Тöждысьöны вöр-ва вöсна

[ A+ ] /[ A- ]


2013-öд вося февраль тöлыссянь Кулöмдiнса школа бердын босьтчис уджавны челядьлöн вöр-ва дöзьöритан котыр. Ветлöдлöны сэтчö шöр классъясса велöдчысьяс, 10 кымын морт, найö, кодъяс «висьöны» миян вöр-ва вöсна да тöждысьöны сылöн сöстöмлун вöсна, мед быдмисны сэнi джуджыд, пашкыр пуяс да мича дзоридзьяс. Ныв-зон уджалöны теплицаын да петавлöны вöр-ва вылö. Теплицаын эм став колантор, медым туявны пуяс. Челядь сэнi видзöдöны, шуам, пулысь кызтасö, арлыдсö, рöдсö. Велöдчöны «Школьное лесничество» велöдан книга серти. Тайö воясын ныв-зонкöд пыр зiлис Людмила Евгеньевна Уляшева. Колян восянь босьтчис уджавны О.А.Тимушева. Со мый висьталiс Людмила Евгеньевна:

  • Челядькöд нуöдiм зэв интереснöй, аслыспöлöс удж. Миянлы весиг коркö сетлiсны палаткаяс, компас, узьлан мешöк. Ветлывлiм республикаса чукöртчылöмъяс вылö, кодъяс мунiсны некымын лун. Сэнi вöлiны быдпöлöс ордйысьöмъяс. Колiс петкöдлыны кужöмлун уджавны коланторъясöн, тöдмавны азимут, туявны-висьтавны пулысь кузьтасö да судтасö, кусöдны öзйылöм, сетны медводдза медицина отсöг да с.в. 2017-öд воын татшöм чукöртчылöм вылын вермис Анастасия Турьева, 2018-öд воын Светлана Тимушева. Некымын во сайын нуöдiсны снимокъяса конкурс, кöнi колiс дасьтыны удж миян районса кутшöмкö мича инъяс йылысь. Кристина Зезегова гижис Дон ты, Юлия Кучева Носимса мича коз, Анастасия Турьева Асыввож йылысь. Дасьтiсны бур туялана уджъяс.
    Тшöкыда петавлiм улича вылö да висьталiм йöзлы öзйылöмъяс йылысь, выль во водзын öшлiм Паспомын, Донын да Кужйын öлöдана гижöдъяс, мед эз пöрöдны коз. Челядькöд сiдзжö петавлiм ю пöлöнысь идравны лöп-ёг, тöвнас öшлiм лэбачьяслы вердчанiнъяс. Тавосянь витöд классын восьтiсны вöр видзан кружок. Челядь кутасны тöждысьны быдмöгъяс вöсна.
    Зэв нимкодь, мый вöр-ва видзысьяс сэсся водзö мунöны велöдчыны тайö туйвизя велöдчанiнъясö.
    Овлö, челядь петавлöны и вöр-ваö. Сэки накöд уджалö Кулöмдiнса лесничествоысь вöр видзысь да дорйысь инженер А.И.Тотилас. Сылöн батьыс уджавлiс пыр лесхозын да айлов тöдö тайö уджсö. Сылöн юрнуöдöмöн челядь садитöны пуяс, шуам, садъяс, школаяс да казьтылан пас дорö. Петавлöны вöр-ва вылö весавны лöп-ёг, кодi идöртöм йöзöн шыблалöмöн чукöрмылö уна. Алексей Иванович пыр велöдö сöстöма видзны вöр-ва. Пасйö, мый челядь ветлöдлöны окотапырысь. Петкöдчöны конкурсъясын, кодöс нуöдö вöр видзысьяслöн котыр: вöр-ва йылысь гижöны мойдъяс да дасьтöны серпасъяс. Таын шедöдлiсны нин вермöмъяс. Челядьлöн медбур серпасъясысь вöчисны магнита козинъяс да баннеръяс, кодъясöс сувтöдiсны республика пасьта. Кутшöмкö воö вöр видзысьяслöн котыр вичмöдлiс навигатор, фотоаппарат, мерайтан линейка, колана паськöм. Казьтыланаöн колис сiйö, кыдзи во вит сайын катер вылын петавлiсны ю вылö. Вöчисны колана замеръяс. Челядьлы ёна воис сьöлöм вылö татшöм аслыспöлöс уджыс.
    Зэв бур, татшöм туйдысь-велöдысьяс отсöгöн кö школаын велöдчысьяс пиысь петасны збыльысь вöр-ва радейтысьяс-дорйысьяс да сюртчасны тайö туйвизя уджö — вöр овмöсö.
    Галина КЛЮЖЕВА.

Комментарии:

Добавить комментарий

Свежий выпуск: за 19 сентября