Тöдмасисны велöдчанiнъясöн

[ A+ ] /[ A- ]


Декабр 18-öд лунö Кулöмдiнса шöр школаö волiсны Сыктывкарса вузъясысь, техникумъясысь да колледжъясысь велöдысьяс, а сiдзжö пытшкöсса делöяслöн да видз-му овмöс районса юкöнъясысь, бурдöдчанiнысь да мукöд уджалан котыръясысь кывкутысь йöз, мед висьтавны 9-11-öд класса велöдчысьяслы, кöнi да кодö позьö велöдчыны.
Медводз Кулöмдiнса да Зимстанса школаясысь психологъяс Анжела Ивановна да Елена Александровна Лодыгинаяс, йöзöс могмöдан шöринысь специалист Сергей Геннадьевич Васильев велöдчысьяслöн юалöмъяс вылö вочавидзöм серти висьталiсны, кодлы кутшöм удж лöсялö.
Райадминистрацияöн веськöдлысьöс вежысь Наталья Анатольевна Левченко висьталiс, мый татшöм аддзысьлöмъяс колöны, мед ныв-зон тöдiсны, кытчö мунны водзö велöдчыны. Юöртiс, мый миян районын колöны шöр бурдöдчанiнлы хирург, акушер-гинеколог, лор, дерматовенеролог, педиатр, психиатр-нарколог, узи вöчысьяс, лабораторияын уджалысьяс, ФАП-са фельдшеръяс да медсестраяс. Пасйис, мый том специалистъяслы, локтасны кö уджавны районö, отсалöны «Земский доктор» уджтас серти. Школаясö колöны биологияысь, роч да йöз кывйысь, литератураысь, химияысь, историяысь, обществознаниеысь, математикаысь, посни классъясöс велöдысьяс, садъясö воспитательяс. Культура юкöнö колöны шылада инструментъясöн ворсысьяс, кружокъяс нуöдысьяс, туризм, музей туйвизь кузя специалистъяс, чужан му туялысьяс, историкъяс, интернетöн да компьютерöн бура вöдитчысьяс. Видз-му овмöсö виччысьöны лысьтысьясöс, шöр инженеръясöс, механикъясöс, бухгалтеръясöс, трактористъясöс, агрономъясöс, зоотехникъясöс, ветеринаръясöс. Вöр овмöсын оз тырмыны форвардер техникаöн веськöдлысьяс, водительяс, рамщикъяс да с.в. Корис том йöзöс велöдчöм бöрын бергöдчыны районö.
Ныв-зонлöн вöлi позянлун шыöдчыны велöдчанiнъяс петкöдлысьяс дорö. Найö висьталiсны кутшöм документъяс колöны пыригöн да велöд-чöм йылысь.
Сыктывкарса торгово-технологическöй техникумысь локтысьяс эз сöмын висьтавны велöдчанiн йылысь, но и петкöдлiсны, кыдзи вöчны сола няньшомысь козъяс да найöс мичмöдны. Таöн найö ас дорас ышöдiсны уна том мортöс.
Том йöз юксисны асланыс мöвпъясöн тайö аддзысьлöм кузя.
Аныбысь Валерия Пименова велöдчö Ручса школаын 9-öд классын:

  • 9-öд класс бöрын водзö кута велöдчыны карын. Пыралi психолог дорö, сёрнитiм. Сiйö висьталiс, мый меным лöсялö йöзкöд удж. Лоис окота мунны физкультура велöдысьö. Ёртася спорткöд, ворса волейболысь. Эм ГТО-ысь эзысь да ыргöн пасъяс. Дерт, татшöм аддзысьлöмъясыс колöны. Оз кö артмы пырны сэтчö, нöшта видла медколледжö.
    Кулöмдiнысь 11-öд класса велöдчысьяс Анастасия Турьева, Данила Голайдо да Юлия Юдина:
  • Ми школа помалысьяс, да тöдам нин кытчö мунам велöдчыны водзö. Бöрйим Россия. Чайта, мый татшöм чукöртчылöмыс быть колö районса грездъясысь том йöзлы, öд буретш танi позьö матöджык тöдмасьны быд велöдчанiнкöд.
    Кулöмдiнса шöр школаысь челядьöс воспитайтöм кузя директорöс вежысь О.В.Ульнырова пасйис, мый школа помалысьяс бöрйöны и Россияса вузъяс. Нимкодь, мый кодъяскö да локтöны чужанiнас бöр.
    Эскыссьö, мый чукöртчöмыс отсалiс, том йöз бöрйисны аскиа олöмö колана туйвизь.
    Галина Клюжева.
    Снимок вылын: вöчасьöны сола няньшомысь.

Комментарии:

Добавить комментарий

Свежий выпуск: 28 марта

Осторожно — мошенники!