бöрын пуктö мамыслöн керка öшинь улö.
• Менам став чой-вок вужъясисны Носимö, кыпöдiсны керкаяс. Батьöй кулiс вит во сайын, мамöй öнi öтнас. Ми сiйöс гажöдам, öтув бергöдам сылысь овмöс, пуктысям, гожöм-арын вотчам. Радейта пöжасьны, но кадыс оз тырмы. Пöжасöн чöсмöдлö мамöй. Менам гортын пызан вылын век эмöсь шыд да рок. Олам, позьö шуны, öти лунöн. Уджным кыкнаннымлöн сэтшöм: он куж урчитны, мый вöчны аски. Кольöм воын кöсйим семьяöн шойччыны лунвылын, но ветлiм сöмын пикöд. Гозъяöн олам кöкъямыс во, а выль во öтлаын мойвиис вочаавны сöмын кыкысь, и кыкнанным январ öтиöд лунö петiм нин удж вылö. Но ми лолöн ог усьöй, öд уджным сьöлöм серти. Аттьö мамлы, кодi гöгöрвоö миянöс, отсалö быдтысьны, — кывкöртiс водзмöстчысь, быдлаö вевъялысь ань.
  Снимок да гижöд Марина Дадашовалöн.