Пановтны лёклань сетчöм

[ A+ ] /[ A- ]

2015-öд восянь районса бурдöдчанінын уджалö психиатр-нарколог Анна Евгеньевна Шебырева. Ёна-ö юöны районын, дурмöдчöны-ö наркотикöн, унаöн-ö вермöны шыбитны юöм да куритчöм — бурдöдыськöд талунъя сёрниын. 
— Анна Евгеньевна, унджыкöн ли этшаджыкöн кутісны юны нёль во кольöм бöрын? 
— Районын юöны ёна, мый йылысь висьталöны лыдпасъяс. Быд во нарколог дорын пасйöмöн сулалысьлöн лыд содö шöркодя 50 морт вылö. 2017-öд воын кö вöлі 457 морт, то кольöм воын 512 нин. 2017-ын кулöм вöсна пасйöдысь киритім 11-öс, кольöм воын 26-öс. 2017-öд воын медводдзаысь миян дорö веськалiс 109 морт, кольöм воын – 159. Юöны айловъяс, аньяс, томъяс и пöрысьяс. 
— Кыдзи морт веськалö пасйöмъяс лыдö? 
— Эмöсь йöз, кодъяс локтöны асьныс – гöгöрвоöны, мый вина кутіс вайöдны помö, курыдтор вöсна кутіс киссьыны олöм. Видзöдлас улö босьтам юöм вöсна йöйталан висьöм кöвъялысьясöс, найöс, кодъяс веськалöны бурдöдчанінö. Районса морт кö веськаліс татшöм висьöмöн Сыктывкарса бурдöдчанінö, миянлы юöртöны жö. Унаöн кутісны локны судлöн кывкöртöд серти (татшöмъясыс тшöкыдджыка веськалöны код юрöн кутшöмкö мыж вöчöмысь). Мöдöдö бурдöдчыны юысь мамъясöс опекалöн да попечительстволöн юкöн. Ас окотаöн, дерт, локтöны этшаöн, миян дорын пасйöмъяслöн витöд пайыс. Татшöмъяссö бурдöднысö кокниджык, сы вöсна мый юöмысь дугдыны кöсйöны асьныс. Татöг бурдöд кöть эн. 
— Кыдзи бурдöданныд? 
— Ён пöкмелляысь да вошласьöмысь петкöдам лекарствояс отсöгöн, весалам вирсö. Юысь мортлöн висьöны сьöлöмыс, мускыс, вöркъясыс, торксьö юр вежöрыс. Бурдöдам и найöс. Колö шуны, юöм вöсна юр торксьöмсянь вермытöмöн лоис 27 морт. Татшöм йöзыслы, дерт, эськö зэв колö и психотерапевтлöн отсöг, но сійö миян бурдöдчанінын абу. 
— Эмöсь-ö сэтшöм йöз, кодъяс дзикöдз шыбитісны юöм? 
— Лыддьыссьö, мый морт бурдіс, сійö кö эз видлы весиг вина войт куим во чöж. 2017-öд воын пасйöмысь киритім 17 мортöс. Тайö, дерт, зэв этша. Öти айловлы куим воöдзыс эз тырмы душ-мöд тöлысь – олöмас кутшöмкö сьöкыд здукъяс бöрын бара юсис. Кыдз шуласны, выныс эм, вöляыс абу. Но колö кутны тöдвылын, мый морт кö шыбитіс, сылы сэсся оз позь видлыны весиг войт, сы вöсна мый öти румка вермас кыскыны бöр важас. Алкоголизм, кыдзи висьöм, олö морт пиын нэм чöжыс, и сылöн, кöсйö кö овны, сöмын öти петан туй – некор не юны. 
— Кодъяс ёнджыка юöны? 
— Юсьыны вермас кöть судзсьöмöн, кöть гöля олысь морт. Но векжö морт, кодлöн эм удж, кутчысьöджык. Эмöсь семьяяс, кöні юлöмаöсь пöль-пöчныс, юöны бать-мамныс, налöн кок туйöд мунöны и челядьныс. 
