Санкт-Петербургын быд во мунö школа помалысьяслы «Алые паруса» гаж, код вылö, чайта да, окота веськавны быдöнлы. Таво мойвиис ветлыны сэтчö Кулöмдiнысь 11-öд класса кык велöдчысьлы. Гликерия Кочанова да Андрей Цан некымын во нин пырöдчöны велöдчысьяслöн Россияса öтмунöмö, школаын бергöдöны ыджыд удж, отсасьöны чукöртчылöмъяс вылын, нуöдöны гажъяс.Таысь налы вичмисны «Алые паруса» гаж вылö билетъяс. Гликерия да Андрей вöлiны Санкт-Петербургын медводдзаысь да ветлöмыс, дерт, воис сьöлöм вылас, сы йылысь дыр на кутасны казьтывны. Аддзылiсны уна мичатор, кар кузя экскурсия нуöдiсны Нева ю вывтi катерöн кывтöмöн. «Алые паруса» вылö волiс 33 сюрс школа помалысь, наысь кындзи, вöлiны и верстьöяс да посни челядь. Гаж пансис дас час рытын да мунiс куим час асылöдз. 
— Ми школаын петкöдчам быдпöлöс нуöданторъясын. Отсалам нуöдны гажъяс, асьным мöвпыштiм да котыртiм посни велöдчысьяслы ки-кок песанторъяс. Миян школаысь вожатöй Лариса Петровна юöртiс, мый позьö ветлыны Санкт-Петербургö гаж вылö. Та йылысь тöдмалi апрель помын. Медводзсö весиг эг эскы: збыль öмöй татшöмторсö вöзйисны меным? Весиг аслым водзвыв нимкодясьны эг тшöкты, шуи виччысьлыны, мый висьталас мамöй. Мам шуис, мый татшöм гаж вылö ветла быть. Сьöлöмöй тырис шудöн, эг тöд, кытчö ачымöс воштыны, öд татшöмторйыс олöмад овлö öтчыд, — юксис сьöлöмкылöмъясöн Гликерия. — Ме таöдз некор на эг вöвлы Санкт-Петербургын. Зэв мича, ыджыд, шемöсмöдана кар. «Алые паруса» йылысь кывлi важöн нин. Медводдзаысь телевизор пыр видзöдi сизимöд классын, сы бöрын кутi виччысьны быд во. Дерт, вöлi зэв окота ветлыны сэтчö аслым, но некор эг чайт, мый медся ыджыд кöсйöмöй збыльмас. Ёна мойвиис поводдяöн. Миянöс снимайтiс Санкт-Петербургса витöд телеканал. Öнi ме тöда, мый школа помалысьяслöн медшöр гаж вылö позьö веськавны оз сöмын «5» вылö велöдчысьяслы, но и ас кöсйöмöн отсасьысьяслы. 
Андрей Цанлöн висьталöм серти, сiйöс ёна шемöсмöдiс Санкт-Петербургö мунöм йылысь юöр. Юксис сыöн ёртыскöд, сiйö шуис, мый Андрейлы ыджыда мойвиис. Зэв нимкодясис пинас мамыс. 
— Кулöмдiн районысь ми вöлiм кыкöн, нöшта вöлiны нывъяс да зонъяс Сыктывкарысь, Чилимдiн районысь да мукöдлаысь. Сэнi аддзыси Сыктывкарса тöдса нывкакöд, кодкöд нёль во сайын öтлаын шойччим лагерын, — висьталiс Андрей. — Санкт-Петербургын ми аддзылiм быдсяма мичаторсö, шуам, Пётр Первыйöн вöчöм сад, кытчö лэдзлiсны сöмын мича паськöма йöзöс, а А.Пушкин сэтi ветлöдлiс халат кежсьыс. Аддзылiм Екатерининскöй двореч, дi вылын крепость. 
Гаж вылö заводитiсны лэдзны кык часöн водзджык, сы вöсна мый вöлiны зэв унаöн. Гажыс мунiс Дворцовöй площадь вылын. Уличасö вомöн ногыс тасалiсны, колисны пыранiн, кöнi колiс петкöдлыны билет. 
— Дерт, бурджык ставсö аддзывны аслад синъясöн, — водзö висьталiс Андрей. — Вöлi зэв бур гаж, кодöс нуöдiсны И.Ургант да В.Пресняков. Ме ёна виччыси «Бурито» сьылан котырöс. Концерт бöрын вöлi
пиротехникалöн да бияслöн шоу, салют. И со тшын сайысь мыччысис алöй парусъяса корабль. Ёна жö нин мича! 
Гликерия да Андрей вылö видзöдöмöн, районса школаясысь 10-11-öд класса велöдчысьяслöн чужис ыджыд кöсйöм тшöтш ветлыны Санкт-Петербургö, öд мойвины вермас быдöнлы, кодi бура велöдчö, ас кöсйöмöн отсасьö, водзмöстчö школаса да сиктса олöмын, пырöдчö быдпöлöс уджö. 
Водзö вылö том йöзлöн мöвпъяс ыджыдöсь. Андрей окотитö велöдчыны Казаньын. Гликериялöн чужис зэв ыдж-ыд кöсйöм велöдчыны Санкт-Петербургын, но, видзöд öмпырысь, бöръяс велöдчанiн гортсяньыс матынджык. 
Вожатöй Лариса Петровна Зезегова сiдзжö вöлi Санкт-Петербургын медводдзаысь. 
Со мый сiйö висьталiс: 
— Зэв нин важысянь вöлi окота ветлыны тайö мича кыпыд карас. Позьö шуны, менам челядьлöн моз жö кöсйöмöй збыльмис. А нöшта на артмис веськавны школа помалысьяслöн «Алые паруса» гаж вылö. Дерт, ми сэнi вöлiм этша кад, но удитiм унатор. Ветлiм Екатерининскöй садйö, кытчö чукöртлiсны Коми республикаысь гаж вылö воысьясöс. Велöдчысьяслöн Россияса öтмунöмöн юрнуöдысь О.Г.Медведева 
кыпыда сетiс миянлы гаж вылö билетъяс. Снимайтчöм бöрын катер вылын петалiм Нева вылö. Аддзывлiм Петропавловскöй крепосьт, Зимньöй двореч да уна мукöдтор. Но медся казьтыланаöн, дерт, колис гажыс, торйöн нин пиротехникалöн шоу да алöй парусъяса корабль. Тiпкис сьöлöм, эз шед лов тайö мичсö видзöдiгöн. Эз эскыссьы, мый ме тшöтш вöлi сэнi. Ме зэв шуда, мый веськавлi татшöм 
шемöсмöдана гаж вылö. Кöсъя шуны районса челядьлы: лоöй нырччысьöн, пырöдчöй быдпöлöс гажö, нуöданторйö, водзмöстчöй. И быдöнлы вермас усьны шуд ветлыны Санкт-Петербургö «Алые паруса» гаж вылö. 
Снимок интернетысь. 
Галина КЛЮЖЕВА.