Шоныд казьтылöмъяс

[ A+ ] /[ A- ]


Керчомъя сиктын öтув быдмим кöкъямыс нывка. Котралiм садйö, сэсся школаö, велöдчим водзö карын, дерт, пыр письмöасьлiм, гажъяс кежлö мöдöдлiм открыткаяс. Век чукöртчывлiм каникулъяс дырйи культура керкаö, ветлiм йöктыны. Быдöнлöн вöлi аслас сьöлöм косьтысь, а со тадзи, мед öтув верöсъяскöд, эг на аддзысьлöй. Медводдзаысь тайö артмис январын, Нина Фёдоровна Поповалöн чужан лун дырйи. Пукалiгöн гöгöрвоим,кыдзи бырöма гаж öта-мöдысь. И быттьö ми томмим, а, гашкö, сiдзи и вöлi: синъяс югъялiсны, а верöсъяс нимкодясисны гöтыръяснас, а гашкö, миян моз мöвпъясöн волiсны том кадö. Районса шöр бурдöдчанiнын медшöр врачöс вежысьöн уджалö Нина Фёдоровна Попова (Кочанова). Иван Борисович верöскöд öтув олöны 35 во, быдтiсны челядьöс да нимкодясьöны внук-внучкаясöн. Анна Алексеевна Катаева (Лютоева) уджалö Керчомъяса бурдöдчанiнын, верöсыс Николай Витальевич. Öтув нин 27 во, быдтiсны ныла-пиаöс. Николай Витальевич уджалö школаын, велöдö котравны лыжиöн. Нина Васильевна Лютоева Николай Михайловичкöд 34 во. Нина помавлiс вузасьöм, сэсся связьлысь училищеяс. А верöсыс стрöитчысь. Быдтiсны нылöс, öнi котралöны кык внук. Нина Северьяновна Иванова (Золотарёва) университет бöрын уджавлiс коми кыв да литература велöдысьöн, Зимстанса детдомын вöлi директорöн. Верöсыс Валерий Константинович уджалiс водительöн Зимстанса вöрпунктын да новлöдлic детдомса челядьöс. Налöн кык ныв. Ангелина Павловна (Юдина) да Иван Егорьевич Тарабукинъяс олöны öтлаöн 42 во. Кык ныв да квайт внук-внучка. Иван Егорьевич уджалiс физкультура велöдысьöн, вöлi и спорт школаын тренерöн. Ангелина зiлис школаын бухгалтерöн, райадминистрацияысь архив юкöнын. Нина Витальевна Пашнина (Катаева) пыр уджалiс велöдысьöн Скöрöдумса школаын. Помавлiс пединститутлысь география факультет. Михаил Алексеевич верöскöд öтув олöны 36 во. Олöмö петкöдiсны ныла-пиаöс. Котралöны нин куим внук-внучка. Надежда Васильевна Тарабукина (Тимушева) помалiс Сыктывкарса университет, лоис кыв туялысьöн. И пыр уджалö Кулöмдiнса школаын. Василий Михайлович верöскöд кургöны-олöны 36 во. Верöсыс помавлiс видз-му техникум, öнi уджалö Кулöмдiнса ПМК-ын директорöн.
Тайö кывъяссö гижигöн син водзын сувтiс аддзысьлан рытыс. Гажöдчим, йöктiм, ворсiм асылöдзыс. Сьöлöм бурмис. Нимкодь ичöтдырся нывъёртъяс вöсна, öд ставныс аддзисны сьöлöм шонтана удж да бöрйисны бур верöсъясöс. Мед ставыс лоö бур, збыльмасны кöсйöмъяс. Аддзысьлытöдз, донаяс!
Екатерина УЛЬНЫРОВА.
Руч.

Комментарии:

Добавить комментарий

Свежий выпуск: 28 марта

Осторожно — мошенники!