– Ме медицинаын уджала 44 во нин, да некор на эг каитчыв, мый бöрйи буретш тайö, челядьöс бурдöдысь медсестралысь специальносьтсö, – эскöдіс Кулöмдінысь авъя, мича ань Наталья Михайловна Липина…

Наталья Михайловна – уджвывса ветеран. Уна вося бур уджсö пасйисны «Ударник коммунистического труда» пасöн, бурдöдан министерстволöн, районса администрациялöн, районса шöр бурдöдчанінлöн почёт грамотаясöн. Уджалан котырас пыдди пуктана морт. Пыр зільö отсавны выль локтöм уджалысьяслы, том специалистъяслы пырöдчыны уджаныс, медсестраяслы кöть бурдöдысьяслы. Пыр нырччис бурдöдчанінлöн öтувъя олöмын да уджын: ас кадö спортын, волейболысь сиктса ворсöмъясын дорйыліс сылысь нимсö, уджъёртъясыскöд петкöдчыліс концеръясын, водзмöстчис профкомын. Эз öтдортчыв некутшöм уджысь.

Прöст кадсö коллялö сьöлöмсö кыпöданторъясöн. Наталья Михайловна радейтö сьывны. Сійö 16 во нин ветлöдлö районса культура керкалöн «Эжваса дзоридзьяс» котырö, сыöдз сьылiс «Северяночкаын», петкöдчылö сиктса, районса да республикаса гажъясын. Мöд лов кыпöданторйыс – кысьöм. Таö велöдліс инькаыс на. Петкöдліс кыдзи кыны кепысь-носки, а водзö ачыс нин велöдчис кыны челядьыслы мичаа серлöдлöм паськöм. Öні аслас кыöмторъяснас пасьтöдö нин внукъяссö, сьöлöм гажöдысьяссö…
Водзö лыддьöй май 16-öд лунся газетысь.
Галина Нестерова.
Снимокъяс гижысьлöн да Наталья Липиналöн.