Пыр на збодер

[ A+ ] /[ A- ]


Статистика серти лыдаöн олöны 95 арöсöдз. Енмыс кузь нэм сетiс миян мамлы, Анна Алексеевна Уляшевалы (нывдырйисö Шахова). Сiйö чужис 1925-öд вося сентябр 13-öд лунö Пожöг Шахсиктын. Сизим челядь пиысь медыджыд. Война пансян воын сылы вöлi 15 арöс. Айловöс нуисны фронт вылö, а аньясöс да челядьöс пыр жö ыстiсны уджавны кер дорö.
Тулыснас йöткалiсны моль, вöчисны пуръяс. Ставсö вöчлiсны ки помысь, пöрöдчисны да пилитчисны пöперешнöй пилаöн да черöн. Сямыд эз на вöв, да тшöкыда пилитöм керйыд пöрлiс орчча пу вылö либö усьлiс дзик мöдарö. Тшыг нисьö пöтнад аньяслöн да челядьлöн эз тырмывлi вын поткöдлыны ыджыдсьыс ыджыд чуркаяс. Кöтасьлiсны лунтыр коскöдз келалiгöн. Вермисны кöть эз, а леглiсны, сувтлыны эз позь — пыр жö, эськö, кöлуйыс йизьылiс. Шонтысьны некöн, ёна кöдзыд дырйи сувтыштлiсны бипур дорö, кöнi сотлiсны вöр коляссö. Сэнi жö и нуръясьлiсны кын няньöн да лымйысь сывдöм ваöн. Велалiсны да сэсся няньтö новлöдлiсны питшöгас. Кöть и мешайтiс уджавны, но эз нин кынмы. Ок и сьöкыда сетчис быд кубометр. Эз налöн вын серти вöв тайö уджыс. Но эскисны, мый отсалöны фронтлы – батьяслы, верöсъяслы, вокъяслы.
Кодi киас кужлiс кутны багыр, сiйö и кылöдчылiс. Сы бöрын гöрисны муяс, кöдзисны нянь, тöв кежлö скöтлы заптiсны турун, арнас идралiсны градвыв пуктас. Тöвнас бара кайлiсны вöрö. Карточ-ка вылö мый ньöблiсны лесопунктса лавкаысь, сiйö и сёйлiсны. Тшыгъялiсны, кор бергöдчылiсны гортаныс. Нуръясисны быдмöгъясöн, сiсь картупельöн, посньöдлöм ньыв пу кырсьöн.
1944-öд воын мамлы вайисны повестка, кöсйисны босьтны фронт вылö. Но война вылын ранитчöм да öти коксö воштöм бöрын Гöрд Звезда орденöн чужанiнö бергöдчöм Алексей Деомидович батьыс пыр жö мунiс Кулöмдiнö военкоматö. Кытчö нö пö нуанныд куим класс и велöдчöм нывсö?! И колисны.
Нулiсны Озъягö, кöнi колiс лöсьöдны самолёт лэбзянiн-пуксянiн. Кор юöртiсны немечьяс вылын вермöм йылысь, уджсö дугöдiсны. Öнi сэнi сук вöр. Зiлис и Керчомъяын, Немдiнын. Лопъювадын уджалiгöн нывъяскöд гусьöникöн пышйисны гортаныс Пожöгö. Кöтасисны, эз на удитны косьмыны, локтiс милиция да нуис бöр. Бур, мый эз пуксьöдны. Сэсся ставнысö ыстiсны Помöсдiнса леспромхозö вöчны бонаяс. Кольöм нэмся 50-öд воясö вуджöдiсны Вöльдiнса лесопунктö, кöнi и тöдмасисны Ёгор верöсыскöд, миян батькöд. Кыпöдiсны керка, чужтiсны, велöдiсны да ас олöмö петкöдiсны вит нылöс.
Тöвнас Анна Алексеевна олö Кужйын ме дорын, а гожöмын Вöльдiнын аслас керкаын. Талун сiйöс нимкодьöдöны 9 внук, 16 правнук да 1 праправнук.
Ольга Кузнецова.
Снимок гижысьлöн чукöртöмысь.

Комментарии:

Добавить комментарий

Свежий выпуск: 28 марта

Осторожно — мошенники!