Сентябр 30-öд лунсянь Пожöг вожын мургöны-уджалöны экскаватор, грейдер, шыльöдан-топöдан каток да ыджыд машинаяс. «Туйяс кутöм» контракт серти тулысын ыдж-ыд ваöн босьтлöм да тшыкöм туй юкöнъяс лöсьöдны видзасысь торйöдiсны содтöд сьöм. Туй вöчан да дзоньталан Кулöмдiнса юкöнлöн юрсиктса да Помöсдiнса бригадаяс лöсьöдöны Пожöг овмöдчöминса сикт-грездъяс костысь юкöнъяс. Великопольеын да Пожöгдiнöдз туй костын вомöныс сюйисны 9 метра кузьта кык труба, кодйисны пöлöныс. Пожöгын подстанция дорын лэптiсны туй веркöссö, туй пöлöныс пуктiсны труба. Тайö вожын олысьяс уна во нин мырсисны Улыс Ярашъю да Кырныша туй костöн. Лöсьöдöны и сэтi. Кодйисны пöлöныс, лэптiсны веркöссö, ваялiсны кöжа.

• Туй вöчöм-лöсьöдöмыд некор оз эштыв. Öти воын дзоньталам öтилаын, мöдын – мöдлаын. Лöсьöдiм и Вöльдiн сайын ваöн босьтлöм туй юкöн. Пожöг вожын уджалам на, — сёрнитiс мастер Юрий Алексеевич Чисталёв.
  Юрсиктсаяс уджалöны сэнi олöмöн. Зiльöны ыджыд сяма водительяс Иван Владимирович Липин, Николай Николаевич Попов, Александр Владимирович Ведерников, экскаваторöн Борис Павлович Шахов да Иван Фёдорович Попов, грейдерöн Василий Иванович Тимушев, катокöн – Николай Иванович Булатов, сöвтчö Александр Петрович Тимушев.
• Ёна нин виччысим туй вöчöмсö. Менам 62 велöдчысьысь 40-ыс Улыс Ярашъюысь да Великопольеысь. Автобусыс Пожöгса школалöн, сiйö и вайö-нуö челядьöс да велöдысьясöс. Кор туй лолiс шогмытöмöн, кодi кыдзи кужис, сiдзи и воöдчылiс, вайлiсны и бать-мамыс асланыс машинаöн. Овлiс, мый сибдöм автобуссö кыскылiсны тракторöн. Кыдз нö юр оз вись челядь да налöн дзоньвидзалун вöсна. Эскыссьö, и водительяслы кокниджык лоö уджавны, новлöдлыны челядьöс, и бать-мам оз кутны шогсьыны асланыс быдтасъяс вöсна, — висьталiс Ярашъюса школаöн веськöдлысь Галина Петровна Шабельникова.
• 2018-öд восянь, юравны босьтчöмсянь, быд во на волывлiсны быдсяма комиссияыс, весиг министерствосянь. Видзöдалiсны-донъялiсны, кöсйысьлiсны. Дерт, лöсьöдалiсны, но туйяс эз бурмыны. Кольöм воын вöчöмасö вожöдiс кузя зэрöм. Овлiс, мый туйö эз петав йöзöс новлöдлысь автобус. Велöдчысьясöс öтарсяньыс вайлiс öти автобус, собисны шогмытöминсö, а мöдарас вочаавлiс мöд автобус нин. Таво туй вöчысьяслы мойвиис мича лунъясöн да кос арöн. Кыпалiсны ловнаныс олысьяс. Но уналаын нин шылялiс-рассялiс туй пöлöныс, ва оз мун. Бур, водзö кö кутасны унджык сьöм торйöдны туйяс дöзьöритöм вылö, мед позис ветлыны во гöгöр чöж, — тöдчöдiс Пожöгса юралысь Зинаида Егоровна Попова.
  Марина Дадашова.
  Снимок Родион Дёминлöн.