Помöсдiнын кыпалiс выль карта

[ A+ ] /[ A- ]

«Помöсдiн» кооперативлöн Помöсдiнын вевт улын нин 200 юрлы выль скöт карта. Артмис «Монди СЛПК» компаниялöн отсöгöн. Уджалö «Ижагротехстрой» котыр. 2017-öд воын вöчис подув, кольöм воын лэптiс стенъяс, вевттис, пуктiс транспортёрлысь юкöн, нюжöдiс ва да канализация. 
— Öнiя картасö, кодöс кыпöдлiсны 1978-öд воын, колö дзоньтавны вужвыйöн. Вевтыс виялö, оборудованиеыс сiсьмис. Сы бердö и кöсйим босьтчыны, но öти гожöмöн эськö эз артмы да скöтсö йöртны лоис некытчö. Вöльдiнын да Бадьёльйылын картаяс сиптöм бöрын мöсъясöс да куканьясöс вайим татчö да Скöрöдумö да лоис уна. Со и шуим важыскöд орччöн кыпöдны выльöс. Видз-му овмöс министерствоöн котыртöм конкурсö пырöдчытöдз шыöдчи районса администрацияöн веськöдлысь С.В.Рубан дорö, мед отсалас «Монди» пыр. Сiйö кöсйысис. Бизнес-планö пасйим, мый босьтчыны сьöм сетас «Монди» да дорйим плансö министерствоын, — висьталiс кооперативлöн правлениеöн веськöдлысь Татьяна Владимировна Уляшева. 
«Ижагротехстрой» котыр öдйöджык эштöдöм могысь кöсйис кыпöдны аслас сьöм вылö, но эз артмы, сы вöсна мый сылы эз вештысьны найö, кодъяслы уджалiсны водзынджык. Та вöсна воддза воын июльын пыдди босьтчисны августын. Лöсьöдiсны подув, сюйисны сваяяс. «Мондисянь» вичмис 2,2 миллион шайт, да кооператив вештысис котырлы. Министерство бергöдiс видзöм сьöмлысь 70 процентсö, да кооператив сетiс «Ижагротехстройлы» и сiйöс. Мед уджавны водзö, колiс вештысьны водзвыв да ставнас. Тайö öдйöсö эз артмы да сы вöсна и нюжалiс кадыс. Сэтчö жö карта кыпöдысьяс локтiсны эз мартын, кыдзи колiс, а августын. Кооператив вештысис налы стен да вевт вöчöмысь, подулö бетон кисьтöмысь. Öнi виччысьöны министерствосянь вöчöм уджысь видзöм сьöмлысь юкöн. 
Колис пуктыны öшиньяс, йöв кöдзöданiнö вöчны вежöс, лöсьöдны скöтлы сулаланiнъяс, юктöданiнъяс, нюжöдны би. 
— Колöм воын «Монди» отсалiс бара, торйöдiс 2,8 миллион шайт. Вужвойтырöн бöрйöм йöзлöн чукöртчылiгöн аттьöалi вöр заптысь ыджыд котырöс да бара шыöдчи отсöгла. Колö кöрым посньöдлан да разöдан агрегат, йöв кöдзöдан. Бöръясö регыд ваясны нин. Эскам, мый таво пырам выль картаö, — кывкöртiс веськöдлысь. 
Мöсъяс кутасны сулавны куим визьын, куканьяс нёльöдас. Выльö вуджасны важ скöт картаын уджалысьяс. Босьтасны тырсьöдчысьöс. Лоасны мыссянiнъяс, асмогасянiнъяс, шойччан жыр, нуръясянiн, мöсъясöс тырсьöданiн. Кипом удж коляс бöрö. Сэсся кöсйöны вужвыйöн дзоньтавны важ скöт карта да видзны сэнi куканьясöс. 

Марина ДАДАШОВА. 
Гижысьлöн снимок вылын: выль скöт карта.

Комментарии:

Добавить комментарий

Свежий выпуск: 28 марта

Осторожно — мошенники!