Ручса олöма йöзлöн котырлы март лоис озырöн уна важ да выль тöдсаяскöд аддзысьлöмъясöн, юр жуглан ворсöмöн, спортса ордйысьöмъясöн. Сiдз, ворсiм юрсиктса «Олимпикын» пионерболысь. Вöлi дас вермасьыс котыр – Кулöмдінысь кык, Ручысь, Донысь, Керчомъяысь, Діасёръяысь, Кебанъёльысь, Шöръягысь, Вöльдінысь да Парчысь. Ордйысим öкмыс час асывсянь сизим час рытöдз. Ми, ручсаяс, пукалім да «висим» став вöснаыс. Медводзын лоис Дон, босьтіс зарни медальяс. Ми лоим мöдöн, вöльдінсаяс коймöдöн. Матынджык кö вöлі енэжыс, эськö юрнаным сэтчö люкасим, сэтшöма чеччалім нимкодьнымла. Котырын вöліны Л.И.Кирушева, В.Д.Зезегова, М.В.Расова, М.Д.Юдина, А.И.Шахова, А.И.Адамова, З.М.Гуляева да ме. Котыръяслöн ворсігкості позис сёйыштны вердчанiнын, шырсьыны дон вештытöг. 
Ручса котыр нимсянь аттьöала овмöдчöминса юралысь Д.В.Кирушевöс, коді ачыс вöлі руль сайын, ёна «висис» миян вöсна. 
Мартын жö олöмаяслöн котыр школаса да садса уджалысьяскöд петкöдчис чужан му йылысь тöдöмлунъясöн. Юалöмъяссö лöсьöдöма коми кыв да литература велöдысь Д.А.Гребенюк. Миян котыр асьсö эз янöд. Бура вуджöдiм роч вылысь шусьöгъяс да кывъяс, висьталiм тöдчана йöз да пасъяс йылысь. Миян котырын вöліны Н.А.Метлякова, Л.И.Кирушева, Н.М.Подюкова, К.Г.Есева, А.И.Адамова, М.В.Расова, З.М.Гуляева да ме. Ворсöм помын Диана Алексеевна шуис, мый татшöм аддзысьлöмсö колö котыртлыны тшöкыдджыка да унджык йöзöн. Вöзйöмсö ставöн ошкисны. 
Екатерина Ульнырова. 
Руч. 
Снимок вылын: Донса, Ручса да Вöльдінса вермысь котыръяс.