Шога туй

[ A+ ] /[ A- ]

Неважöн вöлiны гижöдъяс Кöрткерöс районса Одыб да Висер сиктъяс дорын лёк туйяс йылысь. Пасьвартöны туйяс вöр тыра ыджыд машинаяс, а вöчысьыс абу. Сiдз жö и миян Кулöмдiн — Помöсдiн туйкост сё страмина кодь, огö жö шыльыд-мольыд туйöд ветлöй. «Мондилöн» да ас вылö мукöд уджалысьяслöн вöр петкöдан гырысь машинаяс кисьтiсны туйсö мам муöдзыс, быттьö ён артобстрел бöрын артмöмаöсь джуджыд да паськыд гуран-гöпъяс. 
Туй агентство кöсйысьлiс нин лöсьöдны туйсö 2019 воöдз дзоньнас, но ставыс бара колис кабала вылын. Бöръя кадö тшöкыда колö лэччывны Кулöмдiнö, да ветлöмыс тайö туйöд лёк вöт кодь нин лоис: чеччöдлас сэтшöмöдз, мый юр вем гудрасяс рокöдз, а сюрса лыяс дасьöсь киссьыны гач пиö. 
Со, эськö, ыджыдджык чинаясöс кö вайöдлыны тайö туй вылö да вежон чöж öтарö-мöдарö новлöдлыны тайö туйöдыс важ автобусöн. Мед этша ньылалыштасны буссö да пыркöдыштасны рушкунысö. Кык тöлысь ветлöдлiгöн мöдöдысь нин тшук эгö лэбöй туй вылысь — мöдысь нин йöз тыра автобуслöн потiс воддза кöлесаыс. 
Медводдза потöм бöрас дзик пыр пыравлiм районса администрацияö да гижим норасьöм. Миянлысь норасьöм районса администрацияöн веськöдлысь С.В.Рубан ыстiс туй агентствоö, кытысь воис вочакыв: 2021-öд воысь водзджык туй оз ло вöчöма. А сиктса администрацияö воöма вочакыв, мый оз на вöчны 2023-öд воöдз. Администрация бердса депутатъяс весиг гижлöмаöсь В.Путинлы, но Москвасянь косöдöмаöсь юалöмсö бара жö миян республикаса туй агентствоö. 
Буракö, президент оз лок вöчны миянлысь туйяс — местаяс вылын мытшöдъяс колö бырöдны меставывса власьтлы. Талун, август 2-öд лунö, лэччигöн бара на швачнитiс воддза кöлесаыс. Ен видзис миянöс пасьмунöмысь да доймалöмысь. Бур, мый бöрсянь локтiс мöд автобус, да ми пуксим сэтчö. 
Татöн артмö юалöм: зэв-ö дыр на кутасны тешитчыны йöз вылас? Миянсянь вöчсьö ставыс, мый колö: ми вештам транспорт кузя вот, и огö дзоляöс, а со власьтсянь удж оз тыдав. Пыр ыстысьöны сьöм абутöм вылö. Ветлысьяс пöвстын öд унджыкыс лэччöны больничаö, мед бурдöдчыны, а лоö сiдз, мый содтöд висьмöны татшöм туяд.. Абу нин ылын республикалöн лун. Сьыв да йöкты, гажöдчы да нимкодясь, коми войтыр, и водзö… 

Александр Уляшев. 
Скöрöдум. 
Гижысьлöн снимок вылын: бара на 
потiс кöлеса.

Комментарии:

Добавить комментарий

Свежий выпуск: 15 марта

https://www.gosuslugi.ru/help/faq/mobile_election/2100910

Осторожно — мошенники!