Пырöдчöны еннога олöмö

[ A+ ] /[ A- ]


Донын вежа Миколай Чудотворецлöн вичко-часовня бердын коймöд во уджалö вöскреснöй школа. Сэтчö ветлöдлöны школаöдзса арлыда да ичöт классъясысь зонпосни, матö дас морт. Чукöртчылöны шойччан лунъясö асъя служба либö литургия бöрын. Накöд уджалö начальнöй школа-садса воспитатель Ирма Ивановна Тимушева. 
Овмöдчöминса юралысь А.С.Нехорошев да начальнöй школа-садса директор Л.В.Захарова велöдчанiнысь вичмöдiсны жыр, медым челядьлы нуöдны «Православнöй культуралöн подув» урокъяс. Тайö урок вылын челядь унатор тöдмалöны миян йöзлöн духовнöй олöм йылысь: православнöй культура, вежа гижöдъяс, православнöй вичколöн да вежаяслöн важ олöм йылысь, а сiдзжö Евангелиеын да Важ кöсйысьöмын гижöм лоöмторъяс йылысь. Тöдмалöны лов могмöдан тöдчанлуна уна мича кыв: Мездысь, Иисус Христос, Вежаысь-вежа Ен Мам, крест, храм, вичко, öбраз да с.в. 
Ен законлöн урокъяс пансьöны вичкоса буркывъяс лыддьöмсянь. Вöскреснöй школаын челядь шедöдöны выльысь-выль тöдöмлунъяс, и оз сöмын налысь подувсö босьтöмöн, но и удж бергöдöмöн. Найö уроклöн индöм шöр мöвп серти сьöлöмсяньыс серпасасьöны, вöчасьöны, дасьтöны матыссаяслы козинъяс да открыткаяс. 
А сiдзжö велöдчöны сьывны, дасьтысьöны да петкöдчöны православиелöн медтöдчана — Рöштво, Ыджыд лун, Кулöмдiнын Петыр-Павел апостолъяслöн лунъясö. 
Каникулъяс дырйи челядь ветлывлöны Ульянаса манастырö, кöнi сёрнитöны вежа айяскöд, вочасöн пырöдчöны православиелöн культураö, босьтöны лов кыпöдан выль тöдöмлунъяс да озырлунъяс либö сiдз шойччöны ловнас. 
Август 28-öд лунö челядь кöсйöны тшöтш мунны крестöн Кулöмдiнса Петыр-Павел вичкосянь Ульянаса манастырöдз. 
Снимокъяс вылын: вöскреснöй школаö ветлысьяс.

Комментарии:

Добавить комментарий

Свежий выпуск: за 26 марта