Снимайтчысьöс пыр на тöдöны

[ A+ ] /[ A- ]


Менам бать Дмитрий Петрович Попвасев чужис 1923-öд воын Кулöмдiнын уна челядя семьяын. Сылöн Пётр Дмитриевич батьыс уджалiс колхозын. 1953-öд воын сiйöс мыждiсны да ыстiсны Ухтаö. Бöрти лэдзисны. Но война бöрся сьöкыд воясын Ольга Константиновна мамыс öтнас быдтiс нёль челядьöс. 
1942-öд вося февральын батьöс босьтiсны война вылö. Сылы вöлi 18 арöс. Великöй Устюгса военнöй пехоталöн училищеын сизим тöлысь велöдчöм бöрын 1942-öд вося сентябрын веськалiс лыжиöн котралысьяслöн батальонлöн юкöнö. Чорыда доймалiс юрыс вöрöгкöд тышын. Пыр бур кывъясöн ошкис военнöй хирургъясöс, кодъяс вöчисны некымын операция, перйисны пасьмунöм снарядлысь торъяссö, ловзьöдiсны батьöс. 1943-öд вося майын лэдзисны гортö. 
Повтöмлунысь пасйисны медводдза тшупöда Великöй Отечественнöй войналöн орденöн, «За отвагу», «За победу над Германией», «За оборону Ленинграда» медальясöн. Бöръя кузяыс СССР-са Верховнöй Сöветлöн Президиумлöн индöдын гижöма 1942-öд вося декабр 22-öд лун, а медальсö сетiсны сöмын 1994-öд вося майын. 
Война жугöдiс сылысь олöм, бать лоис вермытöм. Но аддзис ассьыс шудсö, мича да шань нылöс, менсьым Анна Васильевна мамöс. Лэптiсны керка, чужтiсны да быдтiсны челядьöс. 
Эз радейт казьтывны курыд кöра тышъяс йылысь. Синваыс петлiс война йылысь кинояс видзöдiгöн. Öнöдз на видзам «Маршал Жуков» книга, кодöс лыддьылiс уна пöв да висьтавлiс миянлы. Кöть и салдатъяс вöрöг вылö уськöдчылiгöн горöдлiсны: «Сталин вöсна!», батьсянь сы йылысь эг кывлöй ни бурсö, ни лёксö. 
Батьöй ворслiс мандолинаöн, мамöй гитараöн. Пыр на син водзын, кор пуксьылiсны да ворсiсны, кутшöм мичаа юргисны «Тёмная ночь», «Осенние листья» да мукöд сьыланкывъяс. 
Батьöй вöлi снимайтчысьöн. Уджавлiс бытöвöя могмöдан «Чапаев» котырын, кодi вöлi вичкодорса шор сайын, туй вöчан да дзоньталан Кулöмдiнса юкöнлöн керка дорын. Эз дугöдчы снимайтчыны, кор сiйöс сиптiсны. Батьöс тöдiсны, корлiсны гортö волöмöн. И эз сöмын кулöмдiнсаяс. Аслас радейтана велосипеднас петавлiс и районö. Тöв кöть гожöм пуксьылiс кык гöгыля вылö. Велосипедыскöд эз торйöдчыв. Мында вермис, ветлöдлiс. Сiйöс ыдждöдлiсны пырся туристалысьöн. Йöз тöдiсны, кор локтас, да виччысисны. Снимокъяссö вöчалiс гортын. Ми, челядь, отсасьлiм вундавны. Воис сьöлöм вылö видзöдавны тöдтöм чужöмъяса снимокъяс. Юасьлiм, кодi сiйö мортыс, кутшöм сикт-грездысь. Медся бур снимокъяссö нулi школаö, петкöдлi мекöд велöдчысьяслы. Батьлысь фотоаппаратсö пыр на видзам. 
Удж кузя район пасьта ветлiгöн йöз тшöкыда бур кывъясöн казьтылöны батьöс. Уна керкаын сыöн вöчöм снимокъяс. 
Кыдзи быд серпасасьысьлöн, сiдз и снимайтчысьлöн эм аслыспöлöслун. Ме пыр и тöда газетъяслöн лист бокъясысь батьлысь снимокъяссö. Ёна нимкодь, кор пасйöны сылысь нимсö. 
А мында снимок миян да рöдвужлöн семьяясын. И пыр казьтывлам батьнымöс. 
Валентина НИКИТИНА. 
Кулöмдiн. 
Снимок гижысьлöн чукöртöмысь: туйö велосипедöн.

Комментарии:

Добавить комментарий

Свежий выпуск: за 17 октября