Ноябр помын Пожöгса библиотека пасйис 115 во тырöм. Кыдзи гижöма архивлöн документъясын, медводдза библиотекаыс вöлiс вичкоын. Воссис сiйö 1904-öд воын Вöлöгдаса губерниялöн индöд серти. Сэнi артавсис 100 небöг. Гражданскöй война помасьöм бöрын воссис лыддьысян керка, кöнi медводдза уджалысьöн вöлi Попвасев. Сiйö школаын нуöдiс тшöтш и физкультура урок. 1952-öд восянь библиотека кутiс лыддьысьны сиктсаöн. Нэмысь дырджык кадöн танi зiлис уна уджалысь: 1946-1952-öд воясын — Иван Васильевич Мингалёв, 1952-1954-öд воясын — Людмила Алексеевна Третьякова, 1954-1955-öд воясын — Диана Константиновна Тимушева, 1955-1981-öд воясын — Мария Егоровна Зайкова, 18 во — Надежда Селивёрстовна Напалкова, кутшöмкö кад уджыштiсны Нина Дмитриевна Печеницына да Галина Александровна Пашнина. Öнi библиотекаöн юрнуöдö Полина Борисовна Сенькина. Сiйö пöся вочаалö быд лыддьысьысьöс, верстьööс кöть челядьöс. Нуöдлö быд сикас рытъяс, конкурсъяс, аддзысьлöмъяс да с.в. Сылöн лыддьысянiнын пыр кыпыд, гажа да шоныд. Танi, майбыр, эм мый лыддьынысö — газет-журналъяс, книгаяс — бöрйы, мый сьöлöмыдлы колö. Лыддьысьысьыс век тырмö.
Со и библиотекалöн чужан лунö волiсны бур ёртъяс, енбиа йöз, челядь да небöг радейтысьяс. Гажсö нуöдiс Пожöг шöр школаса велöдысь Татьяна Владимировна Шустикова. Лыддисны кывбуръяс, ворсiсны, сьылiсны да йöктiсны Мария Попова, Матвей Сенькин, Сергей Лодыгин, Анжелика Бугримова, Александр Третьяков, Яков Шебырев, Валерия Шахова, а сiдзжö «Капелька», «Веснянка», «Йöлöга», «Шудлун» да «Зарань» котыръяс. Ёна гажöдiсны Пожöг шöр школаса велöдысьяс да Кекурса садйö котралысь челядь. Аттьöалан кывъяс висьталiсны библиотекалöн бур ёртъяс Галина Николаевна Сенькина да Светлана Борисовна Шахова. Став локтысьöс ёна гажöдiс ёма бабаö пасьтасьöмöн Ольга Алексеевна Калинина.
Полина Борисовна пасйис книга медъёна радейтысьясöс: медся том лыддьысьысь Вадим Ульныровöс, верстьöяс пöвстын лыддянтор медся тшöкыда босьтысь Татьяна Владимировна Шаховаöс, а челядь пöвстысь — Лилия Дмитриевна Шаховаöс. Аттьöалiс и библиотекалы уна книга козьналысь Мария Калистратовна Шебыреваöс, быд уджын отсасьысь Светлана Николаевна Третьяковаöс, Анна Владимировна Третьяковалысь медся лыддьысьысь семьяöс.
Полина Борисовналы сиа быд бурсö, мед сылöн лыддьысянiнын пыр вöлi уна небöг радейтысь и удж вылö мунсис окотапырысь. Аттьö сиктса йöзсянь да лыддьысьысьяссянь миянöс пыр шоныда да сьöлöмсянь вочаалöмысь.
Анжела Ильина.
Пожöг.