Тöдса, мый велöдчöм бöрын томъяслы сьöкыд аддзыны удж. А со Ульянаысь Данил Тарабукинöс, аскиа механизаторöс, виччысьöмöн-виччысьöны нин. Öнi каникулъяс дырйи шойччöм пыдди, позьö шуны, уджалö лун и вой. Гожöмын кöрым заптiгöн дона быд здук. Торйöн нин таво помся да ёна ээрöмöн колö кыйны мича лунъяс. 
Тайö зiль зонмыс крестьянин овмöс кутысьяслöн — Игорь Михайлович да Елена Евгеньевна Тарабукинъяслöн, пи. Найö пыр олiсны скöтöн. 2011-öд воын фермеравны медводз босьтчис ань. Конкурсъясö пырöдчöмöн да грантъяс шедöдöмöн кыпöдiсны скöт карта, ньöбисны трактор, кöрым заптан техника, бур мöсъясöс. Верöсыс водитель. Трактор ньöбöм бöрын велöдчис да босьтiс трактористлысь право. Сэсся ачыс пасйысис крестьянин овмöс кутысьöн, да гозъя пырöдчисны «Семьяöн кутан ферма» балаяслöн конкурсö, кодöс нуöдiс видз-му овмöс министерство. И вермисны. Грант вылö кыпöдiсны 50 юрлы скöт карта, ньöбисны бур мöсъясöс. Ыджыд овмöс бергöдiгöн орччöн пыр вöлi Данил. Эз пов сьöкыдысь ни няйтысь, ни дукысь. Ачыс бöрйис туйвизьсö: öкмыс класс помалöм бöрын пырны Коми республикаса агропромышленнöй техникумö, велöдчыны механизаторö да бергöдчыны чужанiнö. 
— Меным велöдчыны зэв кокни. Кöрым заптöм водзын батькöд дасьтылiм техника, уджалiгöн, колiс кö, дзоньтасьлiм. Ытшкигöн либö турун пуктiгöн да мукöд удж вöчигöн ветлöдлi батькöд тракторлöн кабинаас. Меным сiйö вöлi и колö. Бать-мамöй пыр тöдчöдiсны, кутшöм лöсьыд, мый налöн эм пи, мый бергöдны овмöс кокниджык ставлы öтув, — сёрнитiс Данил. 
Техникумын колö велöдчыны нёль во. Колис öти. Мöдöд восянь пыдiсянь велöдiсны специальносьт серти. Таво медводдзаысь экзамен примитiсны том механизаторъяслöн конкурсын моз. Колiс урчитöм кадöн резьöдны-тэчны тракторлысь «сьöлöм», аддзыны да вöчны жугалöмин. Экзамен водзас волiс гортас, видлiс сям асланыс техника вылын, дасьтысьны став коланаыс эм и техникумын. И босьтiс «5». 
Данил кольöм воын босьтiс водительлысь право, таво апрельын — трактористлысь. Майбыр, оз ков корсьысьны, кытчö мунны гожся практика вылö. Волiс öтлаын велöдчысьыскöд, лöсьöдiсны трактор да мукöд техника гöра-кöдза кежлö. Кыткö да зэлöдыштiсны, кыткö да мавтыштiсны, мыйкö да вежисны. Батя-пиа öта-мöдсö вежлалöмöн и пуктысьöны. Сьöкыдджык, мый тракторыс öти. Колö вежлавны агрегатъяс. Ытшкан, сэсся куртан, гöрддзымö да плёнкаöн гартан. Ульянаын эштöдiсны нин. Пуктысисны Кулöмдiнын, кöнi му юкöнъяссö кöртымö босьтiсны сортоучастоклысь. Сэсся мунасны Кулöм ю бокö, кöнi ыджыд видзьяс, вуджаласны Кулöмдiн весьтö Эжвалöн мöдлапöлö. Оз на кö удитны кыпöдны керкаяс, нöшта пуктысясны Кулöмдiнса Пеп Чуркын. Кыдзи шуö Елена Евгеньевна, кытысь пö сюрас, сэтысь и ытшкасны. Öнi овмöсын 50 юр скöт — мöсъясöн да куканьясöн. Мöвпалöны содтысьны нöшта. Турун кö лишалас, позяс и вузавны. Игорь Михайловичлы нимкодь: пиöй пö меысь на бура гöгöрвоö техникасö, тöдö сылысь гуг и бан да зэв бур, мый бöрйис тайö велöдчанiнсö. Данилöс ёна виччысьöны гортас. Сэки оз нин ковмы медавны йöзöс. 
— Локтан воын босьта механизаторлысь диплом да арнас муна армияö. Но сыöдз удита на пуктысьны, — висьталiс Данил, а сэсся зэв сюся пуксис трактор вылö да босьтчис ытшкыны. 
Арöс да джынъя Дима вокыс, кодi Данил моз жö чужöмсяньыс быдлаын пыр бать-мамыскöд, мамыслöн ки вывсянь сюся видзöдö батьыс да вокыс бöрся. Чайтсьö, быдмас да мунас налöн кок туйöд жö. 

Марина Дадашова. 
Снимок гижысьлöн.