Ордйысисны Грозныйын

[ A+ ] /[ A- ]

Кулöмдiнса шöр школаын ыджыд тöдчанлун сетöны велöдöм бурмöдöмлы да сöвмöдöмлы. Та могысь нуöдöны ыджыд удж, медым велöдысьяслысь, сöмын на босьтчысьяслысь кöть дыр уджалысьяслысь нин, кыпöдны сям. Таын тöдчана пай пуктö велöдан удж кузя директорöс вежысь Л.И.Стрельникова. Людмила Ивановна Коми государственнöй пединститут помалöм бöрын татчö локтiс уджавны 1984-öд воын. И зiльö 35 во нин. Босьтчылiс биология велöдысьöн, вöлi классöн веськöдлысьöн, лэдзис нёль класс, юрнуöдiс естественнöй предметъяс велöдысьяслöн котырöн, 1998-öд восянь — велöдан удж котыртöм кузя директорöс вежысь. Могыс сылöн уна туйвизя: енбиа челядькöд уджалöм, профильнöя велöдöм котыртöм, методика, эксперимента уджъяс пуктöм да с.в. Енбиа челядькöд колö уджавны сы могысь, пасйис сiйö, медым найö велöдчисны бурджыка, петкöдчисны конкурсъясын, олимпиадаясын, ыджыд вермöмъяс вайисны школалы. Оз весьшöрö школа олимпиадаяс кузя петав медбуръяс лыдö. Ыджыд отсöг сетöны том специалистъяслы. На дорö сувтöдöны туйдысь-велöдысьясöс, кодъяс школаын зiльöны уна во нин. Найö медводдза кадас отсалöны дасьтысьны урокъяс кежлö, нуöдны восьса урокъяс, водзö видзöдöны налöн удж бöрся.
— Медся ыджыдыс, дерт, методика удж пуктöм, — висьталiс Людмила Ивановна. — Сöмын на босьтчигöн сiйöс колiс лöсьöдны тшупöдъяс серти: велöдысьлöн уджын, методическöй котырын, сэсся школаын да район тшупöдын. Медым зумыда кутны тайö тэчаслунсö, колiс индöм быд тшупöдын нуöдны семинаръяс, ёна корсьысьны, велöдчыны. И пыр на сiдзи. Торйöн ёна уджалам велöдысьяскöд, медым петны конкурсъяс вылö. И колö шуны, мый эз весьшöрö ло уджалöма: бöръя дас воöн быд во на миян велöдысьяс петкöдчылiсны «Вося велöдысь» районса конкурсын да петавлiсны вермысьясöн либö медбуръяс лыдö. Конкурсын петкöдчысьясöс корсям воöн водз. Велöдчан во чöж школаса администрацияö пырысьяскöд кывзам урокъяс, видзöдам-бöръям сэтшöмъясöс, кодъяс вылö позяс кутны лача, уджавны накöд, кыпöдны, медым эз кольны школа тшупöдын. А локтан велöдчан во пансьöмсяньыс дасьтам найöс конкурс кежлö, быд боксянь артыштöмöн, медым, шуам, лючки кужис нуöдны урок, сы бöрся занятие либö мастер-класс, мыйяс медсясö овлöны вермасьöм дырйи. Бура дасьтысьöмöн миян пыр на вермылiсны район тшупöдын. А сэсся водзö нин накöд уджалам, медым петны республика тшупöдö. Сэнi миян кыкысь вöлiны лауреатъясöн да веськавлiсны медбур кöкъямыс велöдысь лыдö. Тайö — химия велöдысь Ольга Васильевна Ямщикова да ичöт классъяс велöдысь Ксения Васильевна Катышева. Школаса директор О.В.Пунеговакöд лэччылiм тшöтш карас, велöдiм, отсасим налы лöсьöдчыны. Со и таво апрельын миян англия кыв велöдысь Ольга Михайловна Сковородникова петкöдчис республикаса конкурсын. Дасьтысим öтув, и ачыс таын ёна зiлис, сы вöсна виччысим, мый петам бара на медбуръяс лыдö. Но артмис весиг унджык на — лоим вермысьöн.
— Ме и мöвпыштны эг куж, мый пета вермысьöн, — пыр на шензьö Ольга Михайловна. — И дыр на эз эскыссьы. Майын велöдöм сöвмöдан Коми республикаса институтöн котыртöм войтыръяскостса семинар вылын, кытчö волiсны Америкаса университетысь велöдысьяс, сöмын гöгöрвои, мый ме вермысь, меным бытьысь колö петкöдчыны аслам республикасянь.
И тыр öдöн босьтчисны дасьтысьны ставроссияса конкурс кежлö. Кыдзи и пыр, ёна отсасисны уджъёртъясыс. Тшöтш и велöдöм сöвмöдан Коми республикаса институтсянь, торйöн нин сайт дасьтöмын, кытчö колiс пыртны удж кузя юöръяс. Быдса июнь мунiс та вылö. И эз весьшöрö. Тайö могыс вöлi конкурслöн юкöнöн, и шедöдiс уна балл. Июльын Москваын вöлi конкурсын петкöдчысьяслöн семинар. А сэсся заочнöя гижисны сочинение сяма эссе, мыйысь Ольга Михайловналы бара на вичмис уна балл. Август помын колiс нин дасьтысьны урок кежлö, кодi вöлi конкурслöн медшöр юкöнöн. Сюрöсыс вöлi тöдса нин, сы вöсна мый урчитлiсны водзвыв. Медводз дасьтысис школаын, чукöртiс материал, сэсся вежон чöж уджалiс Сыктывкарын, уна сикас школаясын да классъясын сетiс урокъяс.
«Вося велöдысь» ставроссияса конкурс таво вöлi комынöдысь и мунiс сiйö Чечня республикалöн Грозный карын. Сэнi, сы вöсна мый кольöм воын Россияса конкурсын вермис буретш татчöс школаса велöдысь. Таво петкöдчис Россия Федерацияысь 85 велöдысь, медтомыслы вöлi 25, медыджыдыслы 51 арöс.
— Ольга Михайловнаысь кындзи ветлiм Грозныйö нöшта куимöн — ме, Ольга Владимировна Пунегова да велöдöм сöвмöдан Коми республикаса институтысь Наталья Николаевна Новикова, медым отсавны дасьтысьны. Сёрнитiм конкурсын мукöд петкöдчысьяскöд локтысь отсасьысьяскöд, видзöдiм, мый вылö нöшта колiс сетны тöдчанлун дасьтысигöн, мед быд тырмытöмтор лоис бырöдöма. Кадыс лэбис öдйö. Конкурс дырйи урок вылö ми, дерт, эг веськалöй. Мунiс сiйö сентябр 23-öд лунö öтиöд номера математика пыдiсянь велöдан школаын. Урок вылын вöлiны сöмын велöдысь — конкурсын петкöдчысь, челядь да донъясян котыр. Ставсö снимайтiсны, öттшöтш уроксö позис видзöдны интернетын. Орчча жырйын видзöдiм компьютер пыр. Колö шуны, мый Ольга Михайловна ассьыс сямсö, кужöмлунсö да вынсö пуктiс став 200 процент вылö. Трансляцияыс мунiс Россия пасьта. Миян велöдысьяс видзöдiсны тшöтш, «висисны» уджъёрт вöснаыс, звöнитчисны, вöзйисны бурсиöмъяс. Тайö жö лунö юöртiсны конкурслöн мöд юкöнлöн, «Урокбöрся занятиелöн» сюрöс йылысь. Сы кежлö дасьтысьны кадсö сетiсны сöмын кык лун, но та вылö видзöдтöг, Ольга Михайловна петкöдчис зэв бура, — водзö сёрнитiс Людмила Ивановна.
— Меным мойвиис волыны кык велöданiнö: öтиöд номера математика школаö, кöнi мунiс конкурсыс, да 14-öд номера гимназияö, кöнi вердiсны миянöс, — висьталiс тшöтш Ольга Михайловна. — Найö зэв бурöсь, республикалöн опорнöй школаяс, артыштöма матö сюрс челядьлы. Сэнi ыджыд актöвöй залъяс, коридоръяс, классъяс, ставсö зэв мичаа вöччöдöмаöсь. Классъясыс гырысьöсь, торйöн нин 14-öд номера гимназияын ичöт классъясыс, кöнi öтпырйö велöдчö 50-ысь унджык челядь. Велöдчысьяс ставныс öткодь мича паськöмаöсь. Нывъяс платтьöаöсь, еджыд фартукаöсь да чышъянаöсь. Зэв вежавидзысьöсь. Гашкö, сiйöн урок вылын квайтöд класса челядь пукалiсны кутчысьöмöнджык. Сэкжö уджалiсны сюся, вочавидзисны стöча. Торйöн нин сьöлöм вылö воис витöд классаяслы «Урокъясбöрся занятие» нуöдöм, кöть сы кежлö дасьтысьöмыс лоис этша. «В мире головоломок» сюрöс восьтi ворсöмъяс пыр, кытчö ныв-зон пырöдчисны зэв на и öдйö. Ме вöлi шуда, мый челядь мекöд вöлiны быттьö öти гы вылын: зэв бура уджалiсны, вочавидзисны юалöмъяс вылö, водзöссö меным сетiсны ставсö, мый ме кöсйи кывны-босьтны насянь. Асьныс нин мöвпыштiсны да вöзйисны юржугланторъяс. Ставнас конкурсыс мунiс зэв бура. Сöмын тай мукöдыслысь петкöдчöмсö видзöдны позянлуныс эз вöв, кадыс ёнасö эз вичмыв да. Мыйсюрö сöмын мойвиис видзöдны мастер-классъяс нуöдiгöн.
Сентябр 28-öд лунö кыпыда кывкöртiсны ставроссияса конкурслысь медводдза юкöн. Кывкутысь йöз пöся чолöмалiсны конкурсын петкöдчысьясöс, лыддьöдлiсны лауреатлысь ним шедöдысьясöс.
— Кöть эг веськалöй 15 медбур велöдысьяс лыдö, Россия тшупöдö петöмыс миянлы лоис зэв нин ыджыд вермöмöн. Конкурс отсалiс паныдасьны Россияса медбур велöдысьяскöд, тöдмавны, кодi кыдзи уджалö да кутшöм туйвизьяс серти. Босьтiм уна выль тöдöмлун, кодъясöс бытьысь пыртам уджö, — кывкöртiс Л.И.Стрельникова.
Висьталiс, мый дас лунöн чуктыштлiс на кад, медым видзöдлыны Грозный кар. Волiсны Кадыровлöн, Путинлöн проспектъяс вылö, «Чечнялöн сьöлöм» мечетьö да мукöдлаö. Карыслöн аслыспöлöс мичлуныс, дерт жö, пыр кежлö коляс кыпыд да югыд пасöн.
Сентябр 29-30-öд лунъясö 15 лауреат вермасисны водзö, нуöдiсны мастер-классъяс. Конкурсысь öтдор Гудермесса коймöд гимназияын аслас сямöн юксис и Ольга Михайловна. Октябр 1-öд лунö ордйысьысьяс пиысь бöрйисны вит медбур велöдысьöс. Найö октябр 3-öд лунö Москваын Россия Федерацияса Общественнöй палатаын вермасисны конкурслöн бöръя тшупöдын, кытчö пырисны «Министркöд сёрни» да «Öтувъя лекция» юкöнъяс.
Октябр 4-öд лунö Кремльын вöлi ыджыд гаж, кодöс сиисны велöдысьяслöн лунлы. Нимöдiсны и 2019-öд вося «Россияса медбур велöдысь» ставроссияса конкурсын петкöдчысьясöс да вермысьясöс. Кыпыда вочаалiс найöс Россия Федерацияса просвещение министр Ольга Васильева да лыддис Россияса президент В.В.Путинлысь да Россия Федерацияса правительствоöн юрнуöдысь Д.А.Медведевлысь чолöмалан телеграммаяс. Ыдждöдлiсны конкурсын вермысьöс, а сiйöн лоис Волгоградысь роч кыв да литература велöдысь Лариса Гивиевна Арачашвили.
— Ставроссияса конкурсын петкöдчöм меным сетiс унатор. Öти-кö, ме быдми профессиональнöя, мöд-кö, паныдалi выль ёртъясöс. Тöдмаси Магаданысь анькöд, кодкöд лоим бур да матысса нывъёртъясöн, а сiдз жö Ленинград обласьтысь, Забайкалье крайысь велöдысьяскöд. Конкурслысь став мытшöдсö öтув вуджöм бöрын сьöкыд весиг вöлi янсöдчынысö. Лача кута, гашкö, коркö мойвилас на накöд паныдасьлыны кутшöмкö чукöртчылöм вылын. Ёна шензьöдiс Грозныйлöн вöвлытöм мичлуныс. Но медся нин ёна — сэтчöс йöзыс. Сэтшöм шаньöсь, уджачöсь, вежавидзысьöсь, гöсьтъясöс бура вочаалысьöсь. Сiйö жö Гудермесас ветлiгöн быдлаын вочаалiсны ыджыд гажöн, озыр пызанöн, кытчö пуктöмаöсь медся чöскыд, дона да нималана вöлöга. Найö некодлы оз сины лёк, та йылысь весиг мöвпыштнысö оз кужны, ни оз вермыны. Тадзи тшöктö налöн религияыс, пыдiсянь эскöмыс. Меным зэв нимкодь, мый мойвиис волыны тайö кыпыд, сöстöм карас да тöдмасьны сэтчöс югыд ловшыа йöзкöд.

Галина НЕСТЕРОВА.
Снимокъяс вылын: О.М.Сковородникова; Л.И.Стрельникова.

Комментарии:

Добавить комментарий

Свежий выпуск: за 7 ноября