Коронавирус шызьöдiс став мувывса олысьясöс. Россияса президент В.В.Путин шуис овны гортысь петавтöг, этшаджык ветлöдлыны ывлаын. Тайö вöчсьö сы могысь, мед эз паськав висьöм. Мый вöчöны миян районсаяс тайö кадсö гортаныс коллялiгöн?
Ольга Васильевна Ямщикова, Кулöмдiнса шöр школаын велöдысь:

• Уджалiгöн гортысь петлi водз асылын и волi квайт час рытын. Нинöм эг вевъяв вöчны. Öнi гортын пукалiгöн быдлатi бура мыськалi. Уджалiгöн вöлi некор, а öнi лоис кад видзöдны радейтана «Белое солнце пустыни», «Красотки» кинояс. Студенталiгöн на лыддьылi Булгаковлысь «Мастер да Маргарита» небöг, да лоис позянлун бара босьтлыны киö. Нывбабаяслöн лун кежлö козьнавлiсны вафли пöжалан, öнi со эм кад, да пöжаси. Отпускöй век гожöмын, а сэки градъясöн да керка дзоньталöмöн ог и шойччывлы. Öнi шойчча. Телевизор пыр видзöда сöмын «Культура» сяма каналъяс, кöнi оз петкöдлыны выльторъяс. Сьöлöм вылö воö классика шылад. Эска, мый водзö вылö ставыс лоö бур.
  Людмила Николаевна Попова, Кулöмдiнса уна челядя мам:
• Лунтыр гортын челядькöд. Öтув коллялан кадыс лоис унджык, öд ыджыдджык нылöй велöдчö карын, да аддзысьлам гежöда. Шöрыс велöдчö танi. Налöн быттьö кузь каникул. Петавлам ывлаö зэв гежöда да сöмын лавкаö. Гортын пыр аддзам вöчантор. Дашакöд пöжалам быдпöлöс чöскыдторсö. Ставöн ворсам лотоысь. Юля пуксьылö планшет сайö, вöчасьö ас киöн. Видзöдам öтвылысь кинояс. Челядьлöн школаысь гажныс эз на ёна быр, гöгöрвоöны, мый бöрас лоас сьöкыдджык, мый ковмас ставсö суöдны.
  Оксана Анатольевна Китаева, Кулöмдiнса ань:
• Верöс уджалö, а ми пикöд олам гортын. Пусям, мыськалам-пелькöдам гöгöрбок, ворсам, сёям, пöттöдз узям. Пуктiм рöсада. Ворсам пызанвывса ворсöмъясысь, лыддьысям. Но мудзим пукавны гортын, тайö öд абу отпуск либö каникулъяс: оз позь петны ывлаö, оз став лавкаыс уджав. Миянлы тырмис вежоныс. Тимофей пиöй вöзйысьö садйö, гажыс нин бырöма ёртъяссьыс. Апрель помöдз кö олам гортын, унатор вунöда да ковмас кыпöдны уджалан сям.
  Виктор Егорович Остряков, Кулöмдiнса олысь:
• Ас керкаын уджыд пыр тырмö: öнi со поткöдла да тэча пес, тырмас некымын вежон кежлö. Интернетысь тöдмала став юöрсö. Матыссаяскöд сёрнитам телепон пыр. Талун кежлö некутшöм сьöкыдлун абу на. Но нюжöдасны кö гортын пукалан кадсö дыр кежлö, кыдзи овны йöзыслы, кор оз уджавны шырсянiнъяс, библиотекаяс да олысьясöс мукöд могмöданiнъяс? Ме уджала, мунны-локны сетiсны колана гижöд. Сьöлöм вылö воö ветлöдлыны чарöм вывтi, сиктысь бокын висьöмыдлöн вирусыс абу. Снимайта тувсовъя мичлунсö, аслыспöлöслунсö. Та кындзи петавла сöмын лавкаö да шыбитны лöп-ёг.
  Екатерина Уляшева, Дiасёръяса школаын сизимöд класса велöдчысь:
• Кор юöртiсны карантин йылысь, чайтi, мый гортын пукалiгöн лоö бурджык. Но тадзи овны эг велав. Школаö котралiгöн аддзысьлан ёртъяскöд, сёрнитан накöд, öнi тайö оз тырмы. Телепон да скайп пыр йитчылöмыд абу збыль аддзысьлöм кодь. Босьтчи пырöдчыны быдпöлöс конкурсö, кодöс нуöдö челядьлöн Россияса öтмунöм. Тадзи кöть кадыс кутiс кольны öдйöджык. Гажтöмтчыны лоис некор.
  Алёна Бизина, Сыктывкарса педколледжын велöдчысь:
• Локтi чужан Помöсдiнö. Некор весиг эг куж мöвпыштлыны, мый коркö шуа тайö, но ме сэтшöма кöсъя велöдчыны, ветлöдлыны училищеö. Тайö ёна оз тырмы. Гортын пукалiгöн лыддя Рей Бредберилысь книгаяс. Пелькöдi шкапъясöс. Мыськаси гöгöрбок. Велöдча пусьыны. Видзöда кинояс. Тöдöмлун босьта ылыстчöмöн, лöсьöда балаяс. Мудзи пукавны гортын, гажöй нин бырис ёртъясысь.
  Галина Владимировна Чаланова, Кулöмдiнса ань:
• Зэв бур, мый тшöктiсны пукавны гортын. Талун со пöжаси, отсасисны быдтасъясöй. Ставöн öтлаынöсь, да челядь сэтшöм шудаöсь. Колö, эськö, нöшта тупкыны Сыктывкарö да районса сикт-посёлокö туйяс, мед тайö лёк висьöмыс оз во миянöдз. Шогöдö, мый аптекаын абуöсь маскаяс, антисептикъяс. Майшöдлö, нюжöдасны кö дыр кежлö гортын пукалöмсö, мый вылö кутам овны? Менам кык ныв. Найö дырджык нин гортынöсь. Ворсöны пызанвывса ворсöмъясöн, ыджыдыс босьтчис чукöртны алмаза мозаика, дзоляыс серпасасьö, вундасьö да ворсö, сiдз шусяна, «кинетическöй» лыаöн. Быд асыв чеччöны да петавлöны ывла вылö, но сöмын керка йöрö. Ыджыдыс шуö, мый карантин — тайö зэв лёк, гажтöмтчö ёртъяссьыс. Мудзисны нин, ставыс дышöдöма. Оз нин тöдны, мый вöчны. Меным гортын матыссаяскöд лöсьыд, öд овмöсад пыр сюрас удж, лунъяс лэбöны öдйö, весиг телевизор ог видзöд. Радейта матыссаяслы пуны чöскыдтор, быд лун чуймöда выль сёянöн либö пöжасöн.
  Виктория Королёва, Вылыс Вочысь Сыктывкарса университетын велöдчысь:
• Öнi гортын, чужанiнын. Быд лун кольö öткодя. Велöдчам ылыстчöмöн, да сетöны уна удж. Кадыс тырмымöн. Но карад мыйкö кö он гöгöрво, юалан велöдысьыдлысь, а танi лоö зунясьны аслым. Татшöм велöдчöмнад лоас сьöкыд. Полышта, öд ковмас сдайтны зачётъяс да экзаменъяс. Нинöм шуны, öнi лоис унджык кадыс олыштны матыссаяскöд. Быдлаын ёна висьталöны, мый колö тшöкыда мыськыны кияс, ковтöг оз ков петны ывлаö. Йöзыс тöждысьöны асланыс дзоньвидзалун вöсна да кывзысьöны. Ставыс миян сайын, кутчысям кö урчитöмторъясö, висьöм оз паськав.
  Галина Клюжева.