Сиктса олöм пыкысь

[ A+ ] /[ A- ]

Скöрöдумысь Николай Степанович Шомысов техникакöд тöдса ёна томсянь, школасянь. Пырис велöдчыны, кыдз и быдöн, сизим арöсöн. Медводдза велöдысьöн вöлi Клавдия Петровна, кодi педучилище помалöм бöрын сöмын локтiс уджавны сиктса школаö. Кыдзи и сiйö кадся мукöд челядь, медводз вöлi октябрёнокöн, сэсся пионерöн. Кöкъямысöд классын велöдчигöн пыртiсны комсомолö. Пыр водзмöстчис школапытшса уджын. 1972-öд воын помалiс Скöрöдумса кöкъямыс класса школа, водзö велöдчис Помöсдiнын. Öти сайын танi босьтiс и трактористлысь право. Школа помалöм бöрын Скöрöдум отделениеса механик Виталий Степанович Пашнинлöн отсöгöн зонмöс босьтiсны татчö уджавны слесарöн. Сёрöнджык сетiсны Т-16-шасси трактор, медым разöдны скöтлы кöрым: турун, силос, комбикорм. Мöскыс сiйö кадöн вöлi уна, та вöсна уджыс тырмис. Сэсся вöзйысис трактор вылö, вичмöдiсны «Беларусь». 
1975-öд воын Николайöс босьтiсны армияö. Служитiс Новосибирскын пытшкöс войскаын. Армияö мунтöдз тöдмасис мича нывкöд, Эмилиякöд, кодкöд сэсся гöтрасисны. Служитанiнысь 1977-öд вося декабрын локтöм бöрын сiйöс гортас виччысисны нин гöтыр да Сергей пи. 1978-öд вося январын пырис уджавны совхозö. Медводз сiйöс мöдöдлiсны велöдчыны, кыпöдны сям турун пызь вöчöм да картупель вöдитöм кузя. Отделениеын вöлi картупель вöдитöм кузя юрнуöдысьöн. Сэкся кадö сiйöс пуктылiсны 70 гектарöдз. 
Картупель пуктiгöн овлiс, мый пуктасыс эз веськавлы гуранö, и ковмылiс чеччылöмöн лöсьöдны да тыртны сiйöс. Медым эз ков помся чеччыны тракторысь, отсасьны босьтлiс писö. Челядьсö уджö велöдiс ичöтсянь. Кöть пиыс эз ёна окотапырысь мунлы му вылö, но батьыслы паныд нинöм эз лысьт шуны, и, овлiс, вöтчылiс сы бöрся синва сорöн. Уджö велöдöм эз ло весьшöрö: пиыс лоис трактористöн да вермис гöрысьяслöн республикаса конкурсын. Козин пыдди совхозлы вичмöдiсны «Беларусь» трактор. 
Уджалiгöн Николай Степанович пырис партияö, профсоюзö да сылöн районса комитетö, веськöдлiс меставывса профсоюз котырöн. Ветлывлiс профсоюзлöн районса да республикаса конференцияяс вылö. Унаысь бöрйылiсны сиктсöветса депутатöн. 
1988-öд воын индiсны веськöдлыны Скöрöдумса отделениеöн. Сылöн водзмöстчöмöн кольöм нэмся 1990-öд воясын мойвиис кукань видзанiнысь вöчны мöс карта, сэтчö нюжöдны кöрым разöдан транспортёр. Сьöкыд кадö пилорама отсалiс шедöдны содтöд сьöм. Сёрöнджык совхоз пыдди лоис видз-му овмöс кооператив. 
Николай Степановичлöн нырччöмöн жö 2015-öд воын воссис 240 юр скöтлы кирпич карта, кодöс вöчöма став öнiя корöмъяс серти. Тайö жö воын сиктын помалiсны вöчны ва визь, кодöс босьтчылiсны нюжöдны 1980-öд воын да эновтлiсны. Öнi матö быд керкаö воö ва. 2016-öд воын вöчисны начкысянiн, кодi воссяс матысса кадö, да позяс вузасьны яйöн. 
Николай Степанович пыр уджалiс совхозын. Уна вося бура уджалöмсö пасйисны ВДНХ-лöн медальясöн, почёт грамотаясöн, сiйö — уджвывса ветеран. 
Николай Степанович да Эмилия Серафимовна гозъя быдтiсны да паськыд олöмö петкöдiсны куим челядьöс — пиöс да кык нылöс. Сергей уджалö «Палевица» кооперативын трактористöн, сылöн куим челядь: Денис велöдчö Сыктывкарса госуниверситетын, Игорь да Виктория ветлöны школаö. Кыкнан нылыс велöдысьяс. Надежда помалiс Сыктывкарса госуниверситет, олö карын, уджалö 24-öд номера школаын директорöс вежысьöн, велöдö коми кыв, сылöн быдмöны ныла-пиа, Ирина да Константин. Медся ичöт ныв, Анастасия, помалiс Коми государственнöй пединститут, уджалö Помöсдiнса шöр школаын педагог-психологöн, сылöн куим челядь: Дарина да Аня нывъяс да Ярослав пи. 
— Ми гöтыркöд пыр уджалiм видз-му овмöс юкöнын. Гöтыр 35 во зiлис лысьтысьысьöн. Лыддям, мый сиктын быть колö кодлыкö уджавны. Колö радейтны да вылö донъявны ассьыным ичöт чужан мунымöс, пöль-пöчьясöс, ассьыным чужан кывнымöс, — кывкöртiс Н.С.Шомысов. 

Анастасия ДЁМИНА. 
Скöрöдум.

Комментарии:

Добавить комментарий

Свежий выпуск: 28 марта

Осторожно — мошенники!