Пытшкöсса делöяс кузя министерстволöн районса юкöнын айловъяскöд радын уджалöны и сьöкыдлунъясысь повтöм, лун и вой лоöм-торъяс вылö петны дасьöсь аньяс. Весиг веськöдлöны юкöнъясöн. Виктория Дмитриевна Ракина на лыдын. Сiйö участокса уполномоченнöй да тыр арлыдтöмъяслöн делöяс кузя юкöнса начальник. 
Сыктывкарса öтиöд номера педучилищеын юристö велöдчигöн волiс милицияö практика вылö. Тöдмасис матö став, тшöтш и милициялöн общественнöй безопасносьт служба бердын потребительскöй рынокын закон торкалысьяскöд тыш нуöдан да административнöй законодательство олöмö пöртöм кузя юкöнлöн уджöн. 2005-öд воын велöдчöм помалöм бöрын татчö и бергöдчис. Юкöнса ыджыд сяма старшöй инспектор И.А.Залинаева туйдiс-велöдiс сöмын на босьтчысь инспекторöс. Уджалiс и И.А.Нечаевакöд, кодi сэсся лоис старшöй инспекторöн. Кытшлалiсны лавкаяс, видзöдiсны, мед эз торкавны курыд юанторъясöн вузасьöмын законодательство, мед сёян-юанлöн эз коль урчитан вузалан кадыс, уджалiсны и йöзлöн элясьöмъяс кузя да с.в. Суд приставлöн юкöнса уджалысьяскöд öтув нудiсны «Штрап» паса удж. В.Д.Ракинаöс сэсся асьсö индiсны старшöй инспекторöн. 
2018-öд воын вуджис участокса уполномоченнöй да тыр арлыдтöмъяслöн делöяс кузя юкöнö. Танi уджыс зэв кывкутана. Öд буретш уполномоченнöйяс дорö медводз шыöдчöны олысьяс, лöнь олöм вöсна тöждысьысьяс медводзöн локтöны отсöгöн, найö видлалöны дежуритан юкöнö воöмысь медся уна элясьöм да шы-öдчöм да разьöны гöрöд. Виктория Дмитриевна вöлi участокса старшöй уполномоченнöйöн. Уджö пырöдчыны отсалiс сэки начальник А.Ф.Гуляев да ыджыд сяма уджалысьяс. 2019-öд вося декабр 23-öд лунсянь индiсны начальникöн. Тöдмасис сикт-посёлокса юралысьяскöд, уджалан котыръясöн веськöдлысьяскöд, 
— Юкöнö локтöны томъяс, налы отсасьöны ыджыд сяма уджалысьяс. Зимстанын, Помöсдiнын лöнь олöм вöсна тöждысьöны выль уджалысьяс, Э.В.Лажанев туйдö-велöдö том мортöс Вöльдiнын, кодi велöдчöм бöрын босьтчас учас-токса уполномоченнöйлöн уджö. Талун уджалысь колö Немдiнын. Матö быдöнлöн эмöсь уджалан жыр, телефон, интернет да сы дорö коланаторъяс, машина. Интернетысь юöръяс öтувъя видзанiнысь позьö аддзыны уджын став коланасö, и мортсö и сы йылысь ставсö. Дерт, сьöкыдлунъ-яс эмöсь жö. Югыдъягö локтiс участокса уполномоченнöй, а оланiнöн öнöдз на эз могмöдны, уджалан жыръяс и олö. Сиктъяс ылынöсь öта-мöдсьыныс, уналаын абуöсь керкаяслöн номеръясыс. Öтчыд мунiм Выльгортö да öдва ад-дзим шыöдчысьлысь оланiнсö. Вöлi тöв, кöдзыд, турöбалiс да шыльöдiс ветланiъяс. Туй вылын эз вöв ни öти морт. Собалiм бурпöт. – сёрнитiс Виктория Дмитриевна. 
Аньлöн Даша нылыс велалiс нин, мый мамыс пыр удж вылын. Дзоля дырйи орччöн вöлi ыджыд мамыс, а öнi ставсö нин вöчö ачыс, виччысьö медся дона мортсö. Унаысь волiс пытшкöсса делöяс юкöнö, гöгöрвоö нин, мый уджыс зэв колана да тöдчана, да кöсйö тшöтш лоны полицияса уджалысьöн. 
Марина Дадашова. 
Снимок В.Д Ракиналöн чукöртöмысь