— Ыджыд-ö арлыдаöсь медся том юысьяс? 
— Лёк оласнога семьяясын курыдтор видлалöны 13-14 арöсаяс. Татшöмъяссö кутам дöзьöр улын, корлам ас дорö, сёрнитам. Корлам эськö и бать-мамсö, но найö волöны зэв гежöда. А челядь вöчöны сійöс, мый быд лун аддзöны гортсьыныс. Найö гöгöрвоöны, мый веськодьöсь бать-мамныслы, а вина доз век сюрö. Та вöсна 18 арöса алкоголикъяс оз шензьöдны. Ёна юöны ичöт сикт-грездъясын – Дзолльын, Вочын, Кекурын, Пожöгын, Мысын. 
— Тіян видзöдлас вылö, мыйын помкаыс? 
— Кыдз шуласны, юысьыдлы помкаöн вермас лоны дзик быдтор: удж абу — юöны, удж сюрис- «мыськыштны» колö да с.в. Ме серти, юöмлöн помкаяс йитчöмаöсь öти гöрöдö, и сійö зэв зэлыд: тані и уджтöмалöм, и оласног, и генетика, и социальнöй мытшöдъяс. Казялöма – кызвын юысь бать-мамлöн челядьыс юöны жö. Татшöмъясыс оз тöдны, мый вермас лоны мöд оласног. Юалан том мортлысь, мыйла юö, и сійö вочавидзö, а мый пö сэсся вöчнысö? 
— Мый вöчсьö, медым öлöдны томуловöс лёк оласногö сетчöмысь? 
— Та вöсна кывкутöны унаöн. Öлöдан удж нуöдöны бурдöдан, велöдан юкöнъяс, культура, спорт, тыр арлыдтöмъяслöн делöяс кузя комиссия, полицияса уджалысьяс. Миян эм профилактикалöн жыр. Сэтысь фельдшер ветлöдлö школаясö, сёрнитö челядькöд, мыйö вайöдö вина юöм да пагöдчанторъясöн дурмöдчöм. Зэв бура котыртöма öтувъя удж Кулöмдінса шöр школакöд. Велöдысьяс асьныс вайöдлöны миян дорö томуловöс, казялöны кö, мый найöс шыбöлитіс бокö. Мукöд школаясын диспансеризация нуöдігöн торйöн сёрнитам накöд, кодъяс вермасны сетчыны лёклань. Татшöмъяссö бара жö индöны велöдысьяс, öд нывкаяс да зонкаяс пыр налöн видзöдлас улынöсь. Садса челядьлысь нин позьö казявны, кутшöм семьяясын лэптавлöны стопкаяс: зонпосни ворсігöн тшöтш окотапырысь «тотшйöдчöны румкаясöн». 
— Челядьöс вайöдлöны тіян дорö велöдысьяс, а бать-мам? 
— Гежöда, но овлö, мый вайöдлöны и бать-мам. Унаöн, буракö, полöны, мый öтчыд миян дорö ныв-зонлöн веськалöм бöрын ми пыр жö найöс пасъям, и велöдчысьлöн нэм кежлас сэсся коляс «сьöд» пас. Тайö абу тадзи. Ми сёрнитам кагакöд, видлам гöгöрвоны, мыйла сетчис лёкторлань. Ныв-пиныслысь юöм казялöм бöрын бать-мам босьтчöны горзыны, лёксьыны да тайöн öтдортöны каганысö. Колö быть петкöдлыны томуловöс бурдöдысьлы. Вель тшöкыда овлö, мый гортас кага бур дöзьöр улын, а школа помалöм бöрын бокын водзö велöдчигöн кутöдыс бырö, да вöйтчö быдсяма лёкас. 
— Ёна-ö паськалöма наркотикъясöн дурмöдчöм? 
— Витöн наркотикъяслöн налькйö шедöмъяс, а куимöн öтырышъя дурмöдчысьяс. Тавося январын реанимацияын куйліс том морт, яйыс гöгöр укол туйяса. Вöлöмкö, вöчалö ачыс аслыс. Висьтасис, мый уколасьöм бöрын öти лунöн вермö бергöдны кык лунся удж, лов вылас кыпыд. Но тайö кыссьö регыд, вочасöн морт укшальмö да выныс сылöн абу часся удж бергöдöм вылö. 
— Кыдзи казявны, мый ныв-пикöд абу ставыс бур? 
— Медводз оз ков лоны кага дорö веськодьöн. Сэки пыр и аддзанныд, мый абу ставыс бур. Сійö дугдö велöдчыны, быттьö зільö мыйкö дзебны тіянысь. Эн полöй шыöдчыны бурдöдысь дорö. Мед эськö эз ло сёр. 
— Эмöсь-ö токсикоманъяс? 
— Эмöсь жö. Бать-мамлы колö чошкöдны пельяс да паськöдны синъяс, казяласны кö, мый кагалöн кыськö лоисны клейяс, кöм краситан аэрозольяс, газ баллонъяс, кöлуйсьыс кö кылö кутшöмкö химия дук. Мортыс бара жö укшальмö, лэдзчысьö, омöльтчö вежöрыс, сійö век быттьöкö зэв ёна мудзöма. Татшöмторъясöн дурмöдчöмысь мортыслы каститчö, быдсяматорсö дукалöмысь сідзжö позьö кувны. 
— Уджаланныд-ö куритчысьяскöд? 
— Куритчöм – сэтшöм жö дурмöдчöм. Куритчöмысь дугöдчан жырйö 2017-öд воын воліс 296 морт, шыбитісны 50-öн. 2018-öд воын 495 шыöдчысь пиысь дугдісны куритчöмысь 75-öн. Унаöн дугдылöны, сэсся босьтчöны бöр. Медся сьöкыд кутчысьны медводдза во джынсö. Куритантор – наркотик, сыысь дугöдчигöн мортлы лёк, висьö юрыс, кайö давленньöыс, сійöс ставыс быттьö дöзмöдö. Тайöс отсалöны венны бурдöдысьöн индöм лекарствояс. Миян дорö шыöдчылiс öти айлов. Луннас сылöн вöлöм мунö вит сигарет пачка. Дзикöдз шыбитны эз вермы, чинтысьыштiс сöмын да öнi куритö куим пачка. А артавны кö, мыйта сьöм та вылö мунö тöлысьнас, вонас? 
— Öти тöдсасянь кывлі, мый морт кö дыр куритчö, сылы шыбитны оз позь, лоас лёкджык. 
— Тайö абу тадзи. Куритчöмысь шыбитны колö и позьö кöть кор, сöмын дыр куритчысьяслы тайöс колö вöчны вочасöн. 
— Аньяс куритöны вöсньыдик, чöскыд кöра сигаретъяс. Мый ті верманныд шуны та йылысь? 
— Татшöм сигаретъясыс вайöны весиг ыджыдджык лёктор, öд сэні быдсяма чöскыд кöр сетысь химия сорасыс унджык. Нывъяслы оз ков чайтны, мый найö бурджыкöсь. 
— Некымын во сайын босьтчисны куритны электроннöй сигаретъяс, кодъяс пö оз вайны некутшöм лёк. 
— Сöрöм! Электроннöй сигарет вылö «пуксьöдöны», кыдзи наркотик вылö, том йöзöс. Ва сорасын, кодöс найö шпуткöны, сідзжö ставыс химия. Оз ков чайтны, мый öти румкаысь, öти сигаретысь некутшöм лёктор оз ло. Эн ылöдлöй асьнытö. И видзöй ставсьыс таысь челядьнытö. 

Сёрнитіс Лидия Липина. 
Гижысьлöн снимок вылын: А.Е.Шебырева.

Комментарии:

Добавить комментарий

Свежий выпуск: 28 марта

Осторожно — мошенники!