1945 вося май öкмысöд лун. 14 арöса Öлексей чеччис шондi петтöдзыс на да мöдöдчис кыйны утка. Коми муын восьлалiс тулыс, но поводдяыс вöлi тöв кодь на. Гöгöр лым толаяс, швучкö кöдзыд тöв. Юыс сöмын на босьтчöма серöссьыны, кытсюрö тыдыштöны ва визьяс. Öлексей мунiс Помöс ю пöлöн, но пöткаяс эз жбыръявны. Дыр ветлöдлöм бöрын бергöдчис ю кузяыс Изперйöмланьö горув. Матыстчис сэтчö да казялiс утка котыр. Нимкодьысла кватитiс ружьесö да дзик öтчыд лыйис. Усис куим утка. Нэм чöжыс Öлексей кыйсис, но татшöмторйыс сэсся некор эз и вöв. Öтчыд лыйöмöн куим лэбач! Öдйö пуктiс кыйдöссö нопъяс да котöрöнмоз Подь тыла пыр мöдöдчис гортас.
Грездын вöлi лöнь. Керка дорö матыстчигöн кылiс гöлöсъяс. Медводз кывзысьыштiс, а сэсся колхоз правление дортi мунiгöн кылiс йöзлысь нимкодьпырысь горзöмъяс: «Победа! Победа!»
Зон пыртiс нопсö гортас да котöртiс правлениелань. Сэнi чукöртчöмаöсь аньяс. Председательлöн киас вöлi гöрд дöрапас. Найö казялiсны Öлексейöс да матыстчисны сыланьö. Öта-мöдсö вежöмöн быдöн висьталiс Ыджыд вермöм йылысь. Зон гöгöрвоис, мый колö лэптыны дöрапассö правлениелöн керка вылö, да оз вермыны. Öлексей босьтiс дöрапассö да кайис вевт вывсьыс шыблалöм лым чукöрöд правление вылö, тувъялiс беддьсö кер помас. Дзик пыр жö сiйöс кватитiс тöв, да кумачыс кутiс кыпыда дöлавны правление весьтын. Зон сулалiс орччöн. Öлексейлы эскыссис, мый сiйöс аддзöны ыджыдджык вокъясыс: 1944-öд воын вöрöгкöд тышын юрсö пуктöм Вась да Веня, кодi вöлi война вылын на, да став салдатыскöд öтув, весиг накöд, кодъяс Берлинын, тшöтш нимкодясьöны дыр виччысяна Победалы, Победалöн знамялы. Зонлöн шорöн визувтiс синваыс.
Мöвпъяснас важас бергöдчылiгöн Сордйылысь менам чож Алексей Иванович Поповлöн синваыс петö и öнi. Эз тöдлы шуда челядьдыр, верстяммис кадысь водз. Буретш сiйö чужан сиктас Победа лунö öшöдiс дöрапас.
Грездлы тöдчана лоöмтор йылысь сылысь казьтылöмсö и пасйыштi. Тавося август коймöд лунö менам чожлы тырас 89 арöс. Пöрысь морт помтöма аттьöалö чужан му дорйысьясöс, Ыджыд вермöм шедöдысьясöс. Аттьöалана пöсь кывъяс висьталам и ми.
Алёна ИГНАТОВА.
Сордйыв.