Каникулъяс — челядьлöн медся виччысяна да радейтана кад. Позяс пöттöдз шойччыны да узьны. Кöть и кöдзыд, пемдö водз — ывлатöгыд некыдз. Гуляйтам, исласям, лым пиын пуртiкасям бурпöт. Но мед жö эськö ставыс лоас лючки бур.

Кулöмдiнса шöр школаын ичöт класса велöдчысьясöс тöвся каникулъяс водзын велöдiс-öлöдiс Кöдзыд пöль, сыкöд волiс Зебра, уджалiсны том инспекторъяс. Кöдзыд пöль корис лоны сюсьöн туй вылын, торйöн нин туй вуджигöн. Ывлаын оз ков вöдитчыны наушникъясöн. Тшöкыда позьö аддзыны телефонöн сёрнитысь да мунiгöн телефонын жö гижасьысь нывкаясöс да зонкаясöс. А найö ёна ылöдлöны, мунiгöн-вуджигöн он кыв машина шы, он казяв локтöмсö. Тшöктiс бытьысь паськöмö пысавны би улын югъялан пасъяс. Гуляйтны-ворсны сэнi, кöнi оз журъявны машинаяс да тöдан — оз су неминуча.

Том инспекторъяс водзтi волiсны нин ичöт классъясса челядь дорö, велöдiсны кутчысьны туй вылын. Челядь асьныс сьöрсьöн-бöрсьöн сюся висьталiсны, мый туй вуджтöдз бытьысь колö медводз сувтыштлыны, видзöдлыны öтарас и мöдарас, гöгöрвоисны кö, мый мунны позьö, петкöдлöны кинас, быттьö тшöктöны сувтны локтысь машиналы, да вуджöны. Буретш тайö лыддьöдлöмас кутчысьöмöн и видзам асьнымöс неминучаысь. Ичöт классаяс тöдмалiсны Зебраöн лöсьöдöм нöдкывъяс. Юалöмъяс вылö вочавидзисны и бать-мам.

Но виччысьтöг локтiс Ёма баба, вайис Печкин почтальонлысь письмö тыра нöбсö. Газет-журнал разöдысьыд туй вылын урчитöмторъяс торкалöмысь вошис да сибдiс лым толаö. Ёма бабаыд и отсалiс петны, а письмöяссö вайис школаö. Гижöмаöсь торйöн бать, мам да пöль водительяслы: «Дона верстьöяс! Пыдди пуктöй да кутчысьöй туй вылын урчитöмторъясö. Тiян вылö видзöдöмöн туй вывтi бура кутасны ветлыны да вуджны и тiян быдтасъясныд, сэки найöс оз су неминуча. Сöмын тi кывкутанныд асланыд челядь вöсна». Эскыссьö, велöдöм-öлöдöмсö пель саяс сюркнялiсны ставныс.
Марина ЮРЬЕВА.
Снимок Лариса Зезеговалöн.