Пожöг вожын бара шöйтö-ветлö ош. 
Улыс Ярашъюын öти ань мошкоритчис град йöрас. Керкакöд орччöн — ыжъяслы йöртöд (видзö кызьöс). Сэккостi посёлокö гусьöн пырöма ош. Кортöм гöсьтлысь воöм некод эз тöдлы ни эз аддзыв. Коркö казялiс суседкаыс да звöнитiс аньлöн нылыслы, тiян гараж дорын пö виччысьтöм гöсьт. Сiйö горöдiс мамыслы. Кылiсны и посёлоксаяс. 
Ань котöртiс видзöдлыны, а ош — йöрын нин. Чукöртöма став ыжсö öти пельöсö, нюжöдöма лапаяссö. Зэв бура позис аддзыны вит кымын сантиметра кузьта гыжъяс. Мортысь эз повзьы. Локтiсны айловъяс. Керка йöрын вöлiны пыкöдъяс, да лыйлiсны наöн, но яндысьтöм пемöс быттьö гöгöрвоис, мый лёкыс сылы таысь оз ло, да эз весиг гыжйыштчы. Öти айлов петiс пыкöдöн жö. Ош, буракö, чайтiс, мый мортыс ружьеа, да вöлисти петiс йöртöдысь, котöртiс гаражлань да бергöдчис посёлокö. Локтiс челядьлöн ворсанiнö, кöнi буретш вöлiны кык зонка. Öтиыс котöрöн мунiс гортас, кодi сулалö матын, а мöдыс дзебсис ичöтик ворсан керкаö. Бöрыннас ошйысис, аддзылi пö збыльвывса ошкöс. Зонка дзоля на, тыдалö, эз гöгöрво, мый 
вермис суны ыджыд лёк. Ошлы ворсанiнын чöсмасьны нинöм эз сюр да чеччыштiс орчча йöрö. Сэнi буретш ывла вылын öшлiс кöлуй ань. Сiйö кынмывлiс повзьöмысла. Шöйтысь пемöс бöр чеччыштiс потшöс вомöн да петiс посёлокысь сiйö жö туйöдыс, кытi локтiс. 
— Посёлокса лавка стенмын öшалö видеокамера. Сiйö и гижис кортöм гöсьтлысь волöмсö. Зэв бура тыдалö, кыдзи сiйö бöрыньтчöмöн öдöбöн пырис ыжъяс йöртöдö. Эг кö удит петны, ставсö эськö пачесайтiс. Кый-сьысь айлов висьталiс, мый ошлы ар куим-нёль. Ёна повзи, кор казялi сылысь кузь гыжъяссö, аддзи лёклунсö. Воддза воын ош волiс нин, нуис менсьым кык ыжöс. 14-öс ёна дойдалiс, ковмис начкыны. Гожöм да, ыжъясöс лэдзам ывлаö. Öнi ставöн луннас öта-мöдöс вежлалöмöн кыйöдам ошкöс, мед, локтас кö посёлокö, кыпöдны йöзöс да вöтлыны кортöм гöсьтöс, — висьталiс ань, кодi видеогижöдсö пуктiс интернетö. 
Ошкöс аддзылiсны и Вылыс Ярашъюын. Öти ань öшинь пырыс казялiс посёлокö пыран туй бокын сулалысь гараж сайысь ошкöс. Сiйö туплясьыштiс турун пиын да мунiс градъяслань, öти семьялысь талялiс картупель мусö. Ярашъюö машинаöн локтысь кык зон туй вылысь казялiсны ворсысь кык ошпиöс. Сувтiсны да, кöть эськö дзик оз позь, чöсмöдлiсны чипсыöн. Ваткыльяс тулыссянь шöйтöны Великопольеса шойна вылын. Йöз сэтчö волiгöн казялiсны налысь кодйысьöмъяс. Ошъяс бурпöт номсасисны Троича лунö волысьясöн крестъяс вылö кольöм юмовторъясöн. Гыжъясьöмысь-зыртчöмысь весиг пöрласис потшöс, айловъяслы ковмис сувтöдны выльысь. 
Неважöн ош пыравлiс Польеö. Видзöдöмпырысь, йöзысь ньöти оз пов. Мудйысьысьяс вылö видзöдiс потшöс дорö кыккокйыв сувтöмöн. Пыравлiс ыжъяс видзан йöрö, öтилысь парсалiс ныр-вомсö.
Котöртöдiсны-повзьöдiсны тракторöн да машинаöн 
тутсöмöн. Пожöг вожын сикт-грездъяс öта-мöдсьыс матынöсь. Йöз тшöкыда ветлöны подöн. Ёна вотчöны. Тусь-вотöс чукöртiгöн кö тапнитас пельпомöдыд? А бара кö локтас челядьлöн ворсанiнö? Код тöдас, мый юрас кывтöм пемöслöн: оз сюр номсасьны ыжъясöн да, оз-ö уськöдчы асьнысö дорйыны вермытöм челядь вылö? Бöръя волiгас кöть и повзьöдiс посёлоксаясöс, но шаня мунiс вöрö. А кутшöмöн лоас аски? Мый сыысь виччысьны? 
Марина Дадашова.