Томдыркöд аддзысьлöм

[ A+ ] /[ A- ]

Июль 6-öд лунö аддзысьлiм Керчомъяса школаысь 10 «а» класс 50 во сайын помалысьяс. Сэки ми вöлiм 26-öн. Дас öти во öтлаын велöдчим Елена да Агния Золотарёваяс, Вера Нестерова, Лина да Полина Поповаяс, Ида да Нина Самаринаяс, Клавдия Гилева. Миян кытшö колис сöмын öти зон — Николай Лютоев, кодi локтiс аддзысьлöм вылö Рязань карсянь кык сюрс верст сайсянь.
Аддзысьлiм куим лун чöж, но сёрниным эз бырлыв, век ставнымлöн вöлi висьталантор, öд бöръя паныдасьлöмсянь колис нин вит во.
Медводдза лунö чукöртчылiм Ида да Нина Самаринаясын. Казьтывлiм школаын велöдчан кад, вöвлöм велöдчысьясöс, велöдысьясöс. Нолевöйсянь нёльöд классöдз велöдiсны Вера Николаевна Пономарёва да Анна Андреевна Попова. Гырысьджык классын велöдчигöн миян котырöн веськöдлiс Владимир Арсентьевич Кузнецов, 10-öд класс помöдiс Лидия Фёдоровна Шувалова.
Сiдзжö бур кывйöн казьтылiм Ольга Александровна Воробьёваöс, Анна Андреевна Кочановаöс, Геннадий Павлович Золотарёвöс, Анна Васильевна Самаринаöс, Александра Петровна Игнатоваöс, Алексей Степанович да Нина Дмитриевна Тимушевъясöс, Энгельсина Дмитриевна Тарабукинаöс, Ольга Евгеньевна Гичеваöс, Анна Ивановна да Николай Михайлович Поповъясöс, Анатолий Михайлович Оглоблинöс, Иван Степанович Самаринöс, Агния Степановнаöс. Ыджыд аттьö, муöдз копыр тiянлы, дона велöдысьяс!
Тайö рытыс колис кыткö серамсорöн, кыткö синвасорöн. Ёна гажöдiс аслас мыла, небыд гöлöса сьыланкывъясöн да мича шылада гудöкнас Лина Попова. Рытывбыд шмонитiсны керкаса кöзяйкаяс Ида да Нина. Найö петкöдлiсны медводдза классö мунöм, сöмын öнiя кадся паськöмöн: сьöд платтьö, еджыд фартук да воротник, юрси вылын еджыд тугъяс. Пасьтасьлiсны и француженкаясö. Сьöлöм бурмытöдз сералiм, шойччим, нимкодясим.
Мöд лунас ветлiм кывтыдса да катыдса шойнаяс вылö, волiм класса вöвлöм велöдчысьяслöн да велöдысьяслöн гуяс вылö. Шойна вылö мунтöдз чукöртчим кык судта школа дорö, пыравлiм вöвлöм нолевöй классаным. Казьтыштiм, кыдзи ыджыд переменаяс вылын ворслiм кытшöн ветлöдлöмöн «броса кöдзöм», «самöвар», «красное звено», «скачет в поле воробей» ворсанторъясысь. Век ворсöдлiс А.А.Попова, öнöдз эг вунöдöй сылысь мича ён гöлöссö. Аттьö Эльвира Ивановналы, кодi восьтлiс да лэдзис пыравны, кöть вöлi шойччан лун.
Тайö чукöртчылöмыс сетiс кыпыд олан ру, быттьö бара волiм челядьдырся кадö. Ыджыд аттьö Ида да Нина Самаринаяслы воча мунöмысь, гортаныс чукöртлöмысь. Дерт, вöлi бурджык, аддзысьлöмыс кö мунiс школаын, сэки позис и кытшнад ворсны, и «Ладатö» да «Манжероктö» йöктыны. Аттьö Елена Золотарёвалы, кодi век öтувтö миянöс, корсьысьö, кытöнi, кыдзи, кор нуöдны аддзысьлöм.
Дыр на кыпöдас ловнымöс томдыркöд аддзысьлöмыс. Мед Енмыс сетас дыр на овны да бара на отсалас паныдасьлыны вит во мысти.
Елена Рокотянская.
Носим.
Гижысьлöн снимокъяс вылын: школа помалöмсянь колис 50 во.

Комментарии:

Добавить комментарий

Свежий выпуск: за 9 июля