Робототехника, 3Д принтеръяс, сiдз шусяна, «сенсорнöй» пызан, серпасасян планшетъяс, пызан вылын ворсанторъяс да мукöдтор челядьлы и верстьöлы ёна воисны сьöлöм выланыс. «Культура» национальнöй бала серти Кулöмдiнын челядьлы öнiя кадся тайö библиотекасö кыпыда восьтiсны кольöм вося декабрын. Став уджыс танi нуöдсьö компьютер отсöгöн. Библиотекаса уджалысь Августа Владимировна Мишарина висьталiс, мый выльторъяс пыртöмыс нöшта на ёнджыка йиджтас книгаяс дорö муслун. И колö пасйыны, мый воддза вояс серти тöдчымöн содiс лыддьысьысьяслöн да велöдчысьяслöн лыд.
Январса каникулъяс дырйи лыддьысянiнын уджалысьяс котыртiсны выставкаяс, нуöдiсны Выль вося да Рöштвоса ворсöмъяс, петкöдлiсны мультфильмъяс. «Литератураса геройяслöн выльвося лоöмторъяс» ворсöмын челядь вайöдiсны тöд вылö Анна Казалислöн книгаясысь геройясöс, тöдмасисны выль петасъясöн, вöчисны комиксъяс.
Татчö робототехника кружокö волывлöны и районса челядь. Неважöн на Кебанъёльса, Скöрöдумса велöдчысьяс тöдмасисны Ботли да Мататобот роботъясöн, вöчисны экспериментъяс да дасьтiсны роботъяслы уна сикас тшöктöм. Татшöм выльторъясыс сöвмöдöны мöвпалан сям, öтувтöны ворсысьясöс.
Пожöгысь киподтуя йöз велöдiсны вöчны вурунысь чачаяс, брошкаяс да мукöдтор.
Я.Л.Ларри гижысьлöн 120-öд вося тшуöда пас кежлö интерактивнöй панельöн нуöдiсны «Ыдждöдысь стеклö пыр кытшалысь мир» ворсöм.
Лыддьысянiнö волiсны Кулöмдiнса школаысь медводдза классын велöдчысьяс, кодъясöс тöдмöдiсны мультфильм вöчöмöн, а сэсся видзöдiсны да серпасасисны. Волiсны омöля аддзысь либö кылысь челядь. Налы гырысь клавиатураа компьютерöн позьö вöчны урокъяс кежлö гортса уджъяс. Медым бурджыка кывны, эмöсь торъя аппаратъяс. Омöля аддзысьяслы эмöсь чуньясöн лыддян книгаяс. Коррекционнöй школаса челядьлы дасьтiсны торъя уджтас: лыддьысьöны, серпасасьöны, сёрнитöны книгаяс йылысь.
Лыддысянiнын кывкутöмöн нуöдiсны тöдчана пасъяс кежлö удж. Февраль 15-öд лун — Афганистанысь миян войскаясöс петкöдан лун. Февраль дасöд лунö волiс Василий Николаевич Мингалёв, йöз му вылын служитысь сёрнитiс нывкаяскöд да зонкаяскöд. Вöлiны челядьлысь енби сöвмöдан районса керкаысь И.Ю. Симпелевалöн «Домисолька» да «Хозяюшка», Т.А.Кочановалöн «Фантазия», Л.Н.Кирушевалöн «Родничок», О.А.Кузнецовалöн «Истоки» котыръяс. Найö сьылiсны, тöдмасисны война йылысь выль книгаясöн, öти здук чöла казьтыштiсны усьöмаясöс, бöрынджык юисны чай. Аддзысьлöмыс мунiс кыпыда да ставныслы воис сьöлöм выланыс.
Февраль 18-öд лунö висьталiсны Россияса армиялöн артмöм йылысь, челядь окотапырысь пырöдчисны викторинаö.
Февраль 21-öд лунö пасйисны Чужан кывлысь ставмирса лун. «Анбур» ворсöмын челядь тöдмалiсны ребусъяс, вуджöдiсны кывъяс.
Библиотека кутö топыд йитöд и садса челядькöд, ветлiсны медводдза номера садйö да нуöдiсны «Соломония Пылаева баб ордын» ворсöм, тöдмöдiсны книгаясöн. Эскöны, мый поснияс локтасны лыддысянiнö, медым тöдмасьны выльторъясöн, велöдчыны унаторйö.
Февральын кык лун чöж ичöт класса велöдчысьяскöд мунiс ыджыд удж: висьталiсны, кыдзи вöчöны мультфильмъяс, а сэсся А.Л.Бартолöн «Мач» кывбур серти серпасасисны, лыддисны, ставсö снимайтiсны да артмис мульфильм. Гырысьджыкъяскöд вöчасны война йылысь «Медаль» кывбур серти да сиасны Победалöн лун кежлö.
Март панасын челядь лыддысянiнын бара на нуöдiсны быдмысь войтырлы «Ловъя классика» районлöн тшупöда конкурс. Сикт-грездъясса кöкъямыс школаысь петкöдлiсны сям проза лыддьыны радейтысь 15 быдтас, а ставнас волiсны 30 сайö видзöдысь.
Лыддысянiнö волiсны вермытöмъяс, кодъясöс тöдмöдiсны выльторъясöн. Медся ёна сьöлöм выланыс воисны «сенсорнöй» пызан да интерактивнöй панель. Велöдiсны донöдöм кöртöн серлöдлыны пöв, волысьяс вöчисны мамъяслы козинъяс.
Нуöдiсны виртуальнöй экскурсияяс велöдчысьяслы, тöдмöдiсны Кулöмдiн районöн, В.Т Чисталёвлöн чужан керкаöн, Джеджимса лыддьысянiнöн. Сы кежлö дасьтысигöн уджö пырöдчисны библиотекаса методистъяс, шöр библиотека бердын юöръяс босьтан шöринысь специалист Андрей Валерьевич Стрельников да мукöд. Унаторйöн отсалiс Константин Леонидович Попов. Öнiя кадся библиотекалысь уджсö видзöдiсны велöдысьяс да «Коми войтыр» öтмунöмö пырысьяс. Августа Владимировна да лыддьысянiнса уджалысьяс окотапырысь вочаалöны быдмысь войтырöс да верстьööс, выльторъяс отсöгöн велöдöны радейтны лыддьыны книгаяс. Ми тöдам, мый уджыс оз ло весьшöрö, и танi челядьлöн олöмыс пуö.
Нина Калистратова.
Снимок интернетысь.