Ми, Ыджыдвидзса ветеранъяс, зэв водзмöстчысьöсь. Унатор удитам вöчны во чöжнад: аддзысьлыны мукöд сиктса олöма йöзкöд, сёрнитны велöдчысьяскöд, чукöртны тылын уджалысьяслысь казьтылöмъяс да уна челядя мамъяс йылысь гижöдъяс, гожöмнас кытшовтны сиктсалысь öшинювъяссö да бöрйыны медмичасö, субботникасьны, петкöдчыны фестивальясын. Да та кындзи нöшта на мыйта ог вöчöй – миян, ветеранъяслöн сöветö пырысьяслöн – отпускыд абу.

А таво куим тöлысь ме коддьöмыс эг ветлöй весиг Кöрткерöсöдз ни Сыктывкарöдз. Туйсö тупкысьнас лоис коронавирус. Öти олöма нывбаба лавкаын ньöбасигас весиг юалöма вузасьысьлысь: «Оз на тайö карнана висьöмыс помась?»
Дерт, таысь некодлы абу нимкодь. Ми сы мында урчитлiм вöчны 2020 воас, да став уджсö торкис тайö «карнана» висьöмыс.
Со воис виччысяна гожöм. И сiйö на ёна тшыкöдiс нервъяснымöс. Кольöм воын гожöмбыд зэрис, а таво сэтшöма косьтiс, градъяс вылын муыс потласис пустыняын моз. Да и кöдзыд на вöлi мый дыра.
Со и виччысь гожöмтö… А öд и тулысыс кутшöм вöлi! Ойдлiс сы выйöдз, мый йöзыс весиг оз и помнитны та ыджда ытвасö.

Но став тайö сьöкыдлун вылас видзöдтöг колö овны водзö. Эг вермöй пасйыны май 9-öд лун, но июнь 22-öд лунö ветеранъяс дзоридзьясöн волiм обелиск дорö, казьтыштiм, кымын морт мунiс война вылö, кымынöн эз локны бöр. Татшöм вир кисьтана войнаыс некодлы – ни миянлы, ни миян ныв-пилы, внукъяслы, правнукъяслы – оз ков. Колö водзö бурмöдны тыр-бур олöмсö, медым том йöзлöн вöлi удж и оланiн, медым найö лöсьöдiсны семьяяс, быдтiсны сяма ныв-писö.
Уна во нин миян ветеранъяслöн сöветöн веськöдлысь Юлия Михайловна Попова мöвпалiс нуöдлыны миянöс Дон ты дорö. И со сылöн кöсйöмыс збыльмис. Аслас машинаöн сэтчö миянöс катöдлiс сöветö пырысь Михаил Пантелеймонович Игушев, быдторйын водзмöстчысь морт. Миянкöд тшöтш ветлiсны и одыбсаяс, юрнуöдiс наöн сэтчöс ветарнъяслöн сöветö пырысь Лидия Михайловна Михайлова.

Кык машинаöн дас кык ветеран июль 3 лунö водз асывсянь петiм ылi туйö Кулöмдiн районö. Поводдяыс мичмыштiс да шондöдiс.
Менö ёна шензьöдö Кулöмдiн районыс. Кымын енбиа да ыджыд сяма морт петiс сэтысь: кывбур гижысьяс, мичасьыс-мичаа сьылысьяс, серпасасьысьяс, сюсь велöдысьяс да велöдчысьяс. Уна буртор позьö босьтны коми йöзлы тайö районсьыс. Эжва йывса сиктъясын да грездъясын син водзын бурланьö кыпöдчö олöмыс.

Асывсяньыс медвойдöр кытшовтiм-тöдмасим юрсиктнас, ставным снимайтчим обелиск дорын, сэсся культура керка водзын. Сиктыс Эжва юбокса мылькъяс вылын, да туйыс кайö то вывлань, то лэччö увлань.
Дас вит километр мунöм бöрын воим Дон сиктö. Сiйö петкöдчис миянлы гажа мича керкаясöн, нöрысъясöн. Велöдчанiныс сулалö кыр йылын. Коркö вöлöма шöр школаöн, сэсся öкмыс классаöн, а öнi велöдöны сöмын ичöтъясöс. 5–11 классаясöс автобусöн новлöдлöны Кулöмдiнöдз.

Школаас жö меститчö и ветеранъяслöн жыр. Сэнi миянöс зэв лöсьыда вочаалiсны, виччысисны пöсь тшайöн да чöскыд пöжасöн. Тöдмасим пызан сайö пуксьöмöн нин. Найö ас йывсьыс висьтасисны, и ми тшöтш ошйысим, кыдзи олам. Ыджыдвидз йылысь юöртiм и.
Донын бура котыртöмаöсь ветеранъяслысь уджсö. Веськöдлö котырнас коми ань Нина Анатольевна Петрова. Шензьöдiс мичнас öти стенö öшлöм почёт грамотаяс, ошкана гижöдъяс. Аттьöалам Донса ветеранъясöс миянöс бура вочаалöмысь да корам найöс волыны тшöтш и миян сиктö.

Кыпыд сёрниным эз на эськö помась, но миянöс виччысис нин сиктас музей кутысь Василий Степанович Павлов. Миянлы, сиктса йöзлы, музейын ставыс зэв ёна кажитчис. Ачыс керкаыс 1892 вося, пöльыс на стрöитлöма. Керкасö и став эмбурсö сэсся мырддьывлöмаöсь, батьсö 1937 воын пуксьöд-лöмаöсь дас, а мамсö – куим во кежлö. Абу жалитöмаöсь и налысь нёльнан челядьсö.
Музейсö Василий Степанович босьтчöма лöсьöдны 2011 восянь, öнi пöльыслöн керка вылысь позьö аддзыны «Музей «Купеч Митрей керка» гижöд. Мыйсö сöмын абу чукöртöма сэтчö, и ми быттьö веськавлiм важ олöмас. Асьным кöть абу нин томöсь, но унатор, вöлöмкö, ог на жö тöдöй. Со шушун. Василий Степанович висьталiс весиг, паськöмсö кö пö вурöма шабдiысь, то морт пытшкысь став паразитыс пышйö. Кöтiтö аддзылiм и. Эм и «Зингер» машина, жынняныс зэв уна сикöс. А сараяс кымын пöлöс пила. Да мукöд инструмент, ми öнi ог нин и тöдöй найöс.
Ставсö, мый чукöртöма музеяс, аслыд колö видзöдлыны. Ми тай ёна и шензим-а. И Василий Степанович вылö мöд синмöн нин видзöдлiм: сиктысь петöм мортлöн сы мында сямыс. Аттьö сылы сэтшöм бур музей лöсьöдöмысь.
Бура дыр шензьöм бöрын машинаясöн воöдчим Дон ты дорöдз. Дас вит минут кымын ковмис мунны. А ты дорас виччысисны нин мотора пыжъясöн. Ми веськалiм сöвны Александр Марсович Напалковлöн пыжö. Пыр жö тшöктiс пасьтавны жилетъяс. Уна во нин миян абу ветлыссьöма мотора пыжнад. Бур, мый поводдяыс вöлi мича. Лöнь ты кузя лöсьыд вöлi «лэбнытö».
Дон тылöн кузьтаыс – 17 километр. Кыдзи нö он шензьы! Мунiгас мотористным кыйис на и чери: тiянлы пö юква вылö. Рыбинспекторöн и быдöн повзьöдлiс, но менам пö став кабалаыс эм – ветлыны мотора пыжöн, и кыйны чери. Чери кыйигмозыд мунiм 40 кымын минут.
Вайöдiсны миянöс зэв гажа шойччанiнö. Кыр йылын кузь пызан, пуклöсъяс, эм весиг качай. Позьö ломтыны пывсян, лöсьöдöмаöсь узьланiн.Василий Степановичлöн зiльлуныс, тэрыблуныс тöдчис быдлаын. Оз бара ков мунны шойччынытö кытчöкö бокиö да ёна ылö. Танi и лолыд шойччö сöстöм сынöдсö апалiгöн. Мед кöть и номъясыд миянöн чöсмасисны. Резсян да-й, быдсямасö, майбыр, вузалöны. Ты вылас быдмöны ыджыд коръяса дзоридзьяс.
Бипур вылын пуим юква, самöварöн (сэнi пö чайник дорсьыд ёна чöскыдджык артмö) пузьöдiм чай. Сэсся ворсiм, сьылiм, сералiм пöттöдз, ветлöдлiм вöрöдыс. Абу зэр-лöма да, тяпиöн позис шöйтны кыз пожöмъяс косттi. Вöлi тыр тöлысь да любуйтчим сыöн – эг и тöдлöй, воис вой шöр кад. Узигкежлö жырйын этшаник пескöн ломтылiсны кöрт пач. Сöстöм сынöдыс öдйö и вайис унтö.
Войясыс öнi югыдöсь. Кык час гöгöрын нин петö шондiыд. А кадыс! Öткымын зiль нывбаба эз и водлыны, югыд да пыр гажöдчисны, варовитiсны бипур дорын. Ми пö эг и тöдлöй, кыдзи кольис войыс. Номъяссö пö вердыштiм, мед тiянöс оз курччавны.
Мöд луныс заводитчис сiдз жö гажаа. Бипур вылын юыштiм пуöм чай да бара на варовитiм дугдывтöг. Ог öд татшöмасö тшöкыда аддзысьлöй.
А узигкостi Василий Степановичыд миянлы козин на дасьтöма: ыджыд дозйын вайöма сапропель – бурдöдчан няйт. Сук мусир кодь дзик, сöмын абу дука. Дон тыыс заптылöма сiйöс миянлы. Сунис йылö öшöдöм гайкаöн колö сöмын видзöдлыны, шогмас оз бурдöдчанторыс тэныд. Аттьö татшöм козинсьыд!
Пажын кежлö бипур вылын пуим шыд. Ок и чöскыда ставным панясим!
Кадыс öдйö и колис. Ковмис чукöртчыны – лöсьöдчыны бöр туйö. Да и кымрасьны кутiс: тырмас пö тiянлы весь овны-гажöдчыны, сиктсаыдлöн и гортас уджыс тыр.
Луншöр бöрын бара сöлiм мотора пыжъясö, Александр Марсовичыд волiс миянла. И бара на шензьöдiс. Важöн нин ты вылас öтилаын веськыд туй вöчлöмаöсь, куим километр пыдди пö сэтi мунан сöмын öтиöс. Кияснад пö эн кутчысьöй пыж бокъясас – и мунам веськыда. Збыльысь, кутчысим кö, топыда эськö кустъясыс вачкалiсны кияснымöс. Нöшта веськыдалiгас аддзылiм сабельник. Вель уна сiйö берегас быдмö.
Веськыдатö машинаясöдз воим кызь вит минутысь öдйöджык. Воигкостi зэрмис, ёнакодь и киськалiс миянöс енэжсяньыс. Гымалыштiс на неуна. А миянлы нимкодь, мый донсалысь муяссö тшöтш кöтöдыштiс. Туй кузя мунiгöн нин казялiм, мый öтилаясын зэрöма ва гуранъясöдз, а мукöдлаас асфальтыс дзик кос.
Ыджыдвидзö воим куим час бöрын. Ветлiгкостi и танi зэрöма, кöтöдöма миянлысь градвыв пуктаснымöс. Тшöтш талы нимкодясьыштiм.
Долыд чужöмъясöн пырим асланым гортъясö. Ставнымлы сьöлöм вылö воис Дон ты вылö ветлöмыс.
Висьталам аттьö Василий Степанович Павловлы да сылöн отсасьысьяслы, а сiдзжö Лидия Михайловна да Иван Васильевич Михайловъяслы татшöм бур шойччöмсö котыртöмысь да унаторйöн тöдмöдöмысь.
Анна Попова,
Ыджыдвидзса ветеранъяслöн сöветö пырысь.
Снимокъясыс Юлия Поповалöн.