Шуласны тай: мортыд кö енбиа, то быдторйын. Тайö тадзи и эм. Босьтны кöть Ичöт Аныбысь Анастасия Вологжанинаöс, кодi паськыда тöдса районын кыдз быдтор вöчны ыджыд сяма морт, бур серпасасьысь. Видзöдлыны кö, сылöн кужтöмторйыс абу: кытчö кöть оз видзöдлы, мый кöть оз мöвпышт, ставсö зiльö вöчны яръюгыдöн, мичаöн, син гажöданаöн, лов кыпöданаöн. Тыдалö, енбиалуныс чужöма ассьыс на водз. 
Анастасия чужис-быдмис Ручын. Бать-мамыс, Михаил Григорьевич да Люция Николаевна, кöть видз-му овмöс пыкысь йöз, но зэв жö бура гöгöрвоöны да торйöдöны рöмъяслысь мичлунсö, аслыспöлöслунсö. Михаил Григорьевич, кыдз шуö нылыс, водзтi весиг серпасасьлöма на. Со и йиджтiсны нылыслы сьöлöмас енбилысь кöйдыссö, кодi помся лелькуйтöмöн быдмис мича дзоридзöн. Анастасия Ручын велöдчис нёльöд классöдз, а сэсся бать-мамыс сетiсны сiйöс юркарса искусствояслöн гимназияö художествоа юкöнö. Сэнi нин нывкалöн петкöдчис ыджыд сямлун, и öти велöдысь вöзйис сылы öкмысöд класс бöрын мунны водзö велöдчыны Ярославльса художествоа училищеö. 
— Велöдчанiныс зэв ён, сэнi сетöны джуджыд тöдöмлунъяс. Велöдчыны локтöны весиг гырысь каръясысь, — ошкис Анастасия. 
Училище помалöм бöрын сiйö та вылын эз на сувт, уджысь орöдчытöг (а сэки сiйö зiлис Ярославльса керамика заводын серпасасьысьöн) велöдчис текстиль промышленностьлöн Москваса институтын кучик кузя дизайнерö. И квайт во чöж. Нёльöд курс бöрын петiс верöс сайö. Радейтана зон буретш помалiс велöдчöмсö да сiйöс, кыдз военнöйöс, мöдöдiсны служитны Камчаткаö. Анастасиялы ковмис сэсянь вонас кыкысь самолётöн ветлöдлыны Москваöдз, лэбны öкмыс час чöж. Сэтчöс инъясыс, кöнi олiсны, шензьöдiсны аслыспöлöс мичлунöн. 
— Карыс, кöнi олiм, Сыктывкар ыджда кымын, — висьталiс Анастасия. — Орччöн океан, сы вöсна сэнi пыр тöла, тöлыс уна лымъя, тулысыс кузь. Гöгöр вулканъяс. Сэки челядьным эз на вöвны да, кытшлалiм быдлатi, кайлiм мылькъяс вылö, волiм и пöсь ключьяс дорö. 
Москваын велöдчöм бöрын Анастасиялöн верöсыскöд чужис ныв. Кык-куим во мысти верöссö вуджöдiсны Архангельскö, и öнi сэнi олöны матö вит во нин. Ань уджалö серпасасьысьяслöн студияын, кытчö волöны верстьö и челядь. Топыд йитöд кутö «Северная мануфактура» фирмакöд, код пыр иналö ассьыс вöчöмторсö оз сöмын Архангельск обласьтын, но и Россия пасьта, ёнджыкасö Москваын да Санкт-Петербургын. 
Вонас кыкысьöдз вевъялö волыны Ичöт Аныбö, кöнi олöны да кутöны крестьянин овмöс бать-мамыс. Челядьыскöд, семьянас матö гожöмбыд олöны танi. Быд локтiгöн, кыдзи ачыс шмонитö, локтö додь тыр кöлуй-эмбурöн, аскöдыс вайö ассьыс серпасасянторъяссö да вöчасянторъяссö. Весь пукавны эз велав: нинöм вöчтöгыс пö — серпасасьтöг ли мыйкö кытöг — луныс оз коль. 
Сiдзжö и гортас олiгöн. Сылöн индöма торъя лунъяс, кор мый вöчны. Вежон кык кымын сепасасьö. Тайö кадын ки улас серпасасьны став коланторйыс. Мый-мый, а медся нин шойччö ловнас тайö удж сайын. Öти серпассö дасьтö лун-мöдöн, ыджыдджыкъяссö — дырджык. Дышöдас да, мöд кык вежон мичмöдö керамика, дась мыгöръяссö ньöбö Ярославльса керамика заводысь, кöнi уджавлiс водзтi. Сэсся дасьтö пуысь тшапитчанторъяс — сикöтшъяс, исергаяс да с.в., кодъясöс сiдзжö мичмöдö уна рöмöн. Кык-куим вежонöн вевъялö найöс вöчны унаöс. Водзö — пуксьö кысян станок сайö, кыö джодж дöра. Сы вылö мунö матö тöлысь, пока вундалас дöра, лöсьöдас сунисъяс. Йöз тшöкыда корöны кыны джодж вылö вольсалантор, овлö, кызь метраöдз. Быдöнлы мунö воча. Матö кык вежон чуктöдлö вöчны-вурны кучикысь сумкаяс. Кучиксö ньöбö Ярославльса жö кучик вöчан заводысь. Тадзи тöвбыдöн аньлöн чукöрмö уна вöчöмтор. И пыр аддзö, кытчö инавны найöс. Интернетын «Ярмарка мастеров» сайт пыр позьö вузавны унатор Россия пасьта и весиг суйöр сайö. Анастасия медсясö сэтчö вöзйö керамикаысь дасьтöмторъяс да серпасъяс. Уджъясыс мунöны уналаö — Красноярскö, Якутияö да с.в. Магнитысь вöчöм козинъяс «Северная мануфактура» пыр — медсясö Москваö да Санкт-Петербургö. 
Таысь кындзи, Анастасия вöчасьö йöзлöн корöм серти. Корöны весиг серпасавны выль петысь книгаяс. Сылöн уджöн петiс нин куим книга. Öтчыд Ичöт Аныбö ветеранъяслöн чукöртчылöм вылö волiсны олöма йöз Нившераысь, кодъяс асланыс кружок вылын вöчалöны туисъяс. Öнi налысь мичмöдлывлö сюмöдысь вöчöмторъяссö, мед бура инасисны. Вайлiсны нин кык пöрйö. Сэсся и кулöмдiнсаяс, кыдз бура тöдса мортöс, корлöны мыйкö да вöчны. 
Анастасия сiдзжö мичаа вурсьö, дасьтö аслыс петкöдчан паськöм. Таö велöдчис ачыс, некодöн туйдытöг. Медводдза воськовъяссö вöчлiс гимназияын велöдчигöн кружок вылын. Выступайтан паськöм вурис и тöдса артисткалы. Сылы сьöлöм сертиыс мöвпыштны да дасьтыны выльыс-выль сикаса платтьö. 
Анастасия нöшта на и Ичöт Аныбысь «Ошлöн вöр» шойччанiнса администратор. Кöть олö сэсянь ылын, но бура тöдö, кор да мый танi вöчсьö, сы вöсна мый ачыс гортсяньыс котыртö бокиса йöзлысь локтöмсö да шойччöмсö. А татчö волiгöн выльысь-выль нога гажöдö оланiнъяс да ывла выв, медым кыскыны шойччыны унджык йöзöс. И быд волiгöн водзö дасьтö выль вöчöмторъяс да серпасъяс, наöн петкöдчылö тöдчана гажъяс дырйи, кыдзи и таво районлысь гöгрöс пас ыдждöдлiгöн. Йöз шензисны налöн аслыспöлöс мичлун вылö, унаöн ньöбисны дыр казьтылöм вылö. Анастасия районса культура керкаын вöчлiс серпасъяслысь выставка. Уджъясас — кытшалысь вöр-валöн кыпыд ловшы, сиктса олöм. 
— Выставка вылын кöть медсясö петкöдлi классика ногöн серпасалöм уджъяс, но меным аслым сьöлöм серти аслыспöлöс, мойдын сяма сюрöса уджъяс, абстракцияяс, арт-серпасъяс. Менам эм мöвп чукöртны 2-3 серпасасьысьöс да ветлöдлыны тöдчанаджык, мыйöнкö шензьöдана сиктъясö, кыдз Дереваннöй, Помöсдiн, Ульяна, да серпасавны сэтысь медмичаинъяссö да вöчлыны тайö серпасъяссьыс выставка, юксьыны öта-мöдкöд сямöн. Та йылысь висьталi выставка восьтiгöн юрсиктса олысьяслöн чукöртчылiгöн, но некод на эз шыöдчыв. Позьö котыртны и ас вöчöмторъяслысь либö фотоснимокъяслысь выставка. Миян район öд зэв озыр енбиа йöзöн, колö кыпöдны найöс, ышöдны мунны водзö. Меным зэв нимкодь, мый ме чужи Кулöмдiн районын, и мый чужанiн пыр кыскö ас дорас. Вöр шöрö пуксьöм Ичöт Аныб воис сьöлöм вылас и верöсöйлы. Вöзйи сылы ветлыны шойччыны саридз дорö, а сiйö менö вайöдiс татчö ном вердны. Танi пö кытшалысь вöр-ваыс аслыспöлöс кыпыд, чöскыд кöра сынöда, мыйысь лöньö и сэк жö кыпалö лов, содö вын. Кöть сылöн, военнöйлöн, уджыс абу йитчöма творчествокöд, но лючки гöгöрвоö менö, быдногыс отсалö, сылы сьöлöм сертиыс менам серпасъясöй, — водзö сёрнитiс Анастасия. 
Зэв бур, кор матыссаясыд гöгöрвоöны тэнö быдторйын да нöшта на и отсалöны колiгöн. Кыдзи Анастасиялы Мария чойыс, кодi сiдзжö бура гöгöрвоö серпасасян уджын. Сiйö дизайнер. Найö öтув зiльöны «Ошлöн вöр» шойччанiн кутöмын да сöвмöдöмын. Отсасьысьясöн, тыдалö, лоасны и челядьыс, сизимöд арöса Катя, кодi таво пырас школаö, да кык арöса Саша. Найö пыр бергалöны мамыс дорын. Мöдыслы тырмымöн сöмын здук кежлö вешйывлыны серпас дорысь, найö пыр и матыстчасны да содтыштасны мыйкö ассьыныс. Бать-мамлы, дерт, лоас нимкодь, найö кö лоасны серпасасьысьясöн жö. 

Галина Нестерова. 
Снимок А.Вологжаниналöн 
чукöртöмысь.