Серпасын коми сиктъяс

[ A+ ] /[ A- ]


Кык вежон кежлö Коми республикаö Национальнöй галереялöн корöм серти воисны Москва, Санкт-Петербург, Мурманск, Киров, Тамбов, Пенза да Тверь каръясысь 13 том серпасасьысь. Дас öкмысöд нэм помын нималана художник В.В.Кандинский волöма Кулöмдiн районö, кайлöма Керчомъя сиктöдз. Сэки сылы ёна воöма сьöлöм вылас эжвайывса вöр-ва, пуысь ыджыд керкаяс да ыджыд сьöлöма шань коми йöз. Том серпасасьысьяс тшöтш жö волiсны миян районö. Некымын лун найö олiсны Василий Напалковлöн «Застава Коми» керкаын. Ветлiсны серпасасьны Керчомъя, Кулöмдiн, Ульяна да Дон сиктъясö.

Донын найöс кыпыда паныдалiс аслас музей-керкаын Василий Степанович Павлов. Внук-внучкаяскöд öтув гöсьтъяслы петкöдлiсны вурун нистöм да печкöм, нянь вылö тусь изöм, тасьтi-пань да пила отсöгöн кыпыд шылад лöсьöдöм. 130 вося керка да сэнi чукöрмöм сюрс сайö экспонат ёна шензьöдiс серпасасьысьясöс. Музей-керкаын гöститöм бöрын разöдчисны Дон сиктö да, зэра поводдя вылö видзöдтöг, серпасасисны сёр рытöдз. Кузь туй да зэра поводдя кежлö воысьяс дасьтысьöмаöсь. Эм и палатка, и плащъяс, и зонтикъяс. Некымын морт уджалiсны кильчö вевт улын.
Донса социокультурнöй шö-рин сулалö кыр йылын. Сэсянь паськыда тыдалö сиктыс да шыльквидзысь мича пармаыс. Пыравлiсны шонтысьны и шöринö.

Некымын олысьлы окота вöлi, мед эськö гöсьтъяс серпасалiсны налысь керканысö. Но художникъяс асьныс корсисны синлы лöсялана серпасъяс да ас бöрйöм серти гижисны мича пейзажъяс. Налöн висьталöм серти серпас торъялö фотографияысь сiйöн, мый сэтчö серпасасьысь сетö ассьысь вынсö, сьöлöмкылöмъяссö, позьö шуны дзоньнас ловсö. Дерт, и серпас, и фотографиялöн чужöмбаныс мича. Но абу дзик öткодь.


Кыдзи и коркö волöм тöдчана морт Василий Кандинскийлы, Эжва йыв ёна воис сьöлöм вылас и талунъя том серпасасьысьяслы. Сентябр 24-öд лунö Коми республикаса национальнöй галереяын воссяс выставка, кытчö тшöтш пырасны Кулöмдiн районын серпасалöм медся бур уджъясыс. Быд окотитысь вермас волыны Национальнöй галереяö да аддзывны ставсö ас синъясöн.
Артур Гарнов.
Снимокъяс гижысьлöн.

Комментарии:

Добавить комментарий

Свежий выпуск: за 14 января