«Ленин туйöд», 1970 вося январ 13-öд лун
А найö быттьöкö тунъяс

Фармацевтъяс… Греческöй кыв вылысь кö вуджöдны тайöс коми вылö, лоö со мый. Фармокология — сiйö лекарственнöй веществояслöн организм вылö действуйтöм йылысь наука. А фармацевтъяс — йöз, кодъяс вöчалöны лекарствояссö, аптекаса уджалысьяс.
Тi нёрпаланныд. Врач гижис рецепт. Тi котöртанныд «дзоньвидзалунла» аптекаö. Танi пыр сулалö чöв-лöнь. Сöмын корсюрö кывлас стеклöа дозмукъяслöн ёсиник звöныс. Стеклöысь жö вöчöм витрина да öшинь сайын сулалöны еджыд, сöстöмысла дзуртысь халата да кöсынкаа нывъяс, нывбабаяс.
Рецептар примитö пациентлысь рецепт лекарствояс вылö да висьталö та йылысь ассистентъяслы. А найö — Галяяс. Галя Мартюшева велöдчис Ленинградскöй фармацевтическöй училищеын, а Галя Липина тулыснас воис рöднöй сиктас Сыктывкарса фармацевтическöй училище жö помалöм бöрын. Школаын на нывъясöс кыскис медицина, сöстöмлун. А кор зрелосьт аттестат воис кианыс, сiйö восьтiс туй фармакологиялань. Уджö нывъяс босьтчисны сьöлöмсяньыс. А радейтана уджыс налы вайö радлун.
Порошокъяс, растворъяс, мазьяс вöчигöн стерильносьт, и мед лекарствоясыс артмисны дзик сiдз, кутшöмöс гижис врач. Сiдзкö, колö тöдны оз сöмын лекарствояслысь нимъяссö да вöчанногсö, но весиг пациентлысь висьöмсö. Мый артмас, фармацевт кö сетас сылы мöд пöлöс лекарство?
Стерильнöй да син лекарствояссö нывъяс прöверяйтöны титруйтöмöн да рефракторметрöн. Тi öд аддзывлiнныд, кутшöм сöстöмöсь да югыдöсь син либö мöд пöлöс лекарствояс?
Эз на вöвны Усть-Куломса аптекаын ни Галя Липина, ни Галя Мартюшева, Галя Ногиева да Галя Тимушева, а таöдз уна вояс чöж нин аптекаын уджалöны олöма-джык нывбабаяс. Со Дина Константиновна. Д.К.Евтушенко локтiс аптекаö 17 во сайын. Ассьыс специальносьтсö тöдöмöн, сiйö кужöмöн жö веськöдлö аптекаöн. Дина Константиновна да сылöн коллегаяс киын 5 участкöвöй больнича, районса детскöй учреждениеяс, 30 медпункт да сы мында жö аптечнöй пункт. Быдлаын виччысьöны Усть-Куломса фармацевтъяссянь дона лекарствояс. Абу жö нин этша, 13 да 12 во, сетöма радейтана уджлы Нина Малаховалöн, Таисия Цгоевалöн, Нина Кипрушевалöн. Ставныс найö босьтiсны специальнöй образование Архангельскöй да Ленинградскöй училищеын. Бур преподовательлысь озыр тöдöмлунъяссö ас-сьыныс уна вося опытсö найö окотапырысь сетiсны томджыкъяслы, кодъяс муртса на воисны средньöй школаысь. Миян сиктса аптекаын лоис нин традицияöн: во-мöд уджавны аптекаын, а сэсся мунны тöдмавны фармокологиялысь шензьöдана гусяторъяссö специальнöй учебнöй заведениеясö. Тадзи вöлiс и Галя Ногиевалöн, и Галя Мартюшевалöн. Шань сьöлöма нывбабаяс кужисны öзтыны ярджыка нывъяс сьöлöмын фармокология дiнö муслунсö.
Талун со локтiсны кык томиник нывка — средньöй школаысь выпускницаяс — Светлана Лобанова да Нина Ногиева. Найö санитаркаяс. А мыйöн фармацевтическöй училищеяс чукöстасны экзаменъяс вылö, нывкаяс лэбзясны тöдöмлунъясла.
В.Попова.
Кулöмдiн.

Снимок интернетысь.