Талун Зимстанын

[ A+ ] /[ A- ]

*Зимстан котыртчис 1931-öд воын, кор татчö вайисны мыжтöг мыждöмаясöс. Соль ю дорын, öнiя посёлоксянь кык километра ылнаын, айловъяс босьтчисны заптыны вöр. Öнi сiйö иныс шусьö Важ Зимстанöн. Важ Зимстан пырис Керчомъяса сиктсöвет улö. 50-öд вояс пансигöн олысьяслöн лыд кутiс ёна содны. 70-90-öд воясö посёлокö овмöдчисны матысса грездъясысь коми йöз. 1976-öд вося декабр 28-öд лунö Зимстан лоис Пруптса сиктсöветлöн шöринöн. 
*Талун «Зимстан» овмöдчöмин улö пырöны Зимстан, Лöгинъяг, Климовск да Фроловск. Посёлок сулалö Прупт ю вылын. Овмöдчöминын артавсьö 1993 олысь, 649 овмöс. Олöма мортыс 593, уджалан арлыдаыс 824. Таво чужис 10 кага. 
*Йöз уджалöны овмöдчöминса администрацияын, шöр школаын, садйын, клубын, почта вылын, шöр бурдöдчанiнын, кусöдчан юкöнын, Пруптса лесничествоын, электрическöй сетьяслöн Зимстанса участокын, лавкаясын, сбербанклöн да «Шоныд сетан Коми компаниялöн» юкöнъясын, ломтас-мавтасöн могмöданiнын. 
*Зимстан котыртчылiс кыдзи вöр заптысьяслöн посёлок, а удж öнi абу. Вöрын уджалöны бокиысь локтöм йöз. 
*Таво сиптiсны вермытöмъяслысь да пöрысьяслысь керка. Олöма йöзöс иналiсны республикаса интернатъясö. 
*Посёлокын эм О.П.Лютоевлöн крестьянин овмöс. 
*Лöгинъягын да Зимстанын эмöсь асвеськöдлан котыръяс. Лöгинъягын юрнуöдö А.Ю.Конакова. Зимстанын вöлi Л.Н.Алексина, но шуис петны, чукöртчылöм бöрын бöръясны выльöс. Лöгинъягса асвеськöдлан котыр некымын во сайын шедöдiс грант, сьöм вылö вöчисны челядьлы ворсанiн. «Монди СЛПК»-кöд социальнöя ёртасьöм йылысь сёрнитчöм серти Лöгинъяглы вичмис миллион шайт. Сы вылö босьтiсны трактор, кутасны асьныс весавны туйяс. 
*Некымын во нин овмöдчöминын мунö «Уна рöма Войвыв» гаж. Медводдзаысьсö волiсны быдпöлöс национальноста гöсьтъяс, весиг казакъяслöн «Вольница» сьылан котыр. Таво гажыс мунiс июнь 9-öд лунö. Волiсны районса кöкъямыс котыр. Унаöн эз окотитны локны лёк туй вöсна. 
*Садйö ветлö 102 кага, зонпосниöс вайöны тшöтш Лöгинъягысь. Садйын уджалö 24 морт. Веськöдлö Анастасия Юрьевна Кичун. 
*Зимстанса шöр школаын 162 велöдчысь. Директор Г.А.Кичун директоралö 25 во. Таво Галина Александровна петкöдчис «За нравственный подвиг учителя» ставроссияса конкурсын, кöнi лоис мöдöд тшупöда лауреатöн. Дасьтiс духовно-нравственнöй да гражданско-патриотическöй туйдöм-велöдöм кузя удж. Челядь быд во петкöдчöны олимпиадаясын. Таво 9 класс помалiс 12 велöдчысь, 11 класс — 10. Валерия Лютоевалы вичмис районса юралыссянь бура велöдчöмысь стипендия, сiйö мунö зарни медаль вылö. Эм кадетъяслöн класс. Таво школалöн тшупöда пас — тырас 55 во. Пасъясны декабрын. Öнiсянь нин интернет пыр шыöдчисны школа помалысьяс дорö. Отсасьöны ставöн. 
*Посёлокын сизим лавка. Сэнi вузалöны сёян-юан, быдлунся коланторъяс, стрöитчан материал. Артавсьö 11 асшöр уджалысь, вузасьöмысь öтдор заптöны вöр да вöчöны пиломатериал, пöжалöны нянь. 
*Уна челядя 38 семья. Медуна челядь быдмö Мария Алексеевна Тарабукина да Алексей Васильевич Кочанов гозъялöн, налöн витöнöсь. 
*Медся олöмаяс Е.Ф.Морохина (1926-öд воын чужлöм), М.К.Логинова (1929-öд воын чужлöм), Н.И.Кочанов (1930-öд воын чужлöм). 
*Зимстанын нёльöн кыпöдöны керка. 
*Йöзöс автобусöн Кулöмдiнöдз куимысь вежоннас новлöдлö И.В.Ракин, карöдз асшöр уджалысь И.А.Кочанов. 
*Эм бурдöдчанiн, тэрыб отсöг сетан машина. Уджалö аптека. Волывлöны флюорография да маммография. 
*Олöмаяслöн котырöн веськöдлö Л.Б.Конакова. «Зимстаночка» да «Зорюшка» сьылан котыръяс петкöдчöны оз сöмын асланыс посёлокын, но и мукöд сикт-грездъясын. 
*Велöдчöм бöрын том йöз оз тэрмасьны локны чужанiнö, сы вöсна мый абу удж. 
*Зимстан — уна национальносьта посёлок. Олöны украинечьяс, белорусъяс, немечьяс, армянаяс, азербайджанечьяс, чувашъяс, комияс да с.в. 
*Пыдди пуктана йöзöн лоöны леспромхозöн вöвлöм веськöдлысь Матвей Николаевич Терлецкий (öнi олö Сыктывкарын) да сьыланкывъяс лöсьöдысь Василий Александрович Лютоев. 
Галина КЛЮЖЕВА.

Комментарии:

Добавить комментарий

Свежий выпуск: за 26 марта