Комиысь уна сикт-грезд мунiсны-вошисны миян олöмысь, миян паметьысь. Мунiсны гусьöн, быттьö мыжмисны миян водзын. Сöмын оз ков вунöдны найöс, ассьыным чужанiннымöс. Важöн нин бырисны и Прупт вожысь Чипсись-Гараж, Виль, Мöскашор посёлокъяс, Яков деревня да мукöд овмöдчöминъяс. Танi важöн нин оз кывны йöзлöн гöлöсъяс, челядьлöн дзользьöм, понъяслöн увтчöм, петукъяслöн горзöм да мöсъяслöн баксöм. Мича вöр-ваöн кытшалöм сэтчöс местаясыс вöрсялiсны, тырисны петшöрöн. Кодi помнитö сiйö ли тайö деревнясö ловъяöн, кöнi олiсны бур йöз? Найö, кодъяс чужисны да быдмисны танi. Налы сiйö пыр кежлö коляс чужанiнöн.
Чипсись-Гараж овмöдчöминъяс топыда йитчöмаöсь öта-мöдныскöд. На костын кык километр. Медводз артмис Чипсись. Тайö вöлi коркö 1945-öд воын. Танi олiсны медсясö мöдöдöм йöз. 1948-öд воын сэнi сулалiсны кык барак, вердчанiн, магазин да пывсян. 1949-öд воын танi олiс 30 мöдöдöм морт: квайт немеч, Войвывса Украинаысь 11-öн да 13 вöвлöм сöветскöй военнопленнöй.
Посёлоклöн нимыс артмис боктiыс визувтысь ичöтик Чипсись ёль нимсянь. Важ йöз ылöсавлiсны и мöд ногöн: öтияс шулiсны, мый Чипсись тайö — сiсь (сись) шор, кытысь чипан вермö юны пöтмöныс, мöдъяс — дзольгысь, чипсысь шор, коймöдъяс — комияслöн «чипсан» шылада инструмент кывйысь, кодöс сэсся шуисны чипсысьöн, рочьяс пыскыльтiсны «чипсись».
Гараж посёлок артмис сёрöнджык. Николай Иванович Кочанов казьтывлiс: «Шöръягысь Зимстанö вуджöдiсны техника: газогенератора кöкъямыс машина (уджалiсны эз бензинöн, а пескöн), газогенератора жö нёль КТ-12 трактор, кык ПС-50 электростанция, кодъяс мöгмöдiсны 21 килограмма «Вакоп» пилаяс. Туйыс вöлi зэв лёк, да и шор вомöныс техника эз вермы вуджнысö, сы вöсна мый поскыс вöлi векньыдик, сöмын вöвъяслы ветлымöн. Сы вöсна шуисны техникасö кад кежлö кольлыны туй джынъяс. Сiйö местасö шуисны Гаражöн. Танi восьтiсны вöр заптöм кузя мастерскöй участок. Вöр вöчисны Воч туй пöлöнысь, Гаражсянь 7 километр ылнаысь. Йöзыс удж вылö ветлiсны подöн. Пöрöдiсны вöрсö пöперечнöй пилаясöн, лучковкаясöн, петкöдiсны катище вылö Гаражö вöвъясöн».
1959-öд воын Чипсисьын олiс уна сикас сёрниа 248 морт: рочьяс, комияс, немечьяс, латышъяс, литовечьяс да украинечьяс. Олiсны ёртасьöмöн, öта-мöднысö пыдди пуктöмöн. Найö ставныс уджалiсны вöрын. Мырсисны вой и лун, мед вöчны урчитöмтор. Чуктöдiсны кад и семьяныслы, асланыс радейтана уджлы — чери кыйöмлы да вöралöмлы. Öтлаын кö уджалiсны, öтлаын и гажöдчисны. И öти гаж эз кольлы гудöктöг. Верстьöяслöн уджалiгкостi челядьныс котралiсны школаö. Ичöт классъяс велöдiс Августа Васильевна Гуцуляк.
Чипсисьын вöлi фельдшерско-акушерскöй пункт, кöнi уджалiс Евстолия Александровна Нестерова. Уджавны вöлi сьöкыд: тэрыб отсöг сетанiн эз вöв, транспорт сiдзжö, бурдöдчанторъясла ковмылiс ветлыны пöпутка машинаясöн.
Йöз вочасöн овмöдчисны вöр вöчанiнлань матöджык. Кыпöдiсны пöвъясысь чукöртöм квайт да нёль патераа керкаяс. Öткымынъяс вöчисны ас оланiнъяс, но кодсюрöяс кольччисны на баракъясö.
Гаражысь матын вöлiны сёй куйлöдъяс. Орччöн кыпöдiсны кирпич завод. Сэнi нывбабаяс дасьтiсны пач вöчны кирпичьяс.
Чипсись, кыдз вöр заптысь посёлок, медводдзаысь докуменъясын казьтывсис Керчомъяса сиктсöветын 1956-öд воын. 1963-öд воын сiйöс вуджöдiсны Пруптса сиктсöвет улö. 1960-öд вояс помын тупкысис мастерскöй участок. А сэсся и начальнöй школа, кодöс вуджöдiсны Зимстанö. Кызвын олысьыс 1970-öд воын овмöдчисны Зимстанö. 1973-öд воын посёлокыс тупкысис дзикöдз.
Зимстанысь общественнöй да нывбабаяслöн котыръясö пырысьяс да школаса велöдчысьяс 2015-2016-öд воясын «Ас сиктса олысьяскöд аддзысьлöм» пас улын чукöртлiсны посёлок-деревняясын вöвлöм олысьясöс, тшöтш и Чипсись-Гаражын олысьясöс. Йöз аскöдыс вайлiсны важся снимокъяс, кодъясöс видлалiсны öтув, корсисны сэтысь асьнысö, рöдвужнысö да тöдсаяснысö. Чай чашка сайын казьтывлiсны асланыс олöм йылысь: кыдзи олiсны ёртасьöмöн, уджалiсны шойччöг тöдтöг, быдтiсны челядьöс, гажöдчисны. Аддзысьлан рыт помын сьылiсны сэкся радейтана сьыланкывъяснысö да снимайтчисны пыр казьтывлöм вылö.
Август 27-öд лунö Чипсись-Гаражын вöвлöм олысьяс ветлiсны чужанiнас, медым индыны казьтылан из пуктыны места.

Эрика Шульц,
содтöд тöдöмлунъяс сетысь педагог.
Снимокъяс вылын: Чипсисьö нажöтка вылö локтiсны Керчомъяса, Вочса да Фроловскса олысьяс; ФАП-са уджалысь Е.А.Нестерова; гудöктöг эз кольлы öти гаж; А.В.Гуцуляк ичöт класса челядькöд.