Окота лои пасйыштны Ручса бур йöз йылысь. Руч эськö зэв сюсь звер, а олысьясыс, гашкö, нöшта на сюсьджыкöсь. Сöмын, кыдз и быд сиктын, эм öти тырмытöмтор: омöля кужöны сёрнитны рочнад.
Уна во «Ручевскöй» совхозöн юрнуöдiс роч морт Р.Д.Шегай. Быд асыв миян пыдди пуктана бригадир Ёгор висьтавлiс директорлы телефон пыр тöрытъя лунсö:
— Вчера сено грабили шестеро, после обеда двое убежали. Осталось четверо, но всё равно всё ограбили.
— Телятам кöрым не хватает, всего их несколько десяток душ — пöгиб.
Ручса став веськöдлысьыс мунасны кыйны чери. Ва вылад петавтöгыд, дерт, оз шед. А орччöн олысь Педöр Семен Петя вöлöма сэн жö кöнкö матын. Локтiгмозыс лыяс варышöс. Муртса на матыстчас, рочьясыд юаласны:
— Уху сваришь?
— Варыш.., — жугыля вочавидзас да мöвпыштас: — Збыль юралысьясыд «юраöсь» вöлöмаöсь, нопйысь на эг перйы, а тöдöны нин.
Локтöма армияысь зон — шняч роч. Батьлы дышöдiс сiйöс кывзыны. Ломтiс пывсян, ая-пиа лэччисны пывсьыны. Пи шыасис öтчыд койыштöм бöрын:
— Хорош, батя!
А сэсся мöдысь да коймöдысь:
— Хватит, батя — хорош!
— А, хорошо — сiдзкö, бур, став лысьöмтö жарыс небзьöдас, — батьыс сетчис йöй улö да нöшта на койыштiс горйö.
— Батьö, тырмас! — öдва шедiс пиыслöн лолыс.
Тайö пывсьöм бöрын роч кывтö сэсся эз лэдзлы.
Бригадир Ёгор некор эз кедзовт ассьыс челядьсö.
— Менам öд челядьыд «юраöсь».
Та вылö Педöр Семен Петя гир-гирöн серöктас да вочавидзас:
— Асывнас джодж вомöн вуджигöн лыдди да, квайтнанныс юраöсь вöлiны.
Миянсянь матын олöны бур тöдсаяс, гозъя. Вель уна во кöзяиныс тшöкыда волiс гортас шатлалöмöн. Таво паныдасим майся гажъяс дырйи да эг тöд, быттьö ладинеч. Весиг вина дукыс оз кыв. Коли гоз-мöд тöлысь. Век öткодь. Коркö тшöтш веськалiс мир туй вылын кыр улö лэччигöн.
Юалi:
— Мый нö, кодируйтчин?
— Да эг, ворснысö некодкöд.
— Кыдз сiдз? — водзö нуöдi сёрнисö.
— Со кыдзи век вöлi. Гöтырысь пыр дзебышта доз джынсö, а сiйö век аддзö. Гожöмнас пачтö ог ломтывлöй да бöръяысьсö сюйи сэтчö бумаг-лöп пиас. Менö гöтыр мöдöдiс «чуткыны» пывсян, содтöд шуис, мый гортын пукалiгöн мыйлакö кутi коддзыны. Видла пö корсьны. Мыйдыракö петавлi, лöсьöдi ставсö, пыра, гöтырöй пач водзын пукалö. Чужöмыс да юрсиыс ставнас дзирдалö. Юала:
— Мый нö лои?
— Террористъясыд миянö нин волöмаöсь.
Вöлöм, петалiгкостi ломзьöдöма пачсьыд лöп-ёгсö, доз джынйыд менам и пезьдöма. Та бöрын тшöктö пызан вылын видзны. Со и талун пöшти дзонь доз сулалö, сöмын юнысö оз ков. Воши кöсйöмöй.

Евгений Расов,
Руч.