Дереваннöй сиктын олöмыс гажапырысь пуö. Арнас восьтiсны вöвлöм важ школалы памятнöй знак. Рытнас сэнi яръюгыда öзйöны пöнаръяс. Парктi мунiгöн лолыд ыпмунлö оз сöмын сöстöм ыркыдсьыс, но и мичлунсьыс да сьöлöмсянь удж дорö матыстчöмсьыс. Воссисны и челядьлы ворсан-ислалан площадкаяс. Яръюгыда мавтöм качайяс да ас вöчöм исласянiнъяс сiдз и корöны ас дораныс дзолюкъясöс. Челядьлöн гораа чирзöм–горзöмыс лöньлö сöмын сёр рытö. Дерт, ставыс тайö эз артмы бать-мам отсöгтöг. Сиктса юралысь Елена Васильевна Булышева ышöдiс йöзсö татшöм бур да колана уджъяс вылö.
Кыптö и Микöла Чудотвореч нима выль вичко. Вежа ай Савва висьталöм серти эштас Ыджыд лун кежлö. Сиктса олöма йöз ёна нин виччысьöны вичко восьтöм. Важыс сотчылiс да, восьтлiсны юрбитан жыр важ овтöм керкаын. Дерт жö, Дереваннöйса олысьяс пуктiсны ассьыныс пай. Ас вылö уджалысьяс отсалiсны пöвйöн, сёян-юанöн, тулыснас аньяс кöсйисны волыны мичмöдны ывлавыв: пуктыны дзоридзьяс, чышкыны–мыськыны вичколысь пытшкöс.
Öти кывйöн кö шуны, сиктса йöз киын ставыс, сöмын оз ков дышöдчыны да сьöлöмсянь радейтны ассьыд чужанiнтö.
Татьяна Чувьюрова.