Олöм вöлi сьöкыд

[ A+ ] /[ A- ]

Керчомъяысь Текуса Ивановна Матвеевалы 90 арöс тырис апрель 4-öд лунö, а паспортас пасйöма июнь 4-öд лун. Ачыс нывбаба чужан лунсö век пасйис май 31-öд лунö, кор Текусаяслöн нимлун. Дзолядырсö казьтылiгöн висьталiс, мый бать-мамыс олiсны зумыда, да найöс кулакалiсны. Мед кыдзкö дорйыны ныв-пинысö, гозъя юксисны. Батьсö мöдöдiсны Сибирö, а мамыс, Агния Егорьевна, челядьыскöд кольччис Керчомъяö. Сибирас батьыс ёртыскöд видлiсны пышйыны, найöс суöдiсны. Ёртсö виисны, а батьсö ранитiсны юрас. Чайтiсны кулöмöн жö да, сэтчö и колисны. Сiйöс аддзис кутшöмкö ныв да сувтöдiс кок йылö. Олöм чöжыс сэсся айловлы ковмис новлыны каска, кодöс вöчисны юрсö бурдöдiгöн. 
Мамыслы челядькöд öтнасöн кольöм бöрын вöлi зэв сьöкыд, пыр уджалiс. Текусалöн, позьö шуны, челядьдырыс эз и вöв. Сизим арöсöн ковмис видзны нёль арöса воксö. Вермис велöдчыны сöмын сизимöд классöдз. Мамыс выльысь петiс верöс сайö, чужисны челядь. Медым сувтöдны дзолюкъясöс кок вылö, ректiс баржаяс. Коркö сылы мыш вылас пуктiсны сё килограмм сьöкта сакар мешöк. Нывбабалöн кусыньтчисны кокъяс, сiйö усис. Тшöктiсны кыскыны. Куимöс и вермис нуны, сэсся вын эз коль. Сы бöрын шуисны новлыны 50 килограмма мешöкъяс, сылы тайö вöлi зэв нин кокни. 
Сибирö ыстöм батьыс олiс Тюмень обласьтын, выльысь гöтрасис. Коркö сiйöс мöдöдлiсны Кировса санаторийö да волiс Керчомъяö, думсьыс кöсйис бöр бергöдчыны воддза гöтыр дорас, но Агния Егорьевна тшöктiс мунны бöр. 
1982-öд воын Керчомъяысь студент Степан Размыслов ветлiс Тюменьö практика вылö. Магазин дорын тöдмасис пöлькöд, кодi висьтасис Текуса Ивановналöн батьöн. Сiйö сетiс зонлы ассьыс адрессö да тшöктiс сетны Агния Егорьевналы, мед челядьыс гижасны сылы. Керчомъяö локтöм бöрын пöльлысь корöм Степан пöртiс олöмö, а Текуса Ивановна шуис, мый батьыс сiйöс эз быдтыв, адрессö сюйыштiс кутшöмкö книгаö да вунöдiс. 
Аслас Текуса Ивановналöн олöмыс вöлi сьöкыд жö. Курыд казьтылöмъясöн колины война вояс, кыдзи бöрдöмöн колльöдiсны салдатъясöс. Ставсö вöчисны фронтлы. 1950-öд воын петiс верöс сайö. Мича статя Николай Фёдорович бура гудöкасис. Уна нывлöн сiйöс аддзигöн тiпкис сьöлöмыс. Николай Фёдоровичкöд олiсны дыр, быдтiсны сизим челядьöс. Гöтырыслы да челядьыслы пыр висьтавлiс быдпöлöс вöвлöмторъяс. Верöсыс абу нин 25 во. 
Текуса Ивановна велöдiс став челядьсö. Сизимысь талун ловъяöсь витöн: Ида, Алексей да Дмитрий олöны Сыктывкарын, Мария да Анатолий — Югыдъягын. Томдырйиыс ёна вурсис. Вурлiс челядьлы курткаяс да пальто, шебрасъяс. Велöдiс и нывъяссö, Идаöс да Нинаöс. Ёна вышивайтчис, крючокöн мичмöдлiс юрлöс эжöдъяс. Кыдзи висьталiс Ида Николаевна, челядьсö эз велöдлыны сöмын пусьыны-пöжасьны, асьныс сэсся верстяммисны да и велалiсны. Бать-мамыс чеччылiсны водзысь-водз, идрасьлiсны, пелькöдiсны керкасö, пусисны, лысьтысисны, челядьлöн чеччигкежлö ставыс нин вöлi дась пызан вылын. Мамыс вöлi стрöг. Сылы эз ковмыв öтиторсö висьтавны некымынысь. Челядь кывзысисны: пиян ваялiсны ва да пес, нывъяс вылын вöлi тасьтi-пань да джодж мыськалöм, керка пелькöдöм. Батьыс ёна лыддьысьлiс челядьыслы. Вöлi воас медся интереснöйторйöдзыс, сувтас да шуас, мый водзö кутасны лыддьыны аски. Сiйö и велöдiс челядьсö радейтны книгаяс. Чоя-вока быдмисны öта-мöднысö пыдди пуктöмöн, ёртасьöмöн. 
Вит во сайын Ида Николаевна аддзис книгаяс костысь ыджыд батьыслысь адрессö да гижис письмö, индiс телефон номерсö. Корис звöнитны. Ыджыд батьыс сiйö кадас эз нин вöв ловъя. Звöнитлiс Текуса Ивановналöн медся ичöт Георгий вокыс, а Василий вокыс волiс нин кыкысь. Тöдмасисны. Öнi виччысьöны мукöдъяссö, сёрнитöны телефон да интернет пыр. 
Текуса Ивановна ёна нин пöрысь, да öтнассö кольöны зэв гежöда. Тöвнас сiйö олö Сыктывкарын Ида Николаевна нылыс дорын, а гожöмнас локтö Керчомъяö. Öнi сыкöд олö Алексей пиыс. Öта-мöдсö вежлалöмöн, пыр кодкö орччöн. Артмö кö сiдзи, мый некымын лун Текуса Ивановна öтнас, сылы отсасьö орччöн олысь Антонина. Сiдзсö гортас ветлöдлö ачыс, но ывла вылö öтнасöн петны челядь оз лэдзны, дзикöдз синмöммис да. 
Текуса Ивановна олöм чöжыс вöлi ударницаöн. Быдтiс куканьясöс. Ставсö уджалiс 40 во. Бур уджсö унаысь пасйылiсны. Кыкысь вöлi депутатöн. Сiйöс пыр пыдди пуктiсны суседъяс. Став нывъёртыс нывбабалöн кулiсны, колис дзик öтнас. 
Мамлöн керка оз кушмы: ыджыда паськалöм семья тшöкыда чукöртчывлö чужан позйын. Нывбабалöн 19 внук да 18 правнук. Кор вöлiны ичöтöсь, гожöмъясын пыр олiсны Текуса Ивановна дорын. 

Галина КЛЮЖЕВА. 
Снимок Наталья Левченколöн.

Комментарии:

Добавить комментарий

Свежий выпуск: за 5 декабря