Неважöн, мамлöн паметь лунö, ветлi чужан Керчомъяö видлыны шойна вылын куйлысь рöдвужöс. Мам ловъя дырйи быд во чужан лунас волывлi да, мися, кутас виччысьны… Мöдöдчим гортсянь машинаöн, кöсйим пыравны шойна вылö, кытшовтны тöдса гуяс, пукыштны мамлöн гу дорын, а сэсся и бöр лэччыны.
Ёна майшасим, воам ог Керчомъяöдз, лэччан паныдас лунтыр зэрис да, сибдам кö, кодкö кыскас оз. Но ставыс артмис бура: водзвыланым трактор мунöма да туйсö шыльöдöма. Мöд майшöг на вöлi: шойна дорас вермам ог матыстчыны, сэнi пыр вöлi ыджыд ва гуран, а гöгöрыс сибдан няйт. Кежим шойна вылö пыран туйö, а сэнi некутшöм ва гуран ни няйт абу, воим лючки гуяс дорöдз. Вот, мися, бур йöзыд вöчöмаöсь туйтö. Аттьö жö нин!
Гуяс кытшовтöм бöрын окота лоис чужан сиктöдз ветлыны, видзöдлыны тöдса керкаяс, казьтыштны сэтысь олысьяссö. Кывтыд помöдзыс выльöн вольсалöм шыльыд асфальт вывтi öдйö и воим. Бара на ассьым челяьдырöс да том кадöс лои казьтыштöма, кутшöм туйыс вöлi Керчомъяын 50-60 во сайын. Но сы вылö видзöдтöг чужан сиктöй пыр вöлi дум вылын, век вöлi муса Керчомъяöн. И öнi на сiдзи!
Машинаöн ньöжöник мунiгöн казялi: чужан сиктöйлöн чужöмбаныс вежсьöма бурланьö. Уна мичмöдöм-краситöм керка. Öшинь уланыс сы мында дзоридзыс пöртмасьö! И тайö серпассьыс сьöлöмöй радысла öдва ортсö эз чеччышт. Кöть олöмыс сьöкыд, векжö том семьяяс овмöдчöны сиктö, оз мунны бокö, кыпöдöны оланiн. Мукöдыс дзоньталöны, мичмöдöны, думайтöны водзö олöм йылысь. Мед и водзö мичаммас чужан сиктöй.
Коймöд дум на юрын жуис: код ордö кö пыравлыны колö, аддзысьлыны, сёрнитыштны. Матысса рöдвуж чужанiнын эз нин коль, но öд томдырся пöдругаöй эм — Елена Ярославовна. Дерт, водзвыв сёрнитчим сыкöд, öд ми машина тыр йöзöн пырны кöсъям. Эз бара паныдав, пырöй пö кöть комынöн, тöрам. Паныдалiс миянöс мелiа, кыпыд нюмöн, шоныд сывъясöн. Керкасö ыджыдöс кыпöдлöмаöсь шонъянöй Володя верöсыскöд, эг и куж лыддьыны кымын жыръя, быдлаö тай пыравлiм-а, видзöдалiм став мичсö да чуймалiм — эм весиг дзоньвидзалун ёнмöдан жыр. И каминыд эм! Сэсся пызанвыв тыр сёян-юанöн гöститöдiс: пуöма и пражитöма. Эг и тöдлöй, мунан кад воис.
А ме кольччылi на Елена Ярославовна ордö, кык вой на узи. Пöттöдз сёрнитiм, казьтывлiм том каднымöс. Видзöдлiм öнiя фотояс, наысь тыдалö, мый тайö нюмьялысь авъя аньыс оз пукав гортас, а водзмöстчöмöн олö, мичаа сьылö олöмаяслöн котырын. «Пыжа гаж»-ыд сытöг оз кольлыв. Елена Ярославовна — велöдысь. Школа помалысьяс пиысь унаöн шоныда казьтывлöны вöвлöм велöдысьöс, волöны гортöдзыс, аттьöалöны зумыд тöдöмлунъяс сетöмысь, бурö туйдöмысь.
Ме сиа Елена Ярославовналы крепыд дзоньвидзалун, шуд да кокни ловру. Зэв ыджыд аттьö миян семьясянь бура примитöмысь. Чужан сиктö волöм бöрын сьöлöм вылын кокняммис весиг, öд олöмыс бурланьö мунö.
Нина Игнатова.
Вöльдiн.