«Миян кындзи некод» сынöдса десант войскаын служитысьяслöн тайö кывъясас пыр кутчысьö Донысь Михаил Напалков. 
Школа помалöм бöрын Михаил мунiс Ухтаö велöдчыны фельдшерö. Велöдчигмоз уджалic нин тэрыб отсöг сетан юкöнын. Армияö мунан кадö бурдöдысьяслöн комиссия бöрын сылы шуисны, мый веськалас моревывса пехотаö. Княжпогостын лоис дзик мöдног. Сэнi юалiсны, эмö кодлöнкö медицина образование, водительлöн В да С категорияяс. Михаил лэптiс кисö, да сiйöс дзик пыр босьтiсны сынöдса десант войскаö. Стöч лöсялiс и тушалöн судтаыс, да дзоньвидзалуныс вöлi ёна бур. 
Тадзи 2011öд воын Михаил веськалiс служитны Ивановоö, парашютистдесантникъяслöн 217öд гвардияса полкö. Службаысь зонлы паметьö медбура колис май 9öд лунö Москваын парадын восьлалöм. Кыдзи висьталiсны Донын олысь батьмамыс, пиыс дасьтысис парад кежлö зэв дыр, а телевизор пыр петкöдлiсны зэв öдйö. Михаил батьыслы водзвыв юöртic кутшöм рядын да кымынöдöн сiйö кутас восьлавны Гöрд изэрд вылын. Парад кежлö дасьтысигöн служитысьяслöн кадыс прöста эз жö коль. Найöс новлöдлöмаöсь музейястi да быдсикас экскурсияяс вылö. 
Армияын Михаил чеччыштлiс парашютöн витысь. Служба помасьтöдз тöлысьöн водзджык сылы звöнитлiс Ухтаысь уджъёртыс да вöзйис локны уджавны парашютистдесантникъяслöн Ухтаса котырö спасательöн. Öнöдз на Михаил сэнi, тайö кывкутана удж вылын – чеччалö парашютöн, отсалö виччысьтöм лоöмторйö веськалысь йöзлы, сетö бурдöдысьлысь отсöг. Михаил гöтыра. Гозъя быдтöны нылöс. Августын виччысьöны мöд кагаöс. Уджыс кöть и уна, оз вунöд батьмам йылысь. Некымынысь вонас волывлö чужанiнö видлыны найöс да быдногыс отсавны. Донын жö Михаиллöн олö чож Александр Марксович Напалков. Сiйö тшöтш служитлic сынöдса десант войскаын 19741976öд воясын, Кострома дорын. 
Артур Гарнов. 
Снимок Михаил Напалковлöн чукöртöмысь.