Сентябр 20 лун – вöрын уджалысьяслöн лун

[ A+ ] /[ A- ]


Медбуръяс лыдын


Таво июльын «Монди СЛПК» акционер котырлöн медбур уджалысьясöс нимöдан пöв вылö пасйисны и Озъягысь Игорь Анатольевич Полякöс. Эм мыйысь. Кольöм воын Архангельск обласьтын «21 нэмся вöр лэдзысь» конкурсын сiйö лоис мöдöн. Уджалан сям петкöдлiсны Россия пасьтаысь, Сибирысь, Карелияысь, Санкт-Петербургысь да мукöдлаысь, 80 сайö морт.
Вöр овмöсын 1998-öд восянь. Армияöдзыс на да служитöм бöрын форвардер вылын уджалiс вöр овмöсын. 2016-öд восянь «Монди»-ын вöр заптысьяслöн Асыввыв юкöнлöн Вылыс Эжваса учас-токын. Харвестер техникаöн пöрöдö вöр.

  • Шогмö öнiя вöр овмöс техникаыд. Кабинаыд шоныд, гожöмын ыркыд, техника уджалö компьютер отсöгöн. Жугалö кö, лэччöдлöны карö «Монди»-лöн торъя дзоньтасянiнö. Водзтi механикъяс волiсны вöр юкöнö миян дорöдз. Бурöсь и бокиын уджалысьяслы оланiнъяс. Быд балокын телевизор, эм торъя нуръясянiн, мыссянiн. Миянöс пыр велöдöны, могмöдöны уджалан паськöмöн, гожöмын – ном-йысь да вöрса лудiкысь мавтчанторъясöн. Сетöны ыджыд тöдчанлун дзоньвидзалунлы, быд во дон босьттöг видлöдчам бурдöдысьяс дорын. Оз вунöдны и челядьöс. Сетöны козин медводдза классö пырысьяслы. «Монди»-ын уджалысьяслысь челядьöс чукöртлöны Выль вося гаж вылö. Полина Владимировна гöтыркöд быдтам куим нылöс. Таво шойччим Сочиын, регыд на и локтiм. Ыджыд вöр овмöс вештас меным да челядьлы лунвылö ветлöмысь. Медшöрыс – удж вылö менö пыр колльöдöны да виччысьöны, нимкодясьöны гортсаяс. Семьяын кö ставыс бур и уджавсьö кокниа, — кывкöртiс Игорь Анатольевич.
    Марина Дадашова.
    Снимок Игорь Поляклöн чукöртöмысь.

Комментарии:

Добавить комментарий

Свежий выпуск: за 26 ноября