Кулöмдiнса шöр школаын велöдчысьяс урокъяс бöрын öнi оз тэрмасьны гортаныс, «пысасьлöны» на школа йöрын сувтöдöм тренажёръясö. Скалодром, турникъяс, лабиринт да мукöдторъяс сулалöны школалöн öшинь улын, а керка сайын — футболысь ворсанiн. Позьö ворсны и теннисысь.

Тайö ставсö ёна нин виччысисны челядь, öд тöдöмлунъяс босьтöм кындзи налы колö песны ассьыныс вын-эбöс да сöвмöдны вир-яй.
Сувтöдiсны ставсö «Быд кагалöн вермöмъяс» уджтасö пырöдчöмöн. Сьöмсö вичмöдiс Россияса велöдан министерство.
Кольöм воын тайö жö уджтас серти ёнмöдчанiнъяс пуктiсны Кебанъёльса шöр школаын, водзтi — Пожöгын.
Кулöмдiнса шöр школаöн веськöдлысь О.В.Пунегова висьталiс, мый выль спортплощадка вылын челядь ворсöны урокъяс бöрын, физкультура урок дырйи, а лабиринт налы ковмас ОБЖ урокъяс вылын. Прöст кадö велöдчысьяслы позьö пöттöдз ворсны, песны вын-эбöс.
Оксана ЛЕБЕДЕВА.
Снимок гижысьлöн.