Кулöмдiнса типографияын уджалiс уна том ныв. Носимсаяс ветлiсны гортсяньыс, Дереваннöйсаяс олiсны тöдсаяс ордас. Партия райкомöн да райисполкомöн веськöдлысьяс дорын редактор Н.Т.Пунегов унаысь кыпöдлiс районса газет лэдзысьясöс оланiнöн могмöдöм йылысь сёрни, да, медбöрын, вичмöдiсны общежитие вылö куим жыръя патера. Öти жырйын ми олiм печатница Лидия Гуляевакöд, кытчöдз эз ло дзескыд верöсъяс лöсьöдöм бöрын. Лидия виччысис нин кага, та вöсна ми, гозъя, петiм патеруйтны öти олöма аньлöн керкаö. Öтувъя тасьтiпаньысь ме босьтi шыд пуан доз. Шмонитiм на нывъёрткöд, мися, тайö менам приданнöй, колясыс лоö тэнад.
Колис ветымын сайö во, а пусян дознас пыр на вöдитча. Некытi эз тшык, эз розясь – сiйö кадас вöчöмыс бур вöлöма. Дерт, выль ньöбöмыс эм, но тайö дозсö шыбитны ки оз лыб: öтикö, велалi сы дорö да муса. А мöдкö, приданнöй öд, казьтывлö семьяöн олöм лöсьöдöмöс.