Апрель 15-öд лунö 90 арöс тырöм пасйис Тимшерысь Константин Никифорович Оборин. Чолöмавны волiсны «Тимшер» овмöдчöминса юралысь В.А.Белова, социальнöй уджалысь М.И.Костровская, олöмаяслöн котырöн веськöдлысь Г.Н.Паршукова, отсасьысь Г.А.Созонова. Чолöмалöмысь кындзи кыпöдiсны лов сьылöмöн. 
Константин Никифорович чужис Новосибирскын уна челядя семьяын. Дас кык арöссянь Казахстанын вöлi сакар вöчан заводын дежуритысь слесарöн. Львовын веськöдлiс троллейбусöн. Великöй Отечественнöй война дырйи воштiс батьсö да куим вокöс. Валентина Николаевна гöтырыскöд тöдмасисны Львовын. Öтув олiсны 66 во. 
Коми республикаö веськалiс лöсьöдчытöг — ёртыс нуöдiс кылöдчыны. Удждон босьтöм бöрын усисны шемöсö: татшöм уна сьöмсö Львовын эз аддзывлыны. Став семьянас локтiс миян районса Ярашъюö. Константин Никифоровичлöн видзöдлас вылö, Комиын йöз шаньöсь. 
Нэмсö уджалiс кылöдчанiнын, бöръяпомыс дорччис да пöрöдчис. Öнi олö Юрий пиыслöн семьякöд. Сiйöс кытшалöны тöждысьысь посни челядь. 

Валентина БЕЛОВА, 
овмöдчöминса юралысь. 
Тимшер.