Вермысьяс лыдын и миян 
Июнь 30-öд лунсянь июль 5-öд лунöдз Ухта районса Ярегаын ордйысисны республика пасьтаысь кусöдчысьяс. 
Миян районысь петкöдчисны Помöсдiнса 142-öд часьтын уджалысьяс. Алексей Третьяков лоис юкöнса медся бур веськöдлысьöн. Сылöн Геннадий Третьяков вокыс лоис мöдöн «Медся бур кусöдчысь» нимпасын. Котыр, кöнi кык вок кындзи вöлiны Александр Чисталёв да Александр Рагулин, лоис медся бурöн туйвывса лоöмтор бырöдöмын. 

Оз уджавны тахографъяс 
Июль витöд лунö районын уджалiс автомобиля туйяс бöрся видзöдысь федеральнöй службалöн республикаса юкöн. 
Видзöдiсны, кыдзи новлöдлöны йöзöс автобусъясöн, кыдзи ветлöны сьöкта новлысь машинаяс. Казялiсны квайт торкöм. Техника туйö петiс механикöн видзöдлытöг, оз уджавны тахографъяс. Водительяс вылö лöсьöдiсны административнöй торкöм кузя гижöдъяс. Туясьöны, мыйла асшöр уджалысьяс либö веськöдлысьяс оз пыдди пуктыны туй вывтi лючки ветлöм кузя урчитöмторъяс. 

Сöстöммöдiсны ю пöлöн 
Июль 4-öд лунö «Кебанъёль» овмöдчöминын нуöдiсны «Юлöн вöнь» удж. 
Посёлокса народнöй дружина да томъяслöн «Ис-кра» котыр пелькöдiсны Эжва пöл öнса берег. Кольöм воын серти лöп-ёг танi вöлi тöдчымöн этшаджык. Тайö висьталö, мый йöзыс кутiсны ёнджыка тöждысьны кытшалысь вöр-валöн сöстöмлун вöсна. Буретш та вылö и веськöдöма «Юлöн вöнь» удж, медым ышöдны йöзöс идöра матыстчыны да видзны гöгöртас. 

Ёнмöдчöны и челядь, и верстьö 
Кебанъёльса школа дорын вöчисны ён-мöдчанiн. 
Тайö артмис федерациялöн да республикалöн сьöм вылö «Спорт площадкаяс челядьлы» уджтас олöмö пöртöмöн. Вöчисны öдйö, ас кадö. Сувтöдiсны дас тренажёр. Сэтчö öнi волöны ёнмöдчыны и челядь, и верстьöяс.