Озъягын радейтöны спорт

[ A+ ] /[ A- ]

Талун ёна сёрнитöны дзоньвидзалун видзöм да ёнмöдчöм йылысь. И тайö зэв буртор. Сёрнитны кö школа йылысь, то велöдысьяс ышöдöны челядьöс овны бура, томдырсянь видзны дзоньвидзалун, мед нинöмтор эз падмöд босьтны бур тöдöмлунъяс, а школа бöрын колана специальносьт, лöсьöдны семьяяс да чужтыны ас кодьныс жö дзоньвидза челядьöс. А, сідзкö, ёнмöдны коми войтырлысь вуж – республикалысь да страналысь аскиа лунсö. 
Озъягса школаын спорт вöсна кывкутö физкультура велöдысь Евгений Александрович Нестеров. Тайö том морт йывсьыс позьö висьтавны сöмын бур кывъяс. Сійö уджалö сьöлöмсяньыс, оласногнас петкöдлö нывкаяслы да зонкаяслы пример: оз ю, оз куритчы. Сійöс тöдöны оз сöмын районын, но и республикаын. Евгений Александровичöс пасйылісны кыдзи бур спортсменöс да ыджыд сяма велöдысьöс. Сідзжö сійöс лыддьöны ордйысьöмъяс колана ногöн донъялысьöн. Уна ныв-зон школа помалöм бöрын пырис велöдчыны вылыс тшупöда велöданінъясö физкультуралöн да спортлöн факультетъясö. Евгений Александровичлöн быдтасъяс бура петкöдчöны олимпиадаясын. Озъягса школаын велöдчысьяс ёна радейтöны спорт, и таын пайыс ыджыд сяма велöдысьлöн. Физкультура урокъясысь кындзи нуöдö челядьлы да том йöзлы унасикас секцияяс. Куритчыны котралö лыда велöдчысь. Тайö сідзжö артмис Евгений Александровичлöн отсöгöн. Е.А.Нестеров нöшта зэв водзмöстчысь депутат. 
Оз кольччыны томъясысь и олöма аньяс. Бöръя воясö найö кутісны тöждысьны асланыс дзоньвидзалун вöсна ёнджык. Ветлöны лыжи вылын да йöткасьöны бедьясöн, петкöдчöны гажъяс дырйи клубын. Налöн и гортаныс дзим-дзурк, и спортлы вичмö кад. Оз, бара, няргыны да котравны бурдöдчанінъясöд. Меным чайтсьö, мый найö воысь-воö томмöны. Беддьöн йöткасьысьяс лыдын Екатерина Ивановна Паршукова, кодлы 83 арöс. Ме сійöс аддзыла матö быд лун – бедьяс отсöгöн восьлалö зэв збодера. А öд томдырйиыс оліс зэв сьöкыда, нэмсö уджаліс вöрын. 
Тайö фото вылын Озъягса «спортсменъяс»: (шуйгаладорсянь) И.К.Попова, Л.Г.Тлиашинова, В.В.Филиппова, Агелина Попова, Н.Е.Бажукова, Е.И.Паршукова, Н.А.Кистанова, Г.П.Коровина (физкультура велöдысь Е.А.Нестеровлöн ыджыд мамыс), Т.Н.Попова (олöмаяслöн котырöн юрнуöдысь). Тані, дерт, абу ставнысöсь, унаöн мартын ветлöны лыжи вылын, кыйсьöны верöсъясныскöд. 
Вермас лоны, мый тадзи абу сöмын Озъягын. Ми зэв ёна нимкодясям асланым олöма йöзлöн визувлунöн. Миян аньяс – молодечьяс! 

Ираида Саталкина. 
Озъяг.

Комментарии:

Добавить комментарий

Свежий выпуск: 28 марта

Осторожно — мошенники!