Кöч тöлысь помын, стöчжыка кö, 29-öд лунö, вöлi «Ленин туйöд» («Парма гор») газет редакцияса вöвлöм уджалысь Виталий Васильевич Уляшевлöн чужан лун. Сылы эськö тырис 73 арöс, но во сайын кувсис сьöкыд висьöмöн. Коркö аддзысьлiм юркарын Из эрд (Стефановскöй площадь) вылын да вель дыр сёрнитiм. Удж пом вöлi (уджалiс сэк правительстволöн тöдчана юкöнын), мöдöдчöма гортас Эжваö да, шуис, ог пö тэрмась. Вель дыр нин эгö аддзысьлöй, ёна и варгим. Ньöти эз элясь дзоньвидзалун вылас, вöлi збодер, шмонитiс, кыдзи и пыр — лöсьыд статя да мича. Та вöсна дзик видзчысьтöмöн лои сылöн кувсьöм йылысь газетын шог юöр… Морт олöмыд тай клянича кодь, зэв öдйö вермö пасьмунны.
Виталий Уляшевкöд öтлаын «Ленин туйöд» газетлöн редакцияын уджалiм матö 10 во. Волöма меысь кык воöн водз, вöлi литсотрудникöн. Сэсся вочасöн кайис вылö: Устинья Михайловна Собчук местаö лои газет вöчысь секретарöн, некымын во мысти Анатолий Михайлович Морохин пыдди пуктiсны шöр редакторöс вежысьöн да тайö тшупöдас уджалiс КГБ-ö мунтöдзыс. Вöлi сюсь, вежöра, сибыд да вежавидзысь мортöн. Редакцияын куимöн и вöлiм томъясыс: сiйö, ме да «Сёрнитö Кулöмдiн» радиоын уджалысь Валентина Васильевна Рассыхаева (Юлаева), кодi мунiс велöдчыны Вöлöгдаса партийнöй школаö да сэсся редакцияö эз и лок. А типографияын — мöдарö: некымын нывбаба пöвстын унджыкыс — том нывъяс. Редактор Н.Т.Пунегов, кодi веськöдлiс редакцияысь öтдор и типографияса котырöн, газет лэдзöм бурмöдöм могысь буретш том йöзöн содтiс уджалысьяслысь лыд. Котыртчис комсомолечьяслöн котыр, менö бöрйисны юрнуöдысьнас. Веськыд киöн лои Виталий. Нывъяс кокниа кыпалiсны быд чукöстöм вылö, комсомоллöн райкомитетсянь унаысь пасйывлiсны бур боксянь. А Виталий Уляшевöс бур нимöн примитiсны коммунистъяслöн радö.
Дум вылö усис öти кадö совхозлы картупель босьтiгöн сылысь нимлун пасйöм. Сэк уджалысьяслöн лыд серти картупель радъяс юклiсны быд учреждениелы да предприятиелы. Ставöн зiлисны, некутшöм коллектив сылы юкöмсö эз кольлы лым улö. Газет вöчысьяс пажун бöрын петавлiм некымын лун, но öдйö рöмдö да помавны эгö удитöй. Бöръяысьсö мунiм водзджык, пажунöдз на субöтаö (сэк вöлi вежоннас квайт уджалан лун), мед помавны югыднас да пукыштны бипур дорын печенча пöжалiгмоз. Вöлi и мöд помка: тшукис Витялöн чужан лун да шуим öттшöтш пасйыны. Виталий Васильевич унаысь казьтывлiс тайö рытсö, шулiс, мый керкаын пукалöмöн татшöм гажыс эськö öдвакö артмис. Майбыр, коллективаным шмонитысьным тырмис: та вылö востерöсь вöлiны редактор Николай Трофимович Пунегов, гижысьяс Николай Иванович Липин, Семён Иванович Безносиков, бухгалтер Мария Александровна Липина, типографияысь Клавдия Александровна Чисталёва, Мария Михайловна Попвасева да мукöд. Накöд гажтöмыд оз босьт.
Му вылö вольсалöм газет вылö быдöн пукталiс пажун вылö вайöм сёян-юан. Восьтöмаöсь и вöв яя кансер. Сэки страна пасьта начкалiсны вöвъясöс да лавкаясын татшöм вöлöгасö вузавлiсны тшöкыдакодь. Тасянь медсясö и öзйис гажыс. Кодкö вöв моз гöрöктiс, мöд вöтчис сы бöрся. А Витялöн артмис кывбурöн: «Чибö рöдтiс да рöдтiс, миянöдз воис…». Збыльысь, быттьö, вöв табун локтöма. Виталийöс корлывлiм гижны чолöмалана открыткаяс – мича кывъяс сылы сюрлiсны. Но кывбурасьöмсö эз на петкöдлы. Паськыда воссис поэтлöн гижан сямыс сёрöнджык, кутiс йöзöдчыны асланым газетын, республикасаясын. Сэсся кывбур чукöр петавлiс «Сикöтш», «Лöсасъяс», «Уна рöма сикöтш» небöгъясын. 1995, 2006 да 2015 воясын петiсны нин «А ми Войвылын, Комиын олам», «Пожöм кöра войпук», «Юдорын кöч» нимъяс улын асшöр небöгъяс. «Василей» гаж вылын нимöдiсны «Ловзьöдам Войвыв мусö» сылöн кывбур вылö Зинаида Пупышевалöн шылада мича сьылан.
Водз тай эновтiс таладор мусö — мыйта на гижöд эськö козьналiс коми йöзлы.
Шогысла пессьöмöн колисны гöтырыс да нывъясыс. А ме бара вöйтчывла казьтылöмъясö. Армияö мунiгас аэропортöдз колльöдiм ставным редакцияса и типографияса. Вöлi тшöтш невестапуыс, кодкöд локтöм бöрас йитiс олöмсö да нэм помöдзыс нималiсны шуда гозъяöн. Пируйтны Керчомъяö ветлiм бара жö öтчукöрöн.
Кутшöм ылö ставыс кольöма, но нинöм эз вун. И эм мый казьтывны миян ёрт, журналист, поэт, полковник, семьяын бур верöс, бать, ыджыд бать йылысь.

Нина Буткина.
Россияса журналистъяслöн котырö пырысь.
Снимокъяс вылын:
поэтлöн книгаяс, В.В.Уляшев.