Скöрöдумысь Ольга Валериановна Мингалёва школа помалöм бöрын велöдчис Сыктывкарса видз-му овмöс техникумын зоотехникö. Аслас специальносьт серти уджыс пырöн эз сюр да кутшöмкö кад уджыштiс йöла вöлöга вöчан Помöсдiнса заводын лаборантöн. 1990-öд воын индiсны веськöдлыны Помöсдiнса совхозлöн Скöрöдум отделениеса скöт картаöн. 
Чайтсьö, быттьö локтiс тöрын на, а кадыс лэбыштiс здукöн. Лысьтысисны сэки Эмилия Серафимовна Шомысова, Таисия Модестовна Уляшева, Мария Александровна Ефремова, Мария Александровна Божко, куканьясöс видзис Тамара Евгеньевна Пашнина. Картаын вöлi 85 мöс да 150 кукань. Мöсъясöс лысьтiсны лысьтысян аппаратöн, йöв кыскалiсны ведраясöн. Лысьтöмторсö Помöсдiнса йöла вöлöга вöчанiнö нулiсны быд асыв, гожöмын — кыкысь лун. Уджавны вöлi сьöкыд: колiс чеччыны водз да мунны картаö и зiльны сёр рытöдз. Овлiс, тöлысьясöн уджавлiсны шойччан лунъястöг. 
Скöрöдумса отделениеöн 1988-öд восянь веськöдлiс Николай Степанович Шомысов. Став сьöлöмсö сетiс уджлы. Сылöн водзмöстчöмöн 1996-öд вояс бöрын мойвиис кукань видзан пу карта лöсьöдны мöсъяслы вылö. Механизируйтiсны скöтöс кöрымöн вердöм, мыйöн кокньöдыштiсны лысьтысьысьяслысь уджсö. Сылöн отсöгöн жö 2015-öд воын воссис 240 юр вылö кирпич карта, кодöс вöчöма öнiя выль технологияяс артыштöмöн: йöв мунö проводöд, кöрым скöтлы воö дiнöдзыс, уджалöны сменаясöн да с.в. Скöт видзысьяслöн удж тöдчымöн кокняммис, мед сöмын найö зiлисны кывкутöмöн. 
— Мед эськö и томъяс локтiсны уджавны скöт дорö. Сьöкыдысь оз ков повны. Локтасны кö, отсалам ставнас и велöдам, — висьталiс Ольга Валериановна. 
Бурöн казьтывлö батьсö, Валериан Васильевич Курочкинöс, кодi нэмсö уджалiс совхозын: медводз гусеницаа трактор, сэсся МТЗ вылын. Пенсия вылö петöм бöрын дыр на зiлис фермаын операторöн. Уна вося бур уджысь вичмöдiсны уна пасъянтор. 
Ольга Валериановна видз-му овмöс юкöнын 1985-öд восянь. Уджын бур вермöмъяс шедöдöмысь сетiсны Россияса да республикаса видз-му овмöс министерствояссянь, районса да сиктса администрацияяссянь почёт грамотаяс. 
Кöть пенсия вылын, но пыр на уджалö. Верöсыскöд быдтiсны нёль нылöс. Медыджыдыс, Алёна, помалiс госслужбалысь академия, öнi уджалö «Помöсдiн» овмöдчöминлöн администрацияын. Виктория зiльö Сыктывкарса кöрт туй вокзалын, колльöдö поездъяс. Татьяна велöдчö Сыктывкарса госуниверситетын, Евгения помалiс öкмысöд класс. Гозъяöс гажöдöны Владик, Максим да Артур внукъяс да Диана внучка. 
— Сиктын овны позьö, эм кö тэнад бур, муслунöн кытшалысь семья, радейтана удж, кодлы сетан став сьöлöмтö, — кывкöртiс О.В.Мингалёва. 

Галина НЕСТЕРОВА.