Выль во — челядьлöн и верстьöлöн медся радейтана гаж, кодöс виччысьöны быд керкаын. Ми, тыр арлыдтöмъяслöн Кебанъёльса шöрин, виччысим жö да декабр 27-öд лунö петкöдчим ворсöмöн. Ставыс мунiс мичмöдöм коз дорын. Челядь пырöдчисны мойд кодь олöмö гажа сьыланкывъясöн, ворсöмöн, йöктöмöн.Сьöкыдторъяс венöмöн зонпосни судзöдiсны сундукысь козинъяс босьтöм могысь вит ключ. Налы лёк вöчисны Кань-Баюн, Соловей-рöзбойник, Яга-Баба, Васа да Кувлытöм Кощей. Иванушка да Василиса, Кöдзыд пöль да Лым ныв отсöгöн челядь вермисны восьтны сундуксö да босьтны козинъяс, кодъясöс налы дасьтiс Кöдзыд пöль. 
Миян шöрин сьöлöмсянь аттьöалö республикаысь федерацияса инспектор К.В.Шимкоöс да Н.А.Зашихинаöс, Федерациялöн Сöветын республикаöс петкöдлысь Д.А.Шатохинöс, сылы отсасьысь П.А.Молодовскийöс, районлöн администрацияöн веськöдлысь С.В.Рубанöс, «Единая Россия» партиялысь республикаса юкöнöс, асшöр уджалысь М.А.Гунаевöс. Челядьлы козьналiсны магнитнöй конструктор, сенсорнöй лыа, нывъяслы да зонъяслы лего, исласянторъяс, а сiдзжö юмовторъяс. Зэв ыджыд аттьö районса судлы сыысь, мый миян челядьлы бара кутасны воны мича журналъяс. 
Елена ШАХОВА, 
тыр арлыдтöмъяслöн Кебанъёльса шöринысь воспитатель. 
Снимок Олеся Агиевалöн.