Ми, Кулöмдiнса спорт школалöн быдтасъяс, выль во бöрын регыд и сувтiм лыжи вылö, январ коймöд лунö котралiм 500, 1000 да 1500 метра. Медся ичöт вермасьысьлы вöлi 14, медся ыджыдлы — 60 арöс. Вермисны Иван Мишарин да Ольга Лодыгина, мöдöн лоисны Михаил Копылов да Алиса Сергеева, коймöдöн — Фёдор Нестеров да Екатерина Мишарина. Вермысьяслы вичмисны козинъяс. Сэсся юим чай. 
Таво Кулöмдiнса спорт школалöн котыртчöмсянь тырö 45 во. Медшöр тренерлöн, донъялысьлöн да туйдысь-велöдысьлöн, Иван Георгиевич Мишаринлöн, январ 19-öд лунö сiдзжö тшупöда пас: сылы тырас 70 арöс. Сы дырйи спорт школаса велöдчысьяс квайт час асылын котралiсны нин Кулöмдiнса уличаяс вывтi. Унаысь кайлывлiм Набережнöй улича вывсянь, лыжи бедьясöн йöткасьöмöн, Сöветскöй да Шöр уличаяс вылöдз. Татшöмторсö öнi шуöны скандинавияса ногöн ветлöмöн. Урокъяс бöрын бара песлiм вын-эбöс. Тöвнас котравлiм совхозлöн лымъя муяс вывтi, спорт школалöн мыш сайтi. Повзьытöг ислалiм джуджыд кыръяссянь. Кор чарöмавлiс, котравлiм и Носимын, тулысын да гожöмын — аэропортö каян асфальта туй вывтi. Велöдчим котравны накöсöн, кодöс пыртiсны сöмын на, ветлiм быдсикас ордйысьöмъяс вылö. Иван Георгиевич велöдiс миянöс ворсны волейболысь, баскетболысь, футболысь, регбиысь, теннисысь. Гожöмнас нулiс миянöс уджалан да шойччан лагеръясö. 
Меным медся ёна вежöрö кольöма Ростов-на-Донуын вина вöчан совхозын уджалöм. Асывнас да рытнас тренируйтчим, а луннас чукöртiм виноград, вишня, яблöг. Виноград сёйны эг вермöй, вомъяс вежнясисны шомаысла. Вöлöмкö, торъя сорт, кодысь вöчöны вина. Фрукты чукöртiм ящикъясö, медся чöскыдсö — вомö. Быд лун тыртлiм норма, öд тöдiм, мый эштöдöм бöрын сетасны удждон. Сэки гортö вайим уна мича кöлуй: кык либö куим визя спортивнöй гачьяс (Кулöмдiнö тайö модаыс сöмын на локтiс), олимпийкаяс, кроссовкияс, футболкаяс, шортыяс. Этшалöн сэки вöлi татшöм паськöмыс. 
Лунвылын ми пуим вишняысь варенньö, гортö вайим банкаясöн. Поездын локтiгöн ичöтъяслöн банкаясыс кутiсны «грымöбтавны», мыйлакö ёнджыкасö войяснас. Вöлöмкö, гырысьджыкъяс пуöмаöсь варенньöсö асьныс кутшöмкö кöзяйкакöд водзвыв сёрнитчöмöн сакар жалиттöг, а ми, поснияс, сетiм пуны сиктса тьöтöяслы. Найö джын сакарсö кольöдöмаöсь аслыныс. 
Иван Георгиевичлöн сойборд улын ми олiм-вылiм, быдмим-сöвмим мойдын моз. Унджык эськö колö татшöм туйдысь-велöдысьыс, томуловöс спортö, дзоньвидза олöмö кыскысьыс. Сэки некутшöм наркомания, токсикомания, вина гаг оз берт, лолыд лоас кыпыдöн да сöстöмöн. 
Гижöдöс помала Альберт Ванеевлöн кывбурысь юкöнöн: 

Ми кöсъям, медым лöзалас юр весьтын 
Да лоас енэж челядь нюм кодь сöдз. 
Шань мортыд быттьö пытшкöссяньыс югзьö, 
И, мый эм бурыс, лышкыда зэв юксьö, 
Шань сьöлöмлы ми сиам чорыд вын. 

Чужан лунöн, Иван Георгиевич! Кузь нэм да бур шуд! 
Кулöмдiнса спорт школалöн быдтасъяс нимсянь 
Дина ГИЧЕВА. 
Иван МишаринлÖн снимок вылын: лыжиöн ордйысьöм, 2018 во (И.Г.Мишарин мöд визьын шуйгавывсянь нёльöд).