Пленын морттуйсö эз вошты

[ A+ ] /[ A- ]

Кулöмдінысь Николай Иванович Гуляевлы февраль 27-öд лунö тырис эськö 101 во. Сійö чужис да быдмис Дереваннöйын, кöні велöдчис 7 класс, сэсся Кулöмдінын помаліс шöр школа. Пöльыс вöлі купечöн, а батьыс 1921-öд воын гижсис доброволечöн Гöрд армияö да муніс накöд Щугöрö, кöні и пуктіс юрсö. Гöтырыс колис куим челядьöн. Николайöс быдтіс пöльыс, сійö и велöдіс. 1937-öд воын зонмöс босьтісны армияö, веськаліс мотострелкöвöй полкö. Кык во мысти вуджöдісны Бессарабияö. Вöлі полкса радиостанциялöн командирöн. 1941-öд вося июнь 22-öд лунö налöн полк медводдзаяс лыдын веськаліс вöрöглöн би улö. Зэв унаöн пыр жö пöгибнитісны. Кольöмъяс мунісны асыввылö, но веськалісны кыйöдчысь фашистъяс шöрö да шедісны пленö. Видзисны зэв лёка, дзик Австрия да Венгрия граница вылын. Бöръяпомыс эз нин вермы ветлöдлыны. Öтчыд сэтчö локтіс кутшöмкö айлов, сёрнитчöмöн босьтіс Николайöс, кöрталіс велосипед багажник вылас да нуис гортас. Сылöн вöлöма зэв ыджыд овмöс, уна скöт, код бöрся и ковмис дöзьöритны Николайлы. Унджыкысьсö айлов сёйліс сійö жö, мый пуліс скöтлы. Тадзи колис ловйöн. Вöлöмкö, кöзяиныслöн пиыс, коді усис Сталинград дорын, чужöмнас зэв ёна мунiс Николай вылö, та вöсна и босьтіс зонмöс ас дорас.
Николайöс пленысь мездісны англичанаяс, кор воссис мöд фронт. Нуисны Лингрен карö, кöні вöліны рочьяс. Гöгöрбок туялöм бöрын Николайöс вежисны немеч-военнопленнöй вылö. Кыдз пленö веськавлöмöс, Николайöс ёна туяліс СМЕРШ-8 котыр. Россияö воöм бöрын мöдöдісны запаснöй полкö, а нёль лун мысти 228-öд гвардейскöй полкö разведчикöн, сы вöсна мый бура тöдіс немеч кыв. Тасянь и демобилизуйтчис 1946-öд вося май 4-öд лунö. Николайöс пасйисны «За победу над Германией» да юбилейнöй медальясöн, эм Великöй Отечественнöй войналöн орден. А мамыслы куимысь воліс пиыслöн кувсьöм йылысь гижöд. 
Гортас локтöм бöрын Николайöс мöдöдісны Кулöмдінса леспромхозö радистöн, а сэсся курсъяс бöрын вуджöдісны планöвöй юкöнö. Во-мöд мысти, кыдзи бур да водзмöстчысь уджалысьöс, индісны юкöнöн веськöдлысьöн, кöні зілис пенсия вылö петтöдз. Павла Александровна гöтырыс уджаліс сэні жö. Быдтісны, велöдісны да петкöдісны асшöр олöмö куим пиöс да кык нылöс. Николайлöн Василий, Öльöксан да Леонид вокъясыс тшöтш воюйтісны. Öльöксан усис вöрöгкöд тышын. А со Василий да Леонид унаысь «чуткылісны» Николайöс, шулісны сійöс предательöн, юасисны, мыйла сійö эз лыйсьы, кор веськаліс немечьяс дорö. Тайö налы вöлі быттьö сьöд пасöн, коді öшаліс налöн семья вылын да кодöс нинöм эз вермы вуштыны. 
1987-öд воын Кулöмдінö воліс Сöветскöй Союзса Герой Ложкарёв, коді тшöтш веськавлöма пленö, но вермöма пышйыны некымын пленнöйкöд «Юнкерс» самолёт вылын. Йöзкöд аддзысьлöм бöрын сійö дыр сёрнитіс Николайкöд син на син. 
Николай Иванович сетіс компартияö пырöм йылысь шыöдчöм, но сійöс бöрыньтісны, кыдзи пленын вöвлöмаöс. 
Уна вося бур уджысь Николай Ивановичöс пасйылісны дона козинъясöн, пыдди пуктан грамотаясöн, эм «Уджвывса ветеран» медаль. Кувсис Николай Иванович 1992-öд вося май 26-öд лунö. 
Валентина Нестеренко, 
Кулöмдінса олöма йöзлöн 
котырöн веськöдлысь. 
Снимок вылын: Н.И.Гуляев.

Комментарии:

Добавить комментарий

Свежий выпуск: за 27 июня