Ми, сиктса челядь, школаысь гортö воöм бöрын зэв зiля уськöдчывлiм кильчö стенмö öшöдöм пошта куд дорö. Öд сы мында выльтор позис тöдмавны сэтчö сюйыштöм газет-журналысь. Весиг торъя альбомъяс лöсьöдлiм, чукöртавлiм-клеитавлiм сэтчö торъя серпасъяс да уна рöма фотографияяс судзöдöмторъяссьыд. Телевизоръяс эз вöвны, а воöмторъясыд вöлiны ыджыд мирас öдзöснас. Пошта новлöдлысьтö каръясад он казяв, а сиктад пыр и шыбитчö синмад: пыр котöрöн быд оланiн зiльöны кытшовтны сёр рытöдз. Миянладорын поводдяыд абу Канарыын кодь, кöнi вонас куимсё гöгöр луныс кымöртöм и пыр довъялö шондi. И шляча зэрыд, пидзöсöдз лымйыд и сук няйтыс чизыр асыввой тöлыскöд пöтмöныс видлаласны тэнсьыд вын-эбöстö. Ме пыр жалитлi пошта новлöдлысьясöс, öд быд керкаö волiс 3-4 газет да мöд сы мында журнал, ог нин лыддьöдлы помтöм письмö-открыткасö. И ставсö тайöс колiс öшöдны пельпом вылö да гöнечöн рöдтыны лыддьысьысь дорö. Öнi, дерт, сы мындатö некод нин оз судзöд: курччасьöны донъяс да и телевизорыд интернетыдкöд ассьыс пайсö пуктiсны. Но пошта новлöдлысьяслöн таысь уджыс эз чин — коми газетыд уна на воö Эжва йылад да и быдсикас отсöгыс тшöтш: йöзлöн корöм серти сёян да унапöлöс тöвар: песок, пызь, кансеръяс, кампет-печенньö да уна мукöдтор.
Наталья Михайловна Уляшева (Чернякова) сöмын квайт во на и уджалö Пожöгын пошта новлысьöн, но йöзыслы воис нин сьöлöм вылас. Тайö водзмöстчысь аньыс пыр кытчöкö тöвзьö-нöбалö: то дасьтысьöмаöсь «Визув шор» котырыскöд да кытшлалöны районса сикт-грездъяс концертъясöн, то школаын петкöдчö-отсасьö нуöдны кутшöмкö гаж… Кöть и зэв колана морт пошта новлысьыд быд керкаын, удждон кузяыс тайöс он шу, вывтi жö нин сiйö ичöтик. Вот сэсся и поньтась семьяыдкöд тайö сьöмнас.
Гижöд да снимок Владимир Шомысовлöн